Balombodi 16 - MUKANDA WA MYIDI MUKULU

Shimeshone ne biibi bia mu Ngaza

¹ Dituku dikuabu, Shimeshone kuya ku Ngaza. Kusanganayemu mukaji mudisombele. Kumubuelelaye mu nzubu.

² Bena tshimenga atshi kumanya muvua Shimeshone mu nzubu mua mukaji awu. Nanku kunyungululabu nzubu. Kumualaminabu butuku bujima ku tshiibi tshia tshimenga. Kadi kabena bamuenzele bualu butuku abu to. Bivua bela meji ne: netumushipe amu dinda.

³ Kadi Shimeshone kulala amu meba makese a ku mubuelu. Mundankulu, kubikaye. Kutulaye bitupa bibidi bia tshiibi tshia ku tshimenga. Kutulaye kabidi ne makunji abidi awa makuate tshibi, ne dibaya dia kupayika nadi tshiibi. Kuambulaye bintu abi bionsu pa makaya. Kuyaye kubiteka ku lusongu lua mukuna uvua mutangilangane ne tshimenga tshia Ebrone.

Dalila udi upangila Shimeshone

⁴ Pashishe Shimeshone kunanga bikole mukaji mukuabu, uvuabu binyika ne: Dalila. Mukaji awu uvua musombele mu tshibandabanda tshia Soreke.

⁵ Nanku bakalenga batanu ba bena Peleshete kuya kuambila Dalila ne: — Enzeja Shimeshone, akuambile kudi bukole buende bufuma, ne mushindu udibu mua kujika. Nanku netumusuike mionji, bua tumukokeshe. Pashishe muntu yonsu wa kutudi neakupe nkanu mitoke ya tshiamu tshia mushinga mukole tshinunu ne lukama.

⁶ Ke Dalila kuambila Shimeshone ne: — Ndi nkusengelela, ungambile kudi bukole buebe bufuma. Kabidi badi mua kukusuika ne tshinyi bua kukukokesha?

⁷ Shimeshone kuandamuna ne: — Bobu bansuike ne mionji mipiamipia muanda mutekete ya milemu, ivua kayiyi mianji kuuma, tshiakuikala ne bukole to. Nengikale bu bantu bonsu.

⁸ Bakalenga ba bena Peleshete kutuadila Dalila mionji muanda mutekete mipiamipia ya milemu, ivua kayiyi mianji kuuma. Dalila kuangata mionji ayi, kusuika Shimeshone.

⁹ Dalila uvua musokoke bantu mu nzubu muende. Diakamue kuelaye diyi, wamba ne: — Shimeshone, bena Peleshete badi apa bua kukuluisha! Shimeshone kutula mionji ayi, amu bu mikale mionji miosha mu kapia. Nanku bena Peleshete kabavua bamanye muaba uvua bukole bua Shimeshone to.

¹⁰ Dalila kuambila Shimeshone ne: — Wewe udi unseka, bualu udi ungambila malu a dishima. Mpindiewu ndongesha mushindu udibu mua kukusuika.

¹¹ Shimeshone kumuambila ne: — Bobu bansuike ne mionji mipiamipia, idi kayiyi mianji kuenza mudimu mukuabu, tshiakuikala kabidi ne bukole to. Nengikale bu bantu bonsu.

¹² Dalila kukeba mionji mipiamipia, kusuika nayi Shimeshone, kuela diyi ne: — Shimeshone, bena Peleshete badi apa bua kukuluisha! Bantu bavua basokome kabidi mu nzubu wa Dalila. Kadi Shimeshone kutulakaja mionji ivuabu bamusuike ku maboku, anu bu udi utulakaja buanda.

¹³ Dalila kuambila Shimeshone ne: — Wewe utshidi anu unseka, bualu udi ungambila malu a dishima. Mpindiewu, ungambile bualu bua bushuwa. Undeje mushindu udibu mua kukusuika. Shimeshone kumuambila ne: — Wewe musuike nsuki yanyi mu bisumbu muanda mutekete, muyibueje mu tshiamu tshia kukuma natshi bilamba, muyimanyike bimpe ne mulonda wa ku tshiamu atshi, tshiakuikala ne bukole to. Nengikale bu bantu bonsu.

¹⁴ Dalila kuladika Shimeshone, kumusuika nsuki mu bisumbu muanda mutekete. Kuyibuejaye mu tshiamu tshia kukuma natshi bilamba. Kuyimanyikaye bimpe ne mulonda wa ku tshiamu atshi. Pashishe Dalila kuela diyi ne: — Shimeshone, bena Peleshete badi apa bua kukuluisha! Shimeshone utabuluka, kutulakajaye mulonda, tshiamu tshia kukuma natshi bilamba, ne lukanu luatshi.

¹⁵ Ke Dalila kuambila Shimeshone ne: — Kuena munnange to, bualu kuena ungambila malu malelela. Mona, wewe udi munseke misangu isatu, ubenga mua kungambila kudi bukole buebe bufuma.

¹⁶ Dalila kutatshisha Shimeshone matuku onsu, wambulula anu malu a mushindu umue. Shimeshone kupungila bikole bua malu aa, ukeba kufua. Kavua kabidi ne dikisha to.

¹⁷ Nanku kujinguluilaye Dalila bualu abu, umuambila ne: — Nsuki yanyi kabena banji kuyikosa to, bualu meme ndi mujidila kudi Mvidi Mukulu diambedi, tshiyi muanji kuledibua. Bobu bankose nsuki yanyi, tshiakuikala ne bukole to. Nengikale bu bantu bonsu.

¹⁸ Dalila kumvua ne: Shimeshone mmungambile bualu bua bushuwa. Nanku kuambilaye bakalenga ba bena Peleshete ne: — Mpindiewu, nufike, bualu Shimeshone mmungambile bualu bua bushuwa. Bakalenga abu kufika ne nkanu ya tshiamu tshitoke tshia mushinga mukole ivuabu balaye Dalila.

¹⁹ Dalila kuladika Shimeshone pa binu biende. Kubikilaye muntu bua akose Shimeshone bisumbu biende bia nsuki muanda mutekete. Nanku Dalila kutuadija kukepeshabukole bua Shimeshone. Bukole buende bua dikema kujimina.

²⁰ Ke Dalila kuela diyi, wamba ne: — Shimeshone, bena Peleshete badi apa bua kukuluisha! Shimeshone utabuluka, kuelaye meji ne: nengikale ne bukole, nendipandishe bu mumvua ngenza. Bualu kavua mumanye muvua Maweja-Nangila kayi mua kumuambuluisha kabidi to.

²¹ Nanku bena Peleshete kumukuata, kumutonkona mesu. Kuyabu nende mu tshimenga tshia Sora. Kumusuikabu ne nkanu mikunze, kumuela mu nzubu wa lukanu. Kumuenzejabu muaba awu mudimu wa kushipula ntete.

²² Kadi nsuki yende uvuabu bakose, ivua yenda itoloka.

Tshishima tshia ndekelu tshia Shimeshone

²³ Dituku dikuabu, bakalenga ba bena Peleshete kudisangisha bua kuenza tshibilu tshia ditshimuna diabu. Kulambulabu mvidie wabu Dagone mulambu munene, bimba misambu, bamba ne: — Mvidie wetu watupeshi Shimeshone, muluishi wa bena Peleshete.

²⁴ Bena Peleshete bamone mvidie wabu, kumutumbishabu, bamba ne: — Mvidie wetu watupeshi Shimeshone, muluishi wa bena Peleshete, mukengeshi wa tshisamba tshietu, udi mubutule bantu bapite bungi.

²⁵ Bu muvua bena Peleshete ne disanka dia bungi, kutumabu diyi bua bafike ne Shimeshone bua kubasekeshaye. Kupatulabu Shimeshone mu nzubu wa lukanu. Bantu bamumone, kusekabu bikole. Bamane kumuimanyika pankatshi pa makunji a ku nzubu wa mvidie wabu,

²⁶ Shimeshone kuambila nsongalume uvua umuendesha, mumukuate ku tshianza, ne: — Uye nanyi ku makunji adi mimanyike nzubu wa mvidie, bua nkuateku. Ngikale mueyemene ku makunji aku.

²⁷ Kadi mu nzubu amu muvua bantu balume ne bakaji bapite bungi. Bakalenga batanu ba bena Peleshete bavuamu. Bantu bu binunu bisatu bavua bimane pa miaba ya kulu mu nzubu, batangila Shimeshone, bua kumuseka.

²⁸ Shimeshone kutendelela Maweja-Nangila, wamba ne: — Maweja-Nangila Mvidi Mukulu, umvuluke! Umpeshe bukole buanyi bua kale anu musangu ewu. Eyi, Mvidi Mukulu, mpete mushindu wa kusombuela bena Peleshete, bonsu pamue, bua mesu anyi adibu bashipe.

²⁹ Shimeshone kubabata ku makunji abidi awa munkatshi mua nzubu wa mvidie, awa mimanyike nzubu. Kukuataye tshianza tshia balume ku dikunji, tshia bakaji ku dikuabu.

³⁰ Kuelaye diyi, wamba ne: — Mfuafua pamue ne bena Peleshete! Kuditshintaye ne bukole buonsu. Nzubu wa mvidie kupukila bakalenga bonsu ba bena Peleshete, ne bantu bonsu bavua mu nzubu amu. Bantu bavua bafue pamue ne Shimeshone bavua ba bungi, bapite bavuaye mushipe pavuaye ne muoyi.

³¹ Bana babu ne Shimeshone, ne bena mu nzubu muabu bonsu, kufika bua kukeba tshitalu tshiende. Kutshiangulabu, kuya kumujika mu lukita lua tatuende Manowa, luvua pankatshi pa Sora ne Eshetayole. Shimeshone uvua mushale mulombodi wa bena Izrayele bidimu makumi abidi.