Amosa 1 - MUKANDA WA MYIDI MUKULU

¹ Mu mukanda ewu mbafunde miaku ya Amosa, mumunyi wa nyama, wa mu musoku wa Tekowa. Maweja-Nangila uvua mumumanyishe malu avua atangila bukalenga bua bena Izrayele, bidimu bibidi kumpala kua tshikumina tshinene. Mu tshikondu tshiwa Uziya mukalenga wa bena Yuda, ne Yerobowame, muana wa Yowashe, mukalenga wa bena Izrayele,

² Amosa kuamba ne: Maweja-Nangila udi wakula ne tshiji, ukungula bu ntambue. Diyi diende ndifumine ku mukuna wa Siyone, ku Yerushalayime, muaba udiye usomba. Mpata ya bisosa bivule idi ifuba yonsu. Ku lusongu lua mukuna wa Karmele, nansha metu mene adi uma.

Maweja-Nangila udi ulumbuluisha Izrayele ne bena mutumba (Bena Arame)

³ Teleja tshidi Maweja-Nangila wamba ne: “Ndi ndumbuluisha bena Arame ba mu Damase, mbapisha bua malu mabi mavule, kadi nangananga, bualu mbakengeshe ne lonji lukole, bantu badi basomba mu ditunga dia Ngilaade. Nanku tshiena mua kubafuila luse. Nenkumbaje bindi mujadike ne:

⁴ Nengoshe nzubu wa mukalenga Azayele, kabidi ne nzubu munene wa mukalenga Benadade.

⁵ Nentshibule mabaya adibu bapayika nawu biibi bia mu tshimenga tshia Damase. Nenshipeshe bantu badi basombamu, kabidi ne mukalenga wa tshimenga tshia buenzayi atshi, mulombodi wa musoku wa masanka mabi awu. Bena Arame badi basomba mu ditunga, nebaye nabu mu bupika ku Kire. Meme Maweja-Nangila, ndi njadika nanku.”

(Bena Peleshete)

⁶ Teleja tshidi Maweja-Nangila wamba ne: “Ndi ndumbuluisha bena Peleshete ba mu Ngaza, mbapishe bua malu mabi mavule, kadi nangananga, bualu mbakuate bantu bonsu mu misoku mivule, baye nabu, babasumbishe mu bupika kudi bena Edome. Nanku tshiena mua kubafuila luse! Nenkumbaje bindi mujadike ne:

⁷ Nengoshe tshimenga tshia Ngaza, kapia nekashidishe nzubu yatshi mimpe.

⁸ Nenshipeshe mukalenga wa mu Asdode. Nenduishe mukalenga wa mu Askalone. Nenduishe bikole badi basomba mu Ekrone. Bena Peleshete bonsu nebafue. Meme Maweja-Nangila ndi njadika nanku.”

(Bena Fenisiya)

⁹ Telejayi tshidi Maweja-Nangila wamba ne: “Ndi ndumbuluisha bena Fenisiya ba mu Tire, mbapisha bua malu mabi mavule, kadi nangananga, bualu kabavua bavuluka ndondu uvuabu batue ne bena Izrayele. Mu misoku mivule mbakuate bantu bonsu, baye nabu, babasumbishe kudi bena Edome. Nanku tshiena mua kubafuila luse! Nenkumbaje bindi mujadike ne:

¹⁰ Nengoshe tshimenga tshia Tire, kapia nekashidishe nzubu yatshi mimpe.”

(Bena Edome)

¹¹ Teleja tshidi Maweja-Nangila wamba ne: “Ndi ndumbuluisha bena Edome, mbapisha bua malu mabi mavule, kadi nangananga, bualu bavua balondakaja, ne muele wa mvita mu bianza, bana babu bena Izrayele. Kabavua ne luse nansha lua kana. Bavua balamina bana babu lukuna kashidi, babafikila munda, bakeba kubabutula. Nanku tshiena mua kubafuila luse! Nenkumbaje bindi mujadike ne:

¹² Nengoshe tshimenga tshia Temane. Kapia nekashidishe nzubu mimpe idi mu Bosra.”

(Bena Amone)

¹³ Teleja tshidi Maweja-Nangila wamba ne: “Ndi ndumbuluisha bena Amone, mbapisha bua malu mabi mavule, kadi nangananga, bualu mu mvita ivuabu baluangana mu ditunga dia Ngilaade, bua kutentamuna mikalu ya buloba buabu, bakapanda mafu a bakaji bavua nawu. Nanku tshiena mua kubafuila luse nansha! Nenkumbaje bindi mujadike ne:

¹⁴ Nengoshe tshimenga tshiabu tshia Raba. Kapia nekashidishe nzubu yatshi mimpe. Dituku adi, nebele mbila ya mvita, mikole bu tshiona tshia lupepele lua mvunde.

¹⁵ Mukalenga ne bamfumu bende bonsu, nebabakuate, baye nabu mu bupika. Meme Maweja-Nangila ndi njadika nanku.”