2 Timote 3 - MUKANDA WA MYIDI MUKULU

Matuku a ku nshikidilu

¹ Uvuluke bimpe ne: mu matuku a nshikidilu nemuikale dikenga dikole.

² Bualu bantu nebadinange. Nebanange bubanji. Nebaditembe, baditambisha, bapenda Mvidi Mukulu. Nebatombokele baledi babu. Kabakuvuluka kabidi bantu bavua babenzele bimpe. Kabakunemeka bidi bia tshijila.

³ Nebikale bantu ba malu makole, kabayi ne luse. Nebikale bena bijanu, bena tshikisu, bena lonji, baluishi ba bantu badi benza bimpe.

⁴ Nebelangane bifufu bibi. Nebikale bantu ba tshiiji, bena lutambishi luvule. Nebanange milowu, pa mutu pa kunanga Mvidi Mukulu.

⁵ Nebamueneke ku mesu bu bantu badi bitaba Mvidi Mukulu, kadi mundamunda muabu kabayi bamanye bukole bua badi bamuitaba. Nanku umuke kudi bantu abu!

⁶ Bamue ba kudibu badi babuela mu nzubu ya bende, batekesha bakaji bena bitabataba, badi banyingalala bua mibi ivuabu benze kale, batua eku ne eku ne majinga a mishindu yonsu.

⁷ Bakaji abu badi bananga kulonga malu, kadi kabena ne mushindu wa kumanya bulelela.

⁸ Bu muvua Yanese ne Yambrese batombokele Moshe, ke mudi bantu abu babenga bulelela. Lungenyi lua bantu abu ndunyanguke. Ditaba diabu didi patupu.

⁹ Kadi kabakuya muaba mule to. Bualu bantu bonsu nebajingulule ne: bantu aba mbatatakane. Ke muvuabu bajandule kale butatakana bua Yanese ne Yambrese nanku.

Mibelu ya ndekelu

¹⁰ Kadi wewe uvua mundonde mu bimvua ndongesha, mu bimvua ngenza, kabidi ne mu bimvua ngipatshila. Uvua muidikije ditaba dianyi, lutuulu banyi, dinanga dianyi, muoyi mukole umvua nawu.

¹¹ Tuvua nebe diba dimvua nsama, diba divuabu bankengesha. Udi mumanye bionsu bivua bingenzekele mu Antiyokiya, mu Ikoniyume, ne mu Listra. Bavua bankengeshe bikole, kadi Mfumu uvua munsungidile ku bionsu.

¹² Bantu bonsu badi basue kuitaba Mvidi Mukulu ne muoyi umue, kudisanga ne Yezu Kristu, nebabakengeshe.

¹³ Kadi bantu babi ne bena dishima nebatungunuke amu kutungunuka ne dienza bibi. Nebashimangane. Bantu bakuabu nebabashime.

¹⁴ Kadi wewe, vuluka amu bimpe bivuabu bakulongeshe, biuvua muitabe, mujadike. Udi mumanye kabidi bavua bakulongeshabi.

¹⁵ Bualu bituadije ku buana buebe, udi mumanye Mikanda ya tshijila, idi mua kukupa meji adi mua kukufikisha ku lupandu, paudi witaba Yezu Kristu.

¹⁶ Bualu bionsu bidi mu Mikanda ya tshijila mbabifunde ne meji a Mvidi Mukulu. Bidi biambuluisha bua kulongesha bulelela, kubenga ntupakanyi, kulengeja bilema, kufikisha bantu ku nsombelu muimpe.

¹⁷ Ke mudi muntu wa Mvidi Mukulu mua kumanya bimpe mudimu udiye ne bua kukuata. Neikale kabidi ne bionsu bidiye ukengela bua kuenza nabi mudimu awu.