2 Korente 8 - MUKANDA WA MYIDI MUKULU

Kufila bintu ne muoyi wa kalolu

¹ Bana hetu, tudi tujinga bua numanye muvua dinanga dia Mvidi Mukulu dikuate mudimu mu Bisumbu bia bena ditaba ba mu Masedoniya.

² Makenga a bungi avua makuate bena ditaba aba, abateta. Kadi bavua amu ne disanka dipite. Ke muyuabu bafile bintu ne kalolu, nansha bobu mene nabi bikese.

³ Ndi nnujadikila ne: bayua bafile bilondeshile dimona diabu, badipitshishe mene.

⁴ Bayua batusengelela amu kutusengelela bikole bua tuitabe bua basangishe bintu bia kuambuluisha nabi bena ditaba ba mu Yudeya,

⁵ Bayua benze bipite ne patuvua batekemene. Bayua badianze kudifila kudi Mfumu. Pashishe bayua badifile kabidi kutudi, bua bamone mua kuitaba bidi Mvidi Mukulu musue.

⁶ Ke patuvua basengelele Tite, bua apingane kuenu aku, atungunuke ne mudimu uvuaye mushile mu njila, bua nujikije mudimu ewu ne muoyi wa kalolu.

⁷ Nudi babanji mu bionsu: mu ditaba, mu dipa dia kuakula, mu dimanya dia malu, mu disuminyina dia mishindu yonsu, mu dinanga dinudi batunange nadi. Ke mutudi basue bua nudileje kabidi babanji mu dienza dia mudimu ewu wa kalolu.

⁸ Tshiena nnuelela mukenji. Kadi ndi nnusonsola, nnuleja muvua bakuabu bakuata mudimu ne disuminyina, bua nuleje kabidi patoke munudi nunanga bantu.

⁹ Bualu nudi bamanye dinanga divua Mfumu wetu Yezu Kristu mutuleje. Uvua ne biuma, kadi mmudienze mupele bualu buenu, bua kununemesha ku bupele buende.

¹⁰ Nanku ndi mfila meji mu bualu ebu: bidi bimpe bua nutungunuke ne binuvua bashile mu njila tshidimu tshishale. Nuvua ba kumpala bua kubanga mudimu awu, ba kumpala kabidi bua kuwelela meji.

¹¹ Tungunukayi nawu mpindiewu, nuujikije. Disuminyina dinuvua nadi pa kubanga mudimu awu, nuikale kabidi nadi pa kuujikija. Nufile binudi nabi.

¹² Panudi nufila ne muoyi wa kalolu, Mvidi Mukulu neapime binudi nufila bilondeshile binudi nabi; kakubipima bilondeshile binudi kanuyi nabi.

¹³ Katuena basue kunubueja mu dikenga, bua tumone kua kuambuluisha bakuabu. Kadi mbimpe bonsu bikale ne bintu bungi bua momumue.

¹⁴ Matuku aa nudi ne bintu bipite bungi. Ke munudi mua kuambuluisha badi mu dikenga. Nanku, dituku dinudi nubuela mu dikenga, nebanuambuluishe kabidi, padi bintu biabu bimane kuvulangana. Ke mutudi mua kuikala ne bintu bungi bua momumue.

¹⁵ Ke muvua Mukanda wa tshijila wamba ne: “Uvua muangule bintu bipite, kavua ushala nabi bipite bungi. Uvua muangule bikese, kavua ubula tshintu.”

Tite ne badiye wenda nabu

¹⁶ Tudi tuela Mvidi Mukulu tuasakidila, bualu uvua mupeshe Tite disuminyina bualu buenu ditudi tuetu kabidi nadi!

¹⁷ Uvua muanyishe bituvua balombe. Tuambe ne: bu muvuaye ne disuminyina divule, mmudijadikile nkayende bua kufika kuenu.

¹⁸ Tudi tumutuma pamue ne muanetu udibu banyisha mu Bisumbu bionsu bia bena ditaba, bua mudimu wa kulongesha Lumu lua Disanka udiye ukuata.

¹⁹ Bena ditaba kabidi bayua bamusungule bua kutufilaye ku luendu, bua atuambuluishe mu mudimu ewu wa kalolu utudi tukuata, bua kutumbisha Mfumu, kabidi bua kuleja mutudi basue kuambuluisha bakuabu.

²⁰ Tudi basue kuepela bijanu bidibu mua kutujana pa mushindu utudi tuenza mudimu ne bintu bivule ebi.

²¹ Tudi tukeba kuenza ki ngamu bidi Mfumu mua kuanyisha, kadi kabidi bidi bantu mua kuanyisha.

²² Tudi tubatuma ne muanetu mukuabu, utuvua bamane kuteta misangu ya bungi. Tuetu kumusangana ne disuminyina misangu yonsu. Kadi mpindiewu udi ne disuminyina dipite, bualu udi munutekemene bikole.

²³ Tite ke utudi tuendakana nende, tukuata kabidi nende mudimu bua kunuambuluisha. Bana hetu bakuabu badi bamufila ku luendu badi bamienampala ba Bisumbu bia bena ditaba. Badi bakuata mudimu amu bua lumu lua Kristu.

²⁴ Nubaleje munudi babanange bulelela, bua mu Bisumbu bionsu bia bena ditaba bantu bajadike ne: tuvua tuditemba bualu buenu amu pa bualu.