Balombodi 1 - MUKANDA WA MYIDI MUKULU

Bena Izrayele badi basa mu Kenaane

¹ Yoshuwa mumane kufua, bena Izrayele kuebeja Maweja-Nangila bua kumanya tshisamba tshiabu tshivua mua kudianjila kuluisha bena Kenaane.

² Maweja-Nangila kubandamuna ne: — Bantu ba mu tshisamba tshia Yuda, ke badi mua kudianjila kuluisha bena Kenaane, bualu ndi mbapesha ditunga adi.

³ Ke bantu ba mu tshisamba tshia Yuda kuambila ndelanganyi ya Shimeyone, muanabu ne Yuda, ne: — Nuye netu bua tukuate buloba buvuabu bamane kutuabanyina. Tuyayi bonsu kuluisha bena Kenaane. Pashishe netuye nenu bua tukuate buenu buloba. Nanku bena tshisamba tshia Shimeyone kudisangisha ne bena tshisamba tshia Yuda.

⁴ Kuyabu kuluisha bena Kenaane. Maweja-Nangila kubambuluisha, bua batshimune bena Kenaane ne bena Perizi. Kushipabu bantu balume binunu dikumi mu Bezeke.

⁵ Mu tshimenga etshi tshia Bezeke, kusanganabu mukalenga Adoni-Bezeke. Kumuluishabu, kutshimunabu bena Kenaane ne bena Perizi.

⁶ Mukalenga Adoni-Bezeke kunyema. Kumulondakajabu kudi bena Izrayele. Kumukuatabu, kumukosabu biala ne bana ba nkasa banene.

⁷ Ke mukalenga Adoni-Bezeke kuela mbila ne: — Akia! Bakalenga makumi muanda mutekete, bavuabu bakose biala ne bana ba nkasa banene, bavua bangula, muinshi mua mesa anyi, biakudia bivua bimata panshi! Bushiwa, Maweja-Nangila wansombuedi ku bibi bionsu bimvua muenze. Kuyabu ne mukalenga Adoni-Bezeke ku Yerushalayime. Kuyaye kufuilaku.

⁸ Bena Yuda kuluisha tshimenga tshia Yerushalayime, kutshikuata. Kushipabu bantu, kuosha ne tshimenga.

⁹ Pashishe kuyabu kuluisha bena Kenaane bonsu, ne bavua mu mikuna, ne bavua mu tshitupa tshia kuinshi tshia ditunga, ne bavua mu mpata.

¹⁰ Kubangabu mvita ne bena Kenaane bavua base mu tshimenga tshia Ebrone, tshiyuabu binyika tshikondu atshi Kiriyate-Arba. Mu tshimenga atshi ke muvuabu batshimuine bena diku dia Sheshayi, dia Akimane, ne dia Talmayi.

¹¹ Bena Yuda bumuka muaba awu, kuyabu kuluisha bena Debire, tshimenga tshivuabu binyika tshikondu atshi Kiriyate-Sefere.

¹² Kalebe kulaya ne: muntu yonsu wakuata tshimenga tshia Kiriyate-Sefere, nemmupeshe muananyi wa bakaji Aksa, ikale mukajende.

¹³ Otniyele, muana wa Kenaze (Kenaze uvua muakunyi wa Kalebe), kukuata tshimenga atshi. Kalebe kumupesha muanende Aksa, bua ikale mukajende.

¹⁴ Aksa ufika kudi Otniyele, kumupeshaye meji a kulomba budimi kudi tatuende muenu Kalebe. Pashishe Aksa kutuluka pa mpunde. Tatuende Kalebe kumuebeja tshintu tshivuaye musue.

¹⁵ Aksa kuandamuna ne: — Unsankishe, umpeshe mpokolu ya mayi, bualu buloba bua kuinshi mu ditunga buudi mumpeshe, kabuena ne mayi to. Kalebe kumupesha mpokolu ya mayi yonsu, ne ivua kuinshi, ne ivua ku mutu.

¹⁶ Bena Kayine, ndelanganyi ya tatuende muenu wa Moshe, kumuka mu tshimenga tshia Yeriko, tshiyuabu binyika tshia Mabue a ngaji. Kuyabu pamue ne bena Yuda. Kuasabu mu tshitupa tshia kuinshi tshia buloba bua bena Yuda, kuinshi kua tshimenga tshia Arade. Kusombabu munkatshi mua bena Amaleke.

¹⁷ Bena Yuda, ne ndelanganyi ya Shimeyone wa ba Yuda, kuyabu kuluisha bena Kenaane bavua base mu Sefate, kubatshimunabu. Kunyangakajabu tshimenga etshi tshijima tshia Sefate, tshivuabu binyika, biangatshile ku diba adi, Orma, mmumue ne: Kabutu.

¹⁸ Bena Yuda kukuata kabidi bimenga ebi: Ngaza, Askalone, Ebrone, ne misoku ivua nabi pabuipi.

¹⁹ Maweja-Nangila nkayende uvua muambuluishe bena Yuda. Ke pavuabu bakuata miaba ya pa mikuna. Kadi kupangilabu mua kuipata bantu bavua base mu mpata, bualu bobu aba bavua ne matempu a mvita a biamu.

²⁰ Kupeshabu Kalebe tshimenga tshia Ebrone, bu muvua Moshe mumane kuamba. Nanku Kalebe kukuata tshimenga atshi, kuipata meku asatu a bena Anake avuamu.

²¹ Ndelanganyi ya Binyamine kupangila mua kuipata bena Yebusa bavua basomba mu tshimenga tshia Yerushalayime. Nanku bena Yebusa ne bena Binyamine badi basomba pamue mu Yerushalayime too ne ku mpindiewu.

²² Ndelanganyi ya Efrayime ne ya Menashe, bana ba Yozefe, kuya kuluisha bena tshimenga tshia Betele, Maweja-Nangila kubambuluisha.

²³ Kutumabu bantu bangabanga bua kutentekela tshimenga atshi, tshivuabu binyika Luze tshikondu atshi.

²⁴ Bantu bakuabu batume, kumonabu muntu upatuka mu tshimenga atshi. Kumulombabu ne: — Utuleje muaba wa kubuelela mu tshimenga etshi. Nanku netukuenzele bimpe.

²⁵ Muntu awu kubaleja muaba wa kubuelelabu. Ke muvua ndelanganyi ya Efrayime ne ya Menashe mibuele mu tshimenga atshi, mitshibutule kabidi. Kadi ki mbashipe muntu awu, nansha bena diku diende.

²⁶ Muntu awu kuya kuasa mu ditunga dia bena Iti. Kuasaye tshimenga mu ditunga adi. Kutshinyikaye ne: Luze. Dina edi ditshidiku too ne mpindiewu.

²⁷ Bena Menashe kupangila mua kuipata bena bimenga ebi: Bete-Sheyane, Tanake, Dore, Ibleyame, Megido, nansha bantu bonsu bavua basomba mu misoku ivua mutumba ne bimenga abi. Nanku bena Kenaane batshivua anu basomba mu buloba ebu.

²⁸ Nansha diba divua bena Izrayele bamane kupeta buloba bua bungi, kupangilabu mua kuipata bena mu bimenga ebi. Kadi bena Izrayele bavua babenzeja midimu mishilangane.

²⁹ Bena Efrayime kupangila mua kuipata bena Kenaane bavua base mu Ngezere. Ke muvua bena Kenaane aba basomba munkatshi mua bena Efrayime nanku.

³⁰ Bena Zebulone kupangila mua kuipata bena Kenaane bavua base mu Kitrone ne mu Makalale. Ke mutshivua bena Kenaane basomba miaba eyi. Kadi bena Zebulone bavua babenzeja midimu mishilangane.

³¹ Bena Ashere kupangila mua kuipata bena bimenga ebi: Ako, Sidone, Alabe, Akzibe, Elba, Afike ne Rekobe.

³² Ke pavua bena Ashere ne bua kuasa munkatshi mua bena Kenaane ba mu ditunga.

³³ Bena Naftali kupangila mua kuipata bena Kenaane bavua base mu Bete-Shemeshe ne Bete-Anate. Ke pavua bena Naftali ne bua kuasa munkatshi mua bena Kenaane ba mu ditunga. Kadi bena Naftali bavua anu babenzeja midimu mishilangane.

³⁴ Bena Amore kuipata ndelanganyi ya Dane, kuyisemeja luseke lua mikuna. Bena Amore kabavua basue bua bena Dane bapueke mu mpata to.

³⁵ Nanku bena Amore batshivua amu basomba mu Are-Erese, mu Ayalone, ne mu Shaalbime. Kadi bidimu bimane kupita, ndelanganyi ya Efrayime ne ya Menashe kutshimuna bena Amore, kubenzeja midimu mishilangane.

³⁶ Mukalu wa kuinshi mu ditunga dia bena Amore, uvua ulonda buloba bua bena Edome, umukila, luseke ludi diba dipatukila, ku mukuna wa Tuminyiminyi.