Amosa 5 - MUKANDA WA MYIDI MUKULU

Kasala ka madilu: badi badila bena Izrayele

¹ Bena Izrayele, telejayi kasala ka madilu kandi nnuela:

² Izrayele nnsongakaji udi mufue, tshitalu tshiende tshitshidi panshi. Kakujuka kabidi to. Mbamulekele pa buloba buende: muntu nansha umue kena umujula!

³ Bualu Maweja-Nangila udi wamba ne: “Ku bantu tshinunu ba mu tshimenga bavua baye mu mvita, nebapingane amu lukama. Ku bantu lukama ba mu musoku, nebapingane amu dikumi. Nebienzeke nanku mu Izrayele mujima.”

Mutshidi diba dikumbane dia kudilengeja anyi?

⁴ Telejayi tshidi Maweja-Nangila wambila bena Izrayele ne: “Panudi basue kushala ne muoyi, nupingane amu kundi, nungebeje malu.

⁵ Kadi kanunkonki malu mu nzubu wa kutendelela wa Betele. Kanubuedi muaba wa kutendelela wa mu Ngilgale, kanuendi luendu lua tshijila, batangile ku Bersheba nansha. Bualu bena Ngilgale, nebaye nabu mu bupika; Betele, nzubu wa Maweja-Nangila, neashale nzubu wa makenga.”

⁶ Pinganayi kudi Maweja-Nangila, nenupete muoyi. Kanuyi benza nanku, neikale bu kapia kadi kakuata ndelanganyi ya Yozefe. Nekashidishe bidi mu Betele, kakuyi udi mua kujima kapia aku.

⁷ Nudi bena diakabi, nuenu badi banyanga bilumbu, bapisha badi babinga, babingisha badi bapila.

⁸ Uvua muenze mitotu, tshidimina nzaji, mbua-nyama-ne-muntu. Udi ukudimuna midima, uyenza butoke bua mu dinda. Udi wandamuna munya, uwenza butuku. Udi ubikila mayi a mu mayi manene, wapuekesha pa buloba, ulokesha mvula. Dina diende Maweja-Nangila.

⁹ Udi ubutula badi ne bukole, ushimbula bimenga, bivuabu bakolesha ne bimana.

¹⁰ Ku tshilumbuluilu nudi nukina muntu udi unuvuluija munudi mua kukosa nsambu pa yoyi; nudi nutshina bikole udi ujadika malu amu muvuawu menzeke.

¹¹ Nudi nukengesha udi kayi bukole, numunyenga ntete ivuaye munowe. Nanku kanuakulala mu nzubu mipiamipia, inuvua base ne mabue. Kanuakunua maluvu a mvinyo anuvua bapete, ku mionji misunguluke inuvua bakune.

¹² “Meme Maweja-Nangila, ndi mumanye malu mabi onsu anuvua benze. Ndi muvuluke buenzayi buenu bua dikema. Nudi nuluisha udi kayi ne bualu, nuanyisha mabuejila. Ku kabadi, nudi nubenga bua bandumbulula bakose nsambu ya bapele pa yoyi.”

¹³ Tshikondu etshi ntshibi. Ke padi muntu mudimuke upuwa vii.

¹⁴ Enzayi malu mimpe, nubenge bidi bibi. Nanku nenushale ne muoyi. Diba adi Maweja-Nangila, Mvidi Mukulu wa bukole buonsu, neikale nenu menemene, munudi nuamba amu kuamba.

¹⁵ Nulekele malu mabi, nunange bidi bimpe. Nukose nsambu pa yoyi. Bumue Maweja-Nangila, Mvidi Mukulu wa bukole buonsu, neamone mua kufuila bantu ba ndekelu ba ku ndelanganyi ya Yozefe luse.

¹⁶ Maweja-Nangila, Mvidi Mukulu wa bukole buonsu, udi wamba ne: “Miaba yonsu idi bantu batuilangana, nebadile muadi. Mu misesu yonsu nebele mbila ne: ‘Akia! Dikenga bunenedi! Dikenga kaayi edi!’ Nebabikile babidime badi mu misoku, bua bafike mu tshimenga bua kudila mu madilu, bualu bakaji badi ne bua kutendamu muadi, kabena bungi bukumbane.

¹⁷ Nansha mu madimi a mvinyo, nebadile amu kudila, pandi mpitshila munkatshi muenu bua kununyoka. Meme Maweja-Nangila ndi ngamba nanku.”

Dituku dia Maweja-Nangila

¹⁸ Bantu badi batekemena dituku dia Maweja-Nangila, didiye ne bua kudileja patoke, mbena diakabi. Dituku adi nedinulengelele ku tshinyi? — Nekuikale amu midima, butoke kabuyi bumueneka!

¹⁹ Nebikale bu muntu udi unyema nyama wa ntambue, usangila ne nyama mukuabu wa lonji lukole. Udi ubuela mu nzubu, weyamina ku tshimana ne tshianza, ke nyoka kumusuma!

²⁰ Dituku dia Maweja-Nangila nedifike. — Nedikale dia midima, butoke kabuyi bumueneka, nedikale difike fitutuu, kanuyi mua kutekemena bukenke nansha bukese.

Ditendelela dibi

²¹ Maweja-Nangila udi wamba ne: Ndi mbenga bibilu bienu, tshiena musue kubimona kabidi to. Ndi ngumvua muenge, panudi nusangila bua kuntendelela,

²² nansha nundambula milambu ya kuosha. Milambu ya bia pa madimi enu idi imfikila ku muoyi. Tshiena nansha ntangila nyama, inudi nundambula bu milambu ya bobumue.

²³ Umbukayi ku matshi anyi, ne mutoyi wa misambu yenu. Tshiena musue kumvua kabidi muadi wa bisanji bienu.

²⁴ Nukuate mudimu bua bakose nsambu pa yoyi; bua malu mempe adi bantu benzelangana, ikale bu misulu idi yuwula mayi tente, ipasalala, kayiyi ikama dituku nansha dimue.

²⁵ Bena Izrayele bidimu makumi anayi binuvua bendakana mu tshipela, nuvua bandambule nyama ne bia pa madimi enu anyi?

²⁶ Tshikondu atshi, kamuma bambule mpingu ya mvidie yenu, inudi badienzele, inudi nuambula lelu miaba yonsu nansha. Ke lupingu lua mvidie-mukalenga Sakute, ne lua mvidie wa mitotu Kewane!

²⁷ Ke mundi musue kunutuma mu bupika, mutantshi mule ne tshimenga tshia Damase. Meme ndi njadika nanku, Maweja-Nangila, Mvidi Mukulu wa bukole buonsu.