Balombodi 14 - MUKANDA WA MYIDI MUKULU

Malu a dikema a kumpala adi Shimeshone muenze

¹ Dituku dikuabu, Shimeshone kuya mu Timna. Kumonayemu nsongakaji wa bena Peleshete.

² Shimeshone upingana kuabu, kuambilaye baledi bende ne: — Ku Timna ndi mumone nsongakaji wa bena Peleshete. Ndi musue nunselele mukaji ewu.

³ Baledi ba Shimeshone kubenga, bamba ne: — Udi muye kusungula nsongakaji amu wa bena Peleshete badibu kabayi bateke panshi bua tshinyi? Kuena mumone nsongakaji mu diku dienu, nansha mu tshisamba tshienu anyi? Kadi Shimeshone kuambila tatuende ne: — Ndi musue unselele amu nsongakaji awu. Bualu ndi mumunange.

⁴ Baledi ba Shimeshone kabavua bamanye ne: Maweja-Nangila mene ke uvua mupeshe muanabu wa balume dijinga adi, bua apete mushindu wa kuluisha bena Peleshete. Bualu tshikondu atshi, bena Izrayele bavua ku bumfumu bua bena Peleshete.

⁵ Shimeshone ne baledi bende kuya ku Timna. Bafike ku madimi a mitshi ya mvinyo avua pabuipi ne Timna, muana wa nyama wa ntambue kutupika, udila, uya kudi Shimeshone.

⁶ Mueyelu wa Maweja-Nangila kutulukila Shimeshone. Awu uvua anu bianza bitupu. Kadi kupandaye muana wa ntambue awu bipese, amu bu udi upanda kana ka mbuji. Kadi Shimeshone kena muambile baledi bende bionsu bivuaye muenze abi to.

⁷ Kutungunukaye ne luendu. Kuyaye kuyukila ne nsongakaji wa bena Peleshete. Nsongakaji awu uvua umulengelela bikole.

⁸ Matuku mamane kupita, Shimeshone kupingana kabidi ku Timna bua kusela nsongakaji awu. Pavua Shimeshone mu njila, kusesukaye bua kumona tshitalu tshia nyama wa ntambue uvuaye mushipe. Kusanganaye mbulubulu mienza buitshi munda mua mifuba ya nyama awu.

⁹ Shimeshone kupatula buitshi, kuteka mu bianza, wenda udia mu njila. Pashishe, kufikaye muaba uvua tatuende ne mamuende. Kubapeshaye buitshi abu bua kudiabu. Kadi kena mubambile ne: buitshi ebu, ndi mubupatule munda mua nyama wa ntambue undi mushipe awu to.

Shimeshone udi welela bena Peleshete muanu

¹⁰ Tatuende wa Shimeshone kuya ku ba nsongakaji awu. Shimeshone kulongoluela bantu ba muaba awu didia dia dibaka, bu mudi bansongalume bonsu benza.

¹¹ Bena Peleshete bamone Shimeshone, kusungulabu bansongalume makumi asatu bua kushindikija Shimeshone.

¹² Shimeshone kubambila ne: — Ndi musue kunuelela muanu. Panuikala baumanye, bangandamuna, matuku muanda mutekete a tshibilu tshia dibaka kaayi manji kupita, nennupeshe miteelu mimpe makumi asatu, ne bilamba bikuabu bia tshibilu makumi asatu.

¹³ Kadi nuenu kanuyi bandamune bimpe, nenumpeshe meme miteelu mimpe makumi asatu, ne bilamba bia tshibilu makumi asatu. Bansongalume abu kuandamuna Shimeshone ne: — Elaku muanu webe, tudi tukuteleja.

¹⁴ Shimeshone kubelela muanu ne: — Biakudia mbifume kudi udi ubidia. Tshintu tshisheme ntshifume kudi udi ne bukole. Mmumue ne tshinyi? Matuku asatu mamane kupita, bansongalume abu kabavua banji kupeta diandamuna to.

¹⁵ Dituku dia muanda mutekete, kuambilabu mukaji wa Shimeshone ne: — Enzeja bayebe, atujinguluile muanu. Kayi mutujinguluile muanu, tudi tukosha wewe ne bena nzubu webe bonsu. Nuvua batubikile bua kutunyenga bintu bietu bionsu anyi?

¹⁶ Mukaji wa Shimeshone kuya kudidila bayende, umusengelela ne: — Bulelela kuena munnange to. Udi munnyoke! Bualu udi muelele bana betu muanu, kuyi muanji kunjinguluila meme. Shimeshone kuandamuna ne: — Muanu ewu tshiena muujinguluile nansha tatu nansha mamu badi bandela to. Kadi ndi mua kukujinguluila muanu bua tshinyi?

¹⁷ Mukaji wa Shimeshone uvua anu umutatshisha ne muadi matuku onsu muanda mutekete a tshibilu tshia dibaka. Dituku dia ndekelu, Shimeshone kumujinguluila muanu, bualu bikavua bimutonda. Ke mukaji kuambila bana babu dimujinguluila adi.

¹⁸ Dituku dia muanda mutekete, diba kadiyi dianji kubuela, bena tshimenga kuya kuambila Shimeshone ne: — Ntshintu kaayi tshidi tshisheme tshipite buitshi? Ntshintu kaayi tshidi ne bukole tshipite nyama wa ntambue? Shimeshone kuandamuna ne: — Bu nuenu kanuyi badime ne nyama wanyi wa ngombe mukaji utshidi mutekete, kanuvua mua kupeta diandamuna to.

¹⁹ Pashishe, Mueyelu wa Maweja-Nangila kutulukila Shimeshone. Kuyaye ku Askalone. Kushipaye bantu balume makumi asatu. Kuangataye bilamba biabu, kubipesha bansongalume bavua bandamuna muanu. Ke Shimeshone kupingana kudi tatuende ne tshiji tshikole.

²⁰ Kumunyengabu mukajende; kumupeshabu nsongalume mukuabu uvua mushindikije Shimeshone mu dibaka.