2 Kulondolola 10 - MUKANDA WA MYIDI MUKULU

MALU A BAKALENGA BA YUDA Tshisangilu tshia ku Shekeme

¹ Robowame kuya ku Shekeme, bualu ke muaba uvua bisamba bionsu bia bena Izrayele bia ku mutu mu ditunga, bisangile bua kumubanjija mu bukalenga.

² Yerobowame, muana wa Nebate, uvua munyemene mu Ejipitu, mutshine mukalenga Shelomu. Yerobowame kumvua lumu lua tshisangilu tshia Shekeme. Ke kumukaye mu Ejipitu, kupingana kuabu.

³ Nanku, kumutuminabu bantu bua kumubikila. Ke Yerobowame kudisangisha ne bisamba bia bena Izrayele bia ku mutu mu ditunga. Kuambilabu Robowame ne:

⁴ — Tatuebe uvua unkengesha bu bapika. Mpindiewu, wewe mutukepeshile dikenga edi, didi ditutonda bu mutshi wa kuambula nawu bujitu pa makaya, netukuenzele mudimu.

⁵ Robowame kuandamuna ne: — Papita matuku asatu, nupingane kabidi bua kumonangana nanyi. Bantu bonsu kutangalaka.

⁶ Mukalenga Robowame kukonka lungenyi kudi bakulu bavua tatuende Shelomu wenza nabu mudimu, patshivuaye ne muoyi. Robowame kubakonka ne: — Nudi numpeshaku lungenyi kaayi bua meme kuandamuna bantu aba?

⁷ Bakulu kumuandamuna ne: — Wewe mubaleje muudi munange bantu bebe, muudi muntu wa bantu, muanyishe tshidibu balombe, nebikale bena mudimu bebe kashidi.

⁸ Kadi, mukalenga Robowame kubenga lungenyi lua bakulu alu. Kukonkaye lungenyi kudi bansongalume, bena mulongu nende, bavuaye wenda nabu.

⁹ Kubakonkaye ne: — Bena Izrayele badi bajinga bua meme kubakepeshila dikenga divuabu babakengesha kudi tatu wanyi Shelomu. Bualu dikenga adi ndimane kubatonda bu mudi mutshi wa kuambula nawu bintu utonda. Kadi nuenu nudi numpesha lungenyi kaayi bua meme kubandamuna?

¹⁰ Bansongalume bena mulongu nende kuandamuna ne: — Bantu aba badi banyingalala, bualu tatuebe Shelomu uvua ubakengesha bu bapika. Kabidi badi bakulomba bua wewe kubakepeshila dikenga edi. Nanku ubandamune mushindu ewu: “Munu wanyi wa kantengenene mmunene mupite diboku dia tatu wanyi.

¹¹ Tatu wanyi uvua munuambuishe bujitu bupite. Meme nemvudije bujitu buenu bikole bipite. Tatu wanyi uvua ununyoka ne mikaba. Kadi meme nennunyoke ne mikaba idi ne biamu ku nsongu.”

¹² Matuku asatu akumbana, Yerobowame ne bena Izrayele bonsu kuya kudi Robowame bu muvuaye mubalaye.

¹³ Mukalenga Robowame mumane kubenga lungenyi luwabu bamupesha kudi bakulu, kuandamunaye bena Izrayele ne meyi atapa ku matshi,

¹⁴ bilondeshile lungenyi luvuaye mupete kudi bansongalume, bena mulongu nende. Robowame kuambila bena Izrayele ne: — Nennuambuishe bujitu bunene bupite, nensakidile amu kusakidila bujitu pa bujitu. Tatu wanyi uvua unukumisha mikaba, kadi meme nennukumishe mikaba idi ne biamu ku nsongu.

¹⁵ Nanku, mukalenga Robowame kavua muitabe dilomba dia bena Izrayele to. Maweja-Nangila Mvidi Mukulu ke uvua muenzeje bionsu abi, bua kukumbaja bualu bu-vuaye mumane kuambila muambi Akiya ku Silo, bua amanyishe Yerobowame, muana wa Nebate.

Bukalenga budi bupanduluka. Robowame udi ushala mukalenga wa bena Yuda

¹⁶ Bena Izrayele ba ku mutu wa ditunga bamane kumvua ne: mukalenga Robowame kena muitabe dilomba diabu, kumuambilabu ne: — Davide katuena nende bualu to. Katuena basangisha tshintu ne muana wa Ishayi ewu to! Bena Izrayele, jukayi, tupingane kuetu, wewe, muntu wa ku ndelanganyi ya Davide, angataku bukalenga buebe! Bena Izrayele kumuka muaba awu.

¹⁷ Robowame kushala amu mukalenga wa bantu bavua mu buloba bua bena Yuda.

¹⁸ Pashishe, kutumaye Adorame, mulombodi wa midimu ya kulongolola ditunga, kudi bena Izrayele bavua ku mutu wa ditunga. Kadi bena Izrayele kuasa Adorame mabue, kumushipa. Nanku, Robowame kubanda lubilu mu ditempu diende dia mvita, kunyema, kuya ku Yerushalayime.

¹⁹ Ke muvua bisamba bia bena Izrayele bia ku mutu wa ditunga, bibenga bumfumu bua bena nzubu wa Davide nanku. Bisamba ebi bitshidi amu bibubenga ne mpindiewu.