Amosa 6 - MUKANDA WA MYIDI MUKULU

Kanuditambishi

¹ Diakabi ndienu, nuenu bonsu, badi basomba talala pa mukuna wa Siyone, nuenu bonsu badi pa mukuna wa Samariya, bela meji ne: ke patuasomba ku matshi talalaa. Badi banuamba ne: nudi bamfumu ba tshisamba tshidi tshipite bikuabu bionsu bia pa buloba. Bena Izrayele badi banuvuila bua kulomba meji ne lungenyi. Kadi kanudidingi nansha.

² Nuanji kuya ku Kalne, numone bivua bienzekaku. Pashishe nupitshile ku tshimenga tshinene tshia Amate. Nutungunuke too ne ku Ngate, tshimenga tshia bena Peleshete. Nenujadike ne: kanuena nupita makalenga aa nansha, nansha buloba buawu buikale bushadile ku buenu.

³ Nudi nuela meji ne: dituku dia dikenga ditshidi kule. Kadi ku buenzayi buenu, nudi nudisemeja pabuipi.

⁴ Nudi nulala pa malalu malengeja ne mibanga. Nudi nunangila nkuasa minene milenga, nudia munyinyi wa mukoku, nusanka bua munyinyi wa kana ka ngombe ka mafuta.

⁵ Nudi nusaka misambu ne diyi dikole, nuyimba ne lunzenze. Nudi nuidikija Davide, nudienzela biombelu bipiabipia.

⁶ Nudi nunuina maluvu mu makopu manene. Nudi nudilaba pambidi mafuta a dipembu dimpe. Kadi kanuena nunyingalala bua bisamba bia Yozefe, bidi biamba kubutuka.

⁷ Ke pandi nnuambila lelu ne: nenuikale bantu ba kumpala, badibu baye nabu mu bupika. Nanku tshibilu tshienu tshia bena lulengu, tshiasangana kashidi kunyanguka anyi?

Nebabutule Samariya

⁸ Maweja-Nangila, Mvidi Mukulu wa bukole buonsu mmuditshipe ne: “Meme Mvidi Mukulu mulelela, ndi njadika ne: lutambishi lua badi basomba mu bukalenga bua Izrayele ludi lunkuatshisha munyanji. Tshiena musue nzubu yabu milenga. Samariya ne bonsu badi basombamu, ndi mbifila kudi baluishi babu.”

⁹ Mu diku mudi bantu bashale amu dikumi, nebafue.

¹⁰ Muanabu ne bantu bafuila mu nzubu amu neafike bua kupatula bitalu pambelu. Bu muntu mua kuebeja muntu, udi mushale mu tshibambalu tshia munda menemene mua nzubu, ne: “Nutshidi ne muntu mukuabu mu nzubu anyi,” nebamuandamune ne: “To, muntu nansha umue!” Neasakidile ne: “Puwa! Ki ndiba dia kutela Maweja-Nangila.”

¹¹ Dimukayi, bualu: Maweja-Nangila mmuele diyi, nzubu yonsu neyele mitanta, yupuka, minene, nansha mikese.

Mbatshimune misangu ibidi, kakuyi tshia nsongu

¹² Nyama ya tubalu idi mua kunyema lubilu pa mabue anyi? Badi badima mu mbuebue ne bikasu bidi ngombe ikoka anyi? Nudi nuandamuna malu: kulumbuluisha bantu kukadi kubalunga anyi? Kulongolola malu bimpe, kukadi kukengesha bantu bibi!

¹³ Nudi nusanka bua tshimenga tshia tshianana, Lodabare, tshinuvua bakuate. Nudi nuditemba ne: “Ku makanda etu nkayetu ke kutudi bakuatshile Karnayime, tshimenga tshikole tshipite.”

¹⁴ Kadi meme, Maweja-Nangila, Mvidi Mukulu wa bukole buonsu, nennutumine, nuenu bena bukalenga bua Izrayele, tshisamba tshikuabu, bua tshinuluishe biangatshile ku Lebo-Amate ku mutu mu ditunga, too ne ku musulu wa Araba, kuinshi.