Balombodi 12 - MUKANDA WA MYIDI MUKULU

Bena Efrayime badi batandangana ne Yefete

¹ Bena Efrayime kudisangisha, kusabuka musulu wa Yardene. Kuyabu ku Safone. Kukonkabu Yefete ne: — Udi muye kuluisha bena Amone, kuyi mutubikile bua kukuambuluisha bua tshinyi? Tudi tuosha nzubu webe, tukoshilamu!

² Yefete kubandamuna ne: — Bena tshisamba tshianyi ne meme muine, tuvua ne mvita mikole ne bena Amone. Meme kunubikila, kadi kanuena bansungidile mu bianza biabu to.

³ Meme kumona ne; kanuena bafike bua kungambuluisha. Nanku ke meme kudifila ne muoyi mujima, musue nansha kufua bua kutshimuna bena Amone. Kadi Maweja-Nangila kubafila mu bianza bianyi. Nanku nudi bafike bua kunduisha penu bua tshinyi?

⁴ Ke Yefete kubikidisha bena Ngilaade bonsu. Kuluishaye bena Efrayime, kubatshimuna. Bena Efrayime ke bavua bamba ne: “Nuenu bena Ngilaade, nudi anu bena Efrayime bavua banyema kuetu. Nudi bumuke mu tshisamba tshietu tshia bena Efrayime, bua kubuela mu tshia bena Menashe!”

⁵ Ke bena Ngilaade kukuata malobu a Yardene, bua bena Efrayime kabapetshi mushindu wa kupita. Misangu yonsu, pavua muntu uvua munyeme ufika bua kupita, bavua bamukonka ne: — Udi muena Efrayime anyi? Pavua muntu awu ubenga ne: “Tshiena muena Efrayime to”,

⁶ bavua bamuenzeja ku bukole bua ashindumune muaku wa “Shibolete”. Kadi muntu awu uvua wamba yeye ne: “Sibolete”. Bualu kavua mumanye mua kushindumuna muaku awu bimpe to. Nanku bavua bamukuata, bamushipela pabuipi ne malobu a Yardene. Tshikondu atshi, kushipabu bena Efrayime binunu makumi anayi ne bibidi.

⁷ Yefete, muena Ngilaade, uvuamushale mulombodi wa bena Izrayele bidimu bisambombu. Pashishe kuluaye. Kumujikabu mu Ngilaade mu tshimenga tshiabu tshimulela.

Ibsane, Elone ne Abdone

⁸ Yefete mumane kufua, Ibsane, muena Betleyeme, kushala mulombodi wa bena Izrayele.

⁹ Uvua ne bana ba balume makumi asatu, kabidi ne ba bakaji makumi asatu. Uvua museleshe bana bende ba bakaji kudi bantu bavua kabayi ba tshisamba tshiabu to. Uvua muselele kabidi bana bende ba balume bakaji anu ba mu bisamba bikuabu. Ibsane uvua mushale mulombodi wa bena Izrayele bidimu muanda mutekete.

¹⁰ Pashishe kufuaye. Kumujikabu mu Betleyeme.

¹¹ Ibsane mumane kufua, Elone, muena tshisamba tshia Zebulone, kushala mulombodi wa bena Izrayele bidimu dikumi.

¹² Pashishe kufuaye. Kumujikabu mu Ayalone, mu buloba bua Zebulone.

¹³ Elone mumane kufua, Abdone, muana wa Ilele, muena Piratone, kushala mulombodi wa bena Izrayele.

¹⁴ Uvua mulele bana ba balume makumi anayi. Uvua ne bikulu makumi asatu. Bana abu ne bikulu abu, bavua babanda pa nyama ya mpunde makumi muanda mutekete. Abdone uvua mushale mulombodi wa bena Izrayele bidimu muanda mukulu.

¹⁵ Pashishe kufuaye. Kumujikabu mu Piratone, mu buloba bua Efrayime, ku mukuna wa muena Amaleke.