Amosa 8 - MUKANDA WA MYIDI MUKULU

Maweja-Nangila udi uleja Amosa malu musangu muinayi: tshibondu tshia bimuma

¹ Maweja-Nangila Mvidi Mukulu kundeja kabidi tshibondu tshia bimuma bimane kuboba.

² Kungebejaye ne: — Amosa, tshiudi umona ntshinyi? Meme kuandamuna ne: — Ndi mmona tshibondu tshia bimuma bimane kuboba. Ke Maweja-Nangila kunjadikila ne: — Eyowa, bantu banyi bena Izrayele mbamane kuboba! Nshikidilu wabu mmufike! Mbimpe babalumbuluishe! Nembanyoke, tshiyi luse!

³ Meme Maweja-Nangila, ndi njadika ne: dituku dindi mbanyoka, bakaji bimbi ba mu nzubu wa bukalenga, nebadile, bela tusala tua madilu. Bitalu nebikale miaba yonsu, kakuyi udi ubijika. Mu ditunga dijima mudi amu vii vii vii!

Bantu badi bakengeshangana

⁴ Nuenu badi badiatakaja bakengi, nuenu badi bakeba kushipesha bapele mu ditunga, telejayi tshindi ngamba ne:

⁵ Nudi nuebejangana ne: “Bibilu bia ngondu mupiamupia nebijike diba kaayi, bua tumone mua kupana tshiakabidi ntete yetu ya kuenza bukula! Dituku dia Dikisha ki ndijike anyi, bua tumone mua kukangula, biibi bia mayeba etu! Netukepeshe bipimu bia ntete, netubandishe mushinga. Netunyangakaje tshiamu tshia kupima natshi bua tumone mua kudinga bantu.”

⁶ Nudi nusumbisha bantu too ne bisote bia ntete ya kuenza bukula. Bapele ne bakengi nudi nubenza bapika benu, bualu mbapange kufuta dibanza diabu dia mukolu wa bisabata.

⁷ Maweja-Nangila mmuditshipe ne: “Bena Izrayele badi baditambisha bua ditunga diabu, kadi kashidi tshiena mua kupua malu abu mabi muoyi.”

⁸ Ke padi buloba buzakala, bonsu badi basombapu basa muadi. Buloba bujima nebubande, nebupueke, bu mudi musulu wa Nile mu Ejipitu.

⁹ Maweja-Nangila Mvidi Mukulu udi wamba ne: Dituku adi, nembueje diba munda munya, mu munya, buloba nebubuele mu midima.

¹⁰ Nengandamune bibilu bienu bia masanka, bienza matuku a madilu a nuenu kudila. mMisambu inudi nuimba nutshionkomoka, neyandamuke yonsu misambu ya miadi ne mikemu. Nenuvuale bonsu bilamba bikayapale, nenukungule mitu yenu yonsu bu baledi badi mu madilu, badila nsongalume mulela anu umue. Dituku adi nedijike mu tshinyongopelu, mu kanyinganyinga kakole, kakuyi udi unusamba.

¹¹ Maweja-Nangila udi wamba kabidi ne: mu matuku adi kumpala, nentume nzala mu ditunga. Bantu nebafue nzala, kabayi bajinga mampa. Nebafue nyota, kabayi bakeba mayi a kunua. Nebafue nzala ne nyota, bualu nebakebe kumvua tshindi ngamba, bapanga.

¹² Nebalalakane eku ne eku, nebumuke kuinshi mu ditunga, nebaye luseke ludi diba dibuelela, nebende luseke lua ku mutu, bua kupingana luseke ludi diba dipatukila. Nebakebe amu kukeba mua kumvua, muaku wa Maweja-Nangila, kabayi baupeta.

¹³ Dituku adi nansha bansongalume ne bansongakaji, ba mubidi mukole, ne muimpe kabidi, nebafubidile, bafue nyota.

¹⁴ Bonsu badi baditshipa, mu dina dia mvidie ya dishima, ya bena Samariya, bamba ne: “Mu dina dia mvidie Dane udi ne muoyi…” nansha ne: “Mu dina dia njila udi utufikisha ku Bersheba…”, bonsu abu nebadishinde panshi, kabayi mua kujuka kabidi to.