Balombodi 15 - MUKANDA WA MYIDI MUKULU

Shimeshone udi usombuela

¹ Matuku mamane kupita, tshikondu tshia kunowa ntete ya kuenza bukula, Shimeshone kuya kumonangana ne mukajende. Uvua mumutuadile lukungulu lua mbuji. Shimeshone kulomba bua kubuela mu nzubu mua mukajende. Kadi tatuende muenu kubenga.

² Tatuende muenu kumuambila ne: — Mvua muele meji ne: kuena munange kabidi mukajebe to. Ndi mumane kumufila kudi nsongalume uvua mukushindikije mu dibaka. Kadi, muakunyende udi muimpe, mutambe yayende. Kabiena nanku anyi? Udi mua kumuangata pa muaba wa yayende.

³ Shimeshone kuamba ne: — Mpindiewu, muntu kena mua kumbela to. Ndi musue kuenzela bena Peleshete bibi.

⁴ Shimeshone kuya, kukuata nyama ya mibuabua nkama isatu. Kuenzaye bimunyi bia kapia. Kusuikakajaye mikila ya nyama ya mibuabua ibidi ibidi. Kusuikaye tshimunyi tshia kapia ku dijita divua pankatshi pa mikila ibidi iwaye mulamakaje.

⁵ Kutemeshaye kapia ku bimunyi aku. Kulekelaye nyama ayi mu madimi a bena Peleshete a ntete ya kuenza bukula. Nanku kuoshaye ntete ivua ku bikolakola misuika mu bisumbu, nansha itshivua mu madimi. Kuoshaye kabidi ne mitshi ya olive.

⁶ Bena Peleshete kukonkangana bua muntu uvua muenze bualu ebu. Kubambilabu ne: — Udi muenze ke Shimeshone! Mmuenze nunku, bualu tatuende muenu udi musombele mu Timna, mmumunyenge mukajende, mumufile kudi nsongalume mukuabu uvua mushindikije Shimeshone mu dibaka. Ke bena Peleshete kuya kuosha mukaji wa Shimeshone, kuosha kabidi ne tatuende ne muoyi.

⁷ Shimeshone kubambila ne: — Bu munudi nuenza malu a mushindu ewu, tshiakusomba ne ditalala to, anu meme mumane kumusombuela.

⁸ Shimeshone kubaluisha, kubatshimuna diakamue. Pashishe kuyaye kusombela munda mua lubuebue lua Etame.

Shimeshone ne lubanga lua nyama wa mpunde

⁹ Bena Peleshete kuya mu buloba bua Yuda. Kudilongololabu ne bena mvita bua kuluisha tshimenga tshia Leki.

¹⁰ Bena Yuda kukonka bena Peleshete ne: — Nudi balue kutuluisha bua tshinyi? Bena Peleshete kuandamuna ne: — Tudi bafike bua tuetu kukuata Shimeshone, kumuenzela bionsu bidiye mutuenzele.

¹¹ Ke bantu balume ba bena Yuda binunu bisatu, kuya mu lubuebue lua Etame. Kuambilabu Shimeshone ne: — Udi mumanye ne: tuetu tudi ku bumfumu bua bena Peleshete. Kuena mumone ne: udi utuenzela bibi anyi? Shimeshone kuandamuna ne: — Ndi mubenzele bu mudibu bangenzele.

¹² Bantu abu kuandamuna Shimeshone ne: — Tudi bafike muaba ewu bua kukusuika mionji, kukufila kudi bena Peleshete. Shimeshone kubambila ne: — Nuditshipe bua kanunshipi nuenu to.

¹³ Kumuandamunabu ne: — Tuetu katuena ne dijinga dia kukushipa to. Tudi basue anu kukusuika mionji, kukufila kudi bena Peleshete. Kusuikabu Shimeshone mionji ibidi mipiamipia. Kumukabu nende mu lubuebue.

¹⁴ Bafike ku Leki, bena Peleshete kuya kubakidila, bela bibingu bia ditshimuna. Ke Mueyelu wa Maweja-Nangila kutulukila Shimeshone. Mionji ivuabu bamusuike ku maboku ne ku bianza, kukosekayi diakamue, anu bu buanda bua ndanda buosha mu kapia.

¹⁵ Shimeshone kumona lubanga lua nyama wa mpunde, mumane kushipa kupita matuku makese. Kuambulaye lubanga alu. Kushipaye nalu bantu tshinunu.

¹⁶ Pashishe kuelaye diyi, wamba ne: — Ndi mushipe bantu tshinunu, anu ne lubanga lua mpunde. Ndi munguje bitalu mishiki, anu ne lubanga lua mpunde.

¹⁷ Pashishe, Shimeshone kuimansha lubanga alu kule. Ke padibu binyika muaba awu ne: “Ramate-Leki,” mmumue ne: “Mukuna wa lubanga lua nyama.”

¹⁸ Diakamue Shimeshone kumvua nyota mikole. Kubikilaye Maweja-Nangila bua amuambuluishe, wamba ne: — Eyi, Mvidi Mukulu, wewe ke udi mungambuluishe bua kutshimuna mvita mikole eyi. Kadi mpindiewu, ndi mfua ne nyota, anu bua kunkuatabu kudi bantu abu, badibu kabayi bateke panshi.

¹⁹ Maweja-Nangila kuenza tshina mu lubuebue londoke luvua ku Leki, mayi kupatuka. Shimeshone kunua mayi awu, kupeta bukole kabidi. Bivua binyika mpokolu awu ne: “Mpokolu wa Kora.” Mmumue ne: mpokolu wa udi ubikila. Mpokolu awu utshidiku too ne ku mpindiewu.

²⁰ Shimeshone uvua mushale mulombodi wa bena Izrayele bidimu makumi abidi, mu tshikondu tshivua bena Peleshete ne bumfumu.