2 Kulondolola 3 - MUKANDA WA MYIDI MUKULU

Diibaka dia nzubu wa Mvidi Mukulu

¹ Shelomu kutuadija kuibaka nzubu wa Maweja-Nangila mu Yerushalayime pa mukuna wa Moriya, muaba uvua Maweja-Nangila mumuenekele tatuende Davide. Davide uvua mumane kulongolola muaba awu, uvua Ornane muena Yebusa ushipuila ntete ya kuenza bukula.

² Shelomu mumane kushala mu bukalenga bidimu binayi, kutuadijaye kuibakisha nzubu wa Mvidi Mukulu mu ngondu muibidi.

³ Bunene bua nzubu wa Mvidi Mukulu uvua Shelomu muibakishe buvua mushindu ewu: metre makumi asatu mu bule, ne metre dikumi mu butshiama.

⁴ Mushiku wa mbelu wa kumpala kua nzubu wa Mvidi Mukulu uvua ne metre dikumi mu butshiama, bilondeshile butshiama bua nzubu wa Mvidi Mukulu, metre makumi asambombu mu butumbuke. Bavua balamika tshiamu tshia mpawungi menemene munda mua nzubu wa Mvidi Mukulu muonsu.

⁵ Ku bimana bia mu tshibambalu tshinene bavua balamikaku mabaya a mutshi wa pin, malamika tshiamu tshia mpawungi menemene. Bavua bazola pa mabaya apa malala a mabue ne nkanu ya majitamajita.

⁶ Bavua balengeja kabidi tshibambalu atshi ne mabue a mushinga mukole. Tshiamu tshia mpawungi tshivuabu benza natshi mudimu mu tshibambalu amu tshivua tshifumina ku Parvayime.

⁷ Bavua balamika tshiamu tshia mpawungi ku mikamba ya ku nzubu, ku mabue a ku tshibuelelu panshi, ku bimana, ne ku biibi bia tshibambalu. Bavua bazola ne biamu ku bimana bimfuanyi bia bakerubine.

⁸ Bavua bibaka tshibambalu tshikuabu tshivuabu binyika ne: “Muaba wa tshijila menemene’”. Tshibambalu atshi, tshivua ne metre dikumi mu butshiama, bilondeshile butshiama bua nzubu wa Mvidi Mukulu, ne metre dikumi mu bule. Munda mua nzubu amu, bavua balamika kilo binunu makumi abidi bia tshiamu tshia mpawungi.

⁹ Misumadi ya tshiamu tshia mpawungi ivuabu benza nayi mudimu ivua ne bujitu bua grame nkama itanu. Nansha bibambalu bia kulu bia munda mua nzubu wa Mvidi Mukulu bivua bilamika amu tshiamu tshia mpawungi.

¹⁰ Pashishe bavua bafula bakerubine babidi ne tshiamu tshiengulula. Bavua babalamika tshiamu tshia mapwungi, babateka muaba wa tshijila menemene.

^11-13 Bakerubine abu bavua bimane kulu, ewu ku luseke, mukuabu ku luseke, mitu nutangile ku mushiku wa mbelu. Yonsu wa kudibu uvua ne mapuapua abidi molola, mikale ne metre abidi ne tshitupa. Dipuapua dimue divua dilengangana ne tshimana tshia tshibambalu, dikuabu divua dilengangana ne dia mukerubine mukuabu. Nanku, mapuapua anayi a bakerubine avua mololoke bule bua metre dikumi.

¹⁴ Bavua batela kabidi tshilamba tshia buanda bua ndanda tshia kulembeleja mu mushiku wa mbelu. Tshilamba atshi tshivua mekala mashilangane: tshifikuluke, tshikunze ne tshikunzubile. Bavua bazolaku bimfuanyi bia bakerubine.

Makunji a tshiamu tshikunze ne tshilambuilu

¹⁵ Kuenzabu makunji abidi mikale ne metre dikumi ne muanda mutekete mu bule, a kuasa kumpala kua nzubu wa Mvidi Mukulu. Ku mutu kua dikunji dionsu, kuvua mutu wa dikunji, muikale ne metre abidi ne tshitupa mu bule.

¹⁶ Kuenzabu nkanu ya majitamajita bua kuteka ku mutu wa dikunji. Pashishe, kuenzabu bimfuanyikijilu lukama bia bimuma bia ngrenade bua kubilembeleja ku nkanu aku.

¹⁷ Kuasabu makunji abidi aa ku tshibuelelu tshia muaba wa tshijila, edi ku dia balume, edi ku dia bakaji dia mushiku wa mbelu. Dikunji divua ku dia balume bavua badinyika ne: “Yakine,” mmumue ne: “Mvidi Mukulu ngudi ushindika.” Dikunji divua ku dia bakaji bavua badinyika ne: “Bowaze,” mmumue ne: “Mvidi Mukulu ke bukole.”