2 Kulondolola 23 - MUKANDA WA MYIDI MUKULU

Badi bajidila Yowashe bua ikale mukalenga

¹ Tshidimu tshia muanda mutekete tshivua Atalya mu bukalenga, mutuangaji Yoyada kuleja bukitu buende. Kutuaye ndondu ne balombodi ba bena mvita aba: Azariya, muana wa Yerowame; Ismayele, muana wa Yowanane; Azariya, muana wa Obede; Masheya, muana wa Adaya; ne Elishafate, muana wa Zikri.

² Bantu aba bavua bendakana miaba yonsu mu bukalenga bua bena Yuda. Mu bimenga bionsu, bavua babikila bena Levi ne balombodi ba meku a bena Izrayele, pashishe kupinganabu nabu bonsu mu Yerushalayime.

³ Bantu bonsu aba, bamane kusangila mu nzubu wa Mvidi Mukulu, kutuabu ndondu mu dina dia mukalenga Yowashe. Yoyada kubambila ne: — Monayi Yowashe, muana wa mukalenga! Yeye ke udi ne bua kushala mukalenga, bilondeshile muvua Maweja-Nangila mulaye bua ndelanganyi ya Davide.

⁴ Nanku, enzayi mushindu ewu. Padi batuangaji ne bena Levi batuadija kuenza mudimu dituku dia Dikisha, tshisumbu tshia kumpala netshilame mishiku ya nzubu wa Mvidi Mukulu.

⁵ Tshisumbu tshibidi netshilame nzubu wa bukalenga. Tshisumbu tshisatu netshilame tshiibi tshia ku Tshitaku tshia nzubu. Bantu bonsu nebimane mu lupangu lua ku nzubu wa Mvidi Mukulu.

⁶ Muntu kena mua kubuela mu nzubu wa Maweja-Nangila to. Anu batuangaji ne bena Levi badi benza mudimu, ke badi mua kubuela, bualu mbantu bajidila. Nanku bantu bakuabu bonsu badi mua kunemeka mikenji ya Maweja-Nangila ayi.

⁷ Bena Levi bakuabu nebele mukalenga munkatshi, bikale ne bia mvita mu bianza. Nebendakane nende miaba yonsu. Muntu mukuabu udi ukeba mua kubuela mu nzubu wa Mvidi Mukulu nebamushipe.

⁸ Bena Levi ne bena Yuda bonsu kuenzabu muvua mutuangaji Yoyada mubafundile. Mfumu yonsu kusangisha bantu bende, nansha bavua batuadija mudimu dituku dia Dikisha, nansha bavua baujikija dituku adi. Bualu mutuangaji Yoyada kavua muanyishe bua tshisumbu nansha tshimue tshikishe dituku adi to.

⁹ Yoyada kupesha balombodi ba bena mvita mafuma ne ngabu mishilangane bivua bia mukalenga Davide, bivuabu bateke mu nzubu wa Mvidi Mukulu.

¹⁰ Kuimanyikaye bantu bonsu, ne difuma mu bianza, benza mu tshitangu, biangatshile mu ditumba dia kuinshi dia nzubu wa Mvidi Mukulu too ne ku ditumba dia ku mutu, luseke ludi diba dipatukila lua nzubu. Nanku, bavua bimane kumpala kua nzubu wa Mvidi Mukulu ne kua tshilambuilu, bamane kudilongolola bua kulama mukalenga Yowashe nseke yonsu.

¹¹ Pashishe, mutuangaji Yoyada kupatula Yowashe, kumuasa tshifulu tshia bukalenga, kumupesha mukanda wa ndondu. Ke Yoyada ne bana bende ba balume, kuela Yowashe mafuta pa mutu bua kumujidila mu bukalenga. Nanku bantu bonsu kuela mbila, bamba ne: “Mukalenga Yowashe akuate ku mundundu!”

¹² Pavua Atalya mumvue mutoyi wa bantu bavua benda batumbisha mukalenga, kuyaye kudi bantu abu mu nzubu wa Maweja-Nangila.

¹³ Kumonaye mukalenga mupiamupia, muimane kulu pabuipi ne dikunji divua ku mushiku wa nzubu wa Maweja-Nangila. Balombodi ba bena mvita ne bedi ba mpungi, bavua bimane pabuipi nende. Bantu bonsu bavua ne disanka. Bamue bavua bela mpungi, bakuabu bimba bisanji, balombola misambu. Nanku, Atalya kupanda bilamba biende, wela mbila ne: — Mbangelele tshifufu! Mbangelele tshifufu!

¹⁴ Yoyada kavua musue bua bashipele Atalya mu nzubu wa Mvidi Mukulu to. Ke pawaye ubikidisha balombodi ba bena mvita, ubambila ne: — Nupatuke nende, nuenu bamulame. Muntu yeye munutonde, numushipe.

¹⁵ Kuyabu ne Atalya luseke lua ku nzubu wa bukalenga. Bafike nende ku tshiibi tshia nyama ya Tubalu, kumushipabu.

¹⁶ Mutuangaji Yoyada kutua ndondu, pamue ne mukalenga Yowashe, kabidi ne bena Izrayele bonsu, bua bonsu bikale tshiakabidi bantu ba Maweja-Nangila.

¹⁷ Nanku, kuyabu mu nzubu wa Baale. Kupulabu nzubu awu. Kunyangakajabu bilambuilu ne mpingu bivuamu. Kushipabu Matane, mutuangaji wa mvidie Baale, kumpala kua tshilambuilu.

¹⁸ Pashishe, Yoyada kuteka batuangaji ba bena Levi, bua balame nzubu wa Maweja-Nangila. Davide uvua mubatapulule mu bisumbu bua kulambulabu milambu ya kuosha mu nzubu wa Maweja-Nangila, bilondeshile bivuabu bafunde mu mikenji ya Moshe. Uvua mubafundile bua kulambulabu milambu eyi, bikale kabidi bimba misambu ya disanka.

¹⁹ Yoyada uvua muteke kabidi bantu bua balame biibi bia ku nzubu wa Mvidi Mukulu, bua kababuedimu kudi muntu udi mupie mikiya.

²⁰ Yoyada kusangisha kabidi balombodi ba bena mvita, bamfumu ne balombodi ba ditunga, pamue ne bantu bonsu. Kupatukabu ne mukalenga mu nzubu wa Mvidi Mukulu, kuya nende mu nzubu wa bukalenga, bapitshila ku tshiibi tshia kulu. Pavuabu babanjija Yowashe mu nkuasa wa bukalenga,

²¹ bantu bonsu bavua basanka. Bamane kushipa Atalya, mu tshimenga kushalamu talalaa.