3 Yone 1 - MUKANDA WA MYIDI MUKULU

Diela dia muoyi

¹ Meme Mukulu, ndi mfundila Ngayuse wanyi, undi mupite kunanga, mukanda ewu.

² Mulunda wanyi, ndi njinga ne: wikale bimpe mu bionsu, wikale kabidi ne bukole bua mubidi, mudi muoyi webe wa munda nabu.

³ Mvua ne disanka divule, pavua bana hetu bafike, banjadikile ne: Ngayuse udi witaba bulelela, ulonda kabidi njila wa bulelela matuku onsu.

⁴ Tshidi tshipite kunsankisha, mpandi ngumvua ne: bana banyi badi benda mu njila wa bulelela.

Ngayuse mmuntu wa diyi dimue

⁵ Mulunda wanyi, biudi wenzela bana hetu, too ne benyi kabidi, bidi bileja muudi muntu wa diyi dimue.

⁶ Bavua bamanyishe Tshisumbu tshietu tshia bena ditaba, muudi unanga bana hetu. Nanku ndi nkulonda ne: ubambuluishe, bua bamone mua kutungunuka ne luendu luabu, mushindu udi mua kusankisha Mvidi Mukulu.

⁷ Bualu badi benza luendu lua kukuatshila Kristu mudimu, babenga diambuluisha dia bantu badi kabayi bena ditaba.

⁸ Nunku tuetu, bena ditaba, tudi ne bua kuambuluisha bantu ba mushindu ewu, bua tudisange nabu mu mudimu wabu wa kumanyisha bantu bulelela.

Diyotrefeze ne Demetriyose

⁹ Nkadi mufundile Tshisumbu tshia bena ditaba miaku mikese. Kadi Diyotrefeze, udi musue kuikala mfumuabu, udi ulengulula bindi ngamba.

¹⁰ Nanku pandi mfika, ne mmanyishe patoke malu mabi onsu adiye wenza, miaku mibi idiye untamba, ne malu adiye utushiminyina. Ku bilema ebi udi usakidila kabidi tshikuabu: kena wakidila bena ditaba badi batutantshila. Udi ukandika kabidi badi basue kubakidila, ukeba kubipata mu Tshisumbu tshia bena ditaba.

¹¹ Mulunda wanyi, kuidikiji bualu budi bubi, kadi idikija amu malu mimpe. Muntu udi wenza malu mimpe, udi wa Mvidi Mukulu. Udi wenza bibi, kena muanji kumona Mvidi Mukulu.

¹² Bonsu badi banyisha Demetriyose. Bulelela mene budi bumubingisha Tuetu kabidi tudi tujadika buimpe bua malu ende. Wewe kabidi udi mumanye ne: bitudi tujadika mbilelela

Mioyi ya ndekelu

¹³ Ndi ne malu a bungi a kunuambila. Kadi tshiena musue kukufundilawu ne kasala ka mayi a mukanda.

¹⁴ Ndi ntekemena kumonangana nebe pa lukasa. Nanku netuyukidilangane nebe mpala ne mpala

¹⁵ Wikale ne ditalala. Balunda bebe badi bakuela muoyi. Elaku balunda hetu muoyi ku muntu ku muntu.