Agayi 2 - MUKANDA WA MYIDI MUKULU

Buimpe bua nzubu mupiamupia wa Mvidi Mukulu

¹ Mu matuku makumi abidi ne dimue a ngondu wa muanda mutekete, wa tshidimu tshibidi tshia bukalenga bua Daryaveshe, Maweja-Nangila kutuma muambi Agayi tshiakabidi.

² Uvua mumutume kudi mulombodi wa buloba bua bena Yuda, Zerubabele, muana wa Sheyaltiyele, kudi mutuangaji munene Yeshuwa, muana wa Yoshadake, ne kudi bantu bonsu bavua bumuke mu bupika, bua kubakonka ne:

³ — Nganyi wa munkatshi muenu uvua mumone buimpe buvua nabu nzubu wa Mvidi Mukulu wa kale, pavuabu kabayi banji kumunyanga? Kadi tshinudi bamone lelu ntshinyi? Nzubu kena kabidi ne lumu nansha kakese.

⁴ Meme Maweja-Nangila ndi nnuambila ne: Wewe Zerubabele, wewe Yeshuwa mutuangaji munene, muana wa Yoshadake, ne nuenu bena ditunga bonsu, koleshayi muoyi, tuadijayi mudimu. Meme Maweja-Nangila wa bukole buonsu, ndi nnulaya ne: nengikale nenu.

⁵ Panuvua bapatuke mu Ejipitu, mvua munulaye bua kuikala munkatshi muenu. Kanutshinyi to.

⁶ Eyowa, meme Maweja-Nangila wa bukole buonsu, ndi ngamba ne: matuku makese aa, nenzakeje bia mulu ne bia panshi, mayi manene ne buloba.

⁷ Nenkuatshishe bantu ba bisamba bikuabu bowa. Nanku, nebafike ne bubanji buabu buonsu munemu. Nendengeje nzubu ewu muende mua kale ne bubanji abu. Meme Maweja-Nangila, ndi ngamba nanku.

⁸ Bualu tshiamu tshitoke tshia mushinga mukole, ne tshiamu tshia mpawungi, bia pa buloba bujima mbianyi meme.

⁹ Nanku nzubu mupiamupia wanyi ewu, neikale muimpe mupite wa kale. Kabidi nempeshe bantu banyi ditalala mu nzubu ewu. Meme Maweja-Nangila wa bukole buonsu, ndi ngamba nanku.

Bantu badi ne mikiya

¹⁰ Mu matuku makumi abidi ne anayi a ngondu wa tshitema, wa tshidimu tshibidi tshia bukalenga bua Daryaveshe, Maweja-Nangila wa bukole buonsu kuambila muambi Agayi tshiakabidi ne:

¹¹ — Konka batuangaji bualu ebu:

¹² Tuteke tshilejilu: muntu muambuile munyinyi wa ku mulambu mu tshilamba tshiende, tshilamba atshi kulenga ku diampa, ku biseki, ku maluvu, ku mafuta, nansha ku tshiakudia tshikuabu, biakudia bionsu abi bidi bienza bia tshijila anyi? Batuangaji kuandamuna Agayi ne: — Nansha kakese.

¹³ Agayi kubakonka kabidi ne: — Tutoke tshilejilu tshikuabu: muntu mulenge tshitalu, udi upia mikiya. Kadi palengaye pashishe tshiakudia, tshiakudia atshi netshikale kabidi ne mikiya anyi? Batuangaji kuitaba ne: — Eyowa.

¹⁴ Agayi kubambila ne: — Telejayi tshidi Maweja-Nangila wamba: ke mudi bantu ba mu ditunga emu bapia mikiya. Nanku bionsu bidibu bapeta ku mudimu wa bianza biabu, ne bionsu bidibu bandambuila pa tshilambuilu, mbipie amu mikiya.

Butumike budi bukuama bimuma

¹⁵ Maweja-Nangila kuamba kabidi ne: — Vulukayi bivua bienzeke ku kale. Kanuyi banji kukunguja mabue bua kuibakulula nzubu wanyi,

¹⁶ makenga avua manukuate. Pavua muntu uya ku diyeba, bua kuangata bibombi makumi abidi bia ntete ya kuenza bukula, uvua upeta amu bibombi dikumi. Pavua muntu uya ku tshipanza tshia maluvu a nwinyo, bua kupongolola milangi makumi atanu, uvua amu upongolola milangi mukumi abidi.

¹⁷ Meme kunyanga biakudia bionsu bia mu madimi enu: meme kukumisha, kubibolesha, kubinyangakaja ne mabue a mvula. Kadi kanuena bapingane kundi meme Maweja-Nangila to.

¹⁸ Tangilayi bimpe tshidi tshienzeka mpindiewu. Lelu matuku makumi abidi ne anayi a ngondu wa tshitema, bavua bibake tshitaku tshia nzubu wa Mvidi Mukulu. Nuvuluke dituku edi bimpe.

¹⁹ Mu mayeba enu kanutshiena ntete ya kuenza bukula to. Mionji yenu ya nwinyo, mitshi ya mfiku, mitshi ya ngrenade, mitshi ya olive, kabivua bikuama to. Kadi biangatshile dituku dia lelu, nennusankishe. Mitshi yenu neakuame.

Maweja-Nangila udi usungula Zerubabele

²⁰ Amu dituku adi dia makumi abidi ne anayi a ngondu wa tshitema, Maweja-Nangila kuyukila ne Agayi tshiakabidi.

²¹ Kumutumaye kudi mulombodi wa buloba bua bena Yuda, diende Zerubabele, muana wa Sheyaltiyele, bua kumuambila ne: — Meme Maweja-Nangila wa bukole buonsu, nenzakeje diulu ne buloba.

²² Nengumushe bakalenga mu nkuasa yabu. Nenshipe makalenga pa buloba. Nentonkole matempu a nwita, ne badi baendesha. Nyama ya tubalu neyifue. Badi babandapu nebakuluke, bafue ku miele yabu.

²³ Dituku adi, wewe Zerubabele, muntu wanyi, newikale ne mushinga, bu mudi tshitampi tshianyi nawu. Bualu ndi mukusungule, bua wikale muenampala wanyi. Meme Maweja-Nangila, ndi ngamba nanku.