2 Korente 5 - MUKANDA WA MYIDI MUKULU

¹ Tudi bamanye ne: nzubu utudi tusomba, mmomumue ne: mubidi wetu wa panu, udi upuka. Kadi Mvidi Mukulu mmutulongoluele nzubu mukuabu mu diulu, nzubu udi ushala kashidi, udibu kabayi basa kudi bantu.

² Patutshidi panu, tudi tutua mikemu mpindiewu, tujinga bua batubuikile ne nzubu wetu wa mu diulu.

³ Bobu batubuikile nanku, katuakushala katuyi ne tshilamba, patuashiya mubidi wetu wa panu.

⁴ Eyowa, patutshidi tusomba mu nzubu wetu wa panu ewu, tudi tutua mikemu bu bambule bujitu. Katuena basue kushiya mubidi wetu wa panu. Kadi tudi basue batubuikile ne mubidi wetu wa mu diulu, bua bidi ne bua kufua biandamuke bienze bia muoyi.

⁵ Amu Mvidi Mukulu mene ke udi utulongolola, bua tumone mua kuandamuka nanku. Ukadi mutupe Mueyelu wende bu tshieya tshia bionsu bidiye mutulamine.

⁶ Nanku diba dionsu tudi amu bakole muoyi. Tudi bamanye ne: patutshidi tusomba mu mubidi ewu, tudi dishilangana mutantshi ne Mfumu.

⁷ Bualu ditshidi mu tshikondu tshia kuitaba, katuyi banji kumona.

⁸ Tudi bakole muoyi, tujinga kushiya mubidi ewu diakamue, bua kuya kusomba mu nzubu mudi Mfumu.

⁹ Kadi tshitudi tujinga menemene ke kumusankisha diba dionsu, nansha tuetu basombe mu mubidi ewu, nansha tuetu baye mu nzubu muende.

¹⁰ Bualu bonsu tudi ne bua kumueneka kumpala kua Kristu, bua atulumbuluishe. Diba adi muntu yonsu udi ne bua kupeta bidiye ne bua kupeta bilondeshile malu, nansha mimpe nansha mabi, avuaye muenze patshivuaye mu mubidi wende.

Kristu udi utuangaja bantu ne Mvidi Mukulu

¹¹ Tudi bamanye mutudi ne bua kutshina Mfumu. Ke patudi tukeba kufikisha bantu ku ditaba. Mvidi Mukulu mmutumanye muetu muonsu mutudi. Ndi ntekemena kabidi ne: nuenu munda muenu nudi bammanye kabidi muanyi muonsu mundi.

¹² Katuena basue kuditemba tshiakabidi kunudi. Kadi tudi tujinga kunupetesha tshikondu tshinudi mua kuditemba bualu buetu. Ke munudi mua kupuwisha badi baditemba bua bidi bimueneka, kabayi bamanye bidi mu muoyi wa muntu.

¹³ Pikalabu batuambule mulu, tshilumbu atshi tshidi tshitutangila amu tuetu ne Mvidi Mukulu. Kadi bualu buenu tudi ne bua kukuata mudimu ne lungenyi.

¹⁴ Bualu dinanga didi Kristu mutuleje didi ditulombola mu bionsu bitudi tuenza. Bualu tudi bajadike ne: bu mudi umue mufuile bantu bonsu, tuetu bonsu tudi bafue pamue nende.

¹⁵ Uvua mufuile bantu bonsu, bua bantu batshidi ne muoyi kabakebi kabidi bidi bibalengelela bobu, kadi bakebe bidi bilengelela udi mubafuile, udi Mvidi Mukulu mubishe ku lufu.

¹⁶ Nenku kutuadija ku lelu, katutshiena tulumbuluisha mudi bantu balumbuluisha muntu nabu. Ku kale tuvua balumbuluishe Kristu mushindu awu. Kadi mpindiewu katuena tuenza kabidi nanku to.

¹⁷ Padi muntu udisanga ne Kristu, ukadi muntu mupiamupia: bikulukulu mbimane kushila bipiabipia muaba.

¹⁸ Bionsu abi Mvidi Mukulu ke udi ubienza. Udi mututuangaje nende kudi Kristu, mutupeshe kabidi mudimu wa kufikisha bantu bakuabu bua badilengeje nende.

¹⁹ Bualu Mvidi Mukulu mmukuate mudimu, bua Kristu alengeje bantu bonsu nende. Kavua musue kuvuluka kabidi malu abu mabi. mMutupeshe kabidi mudimu wa kumanyisha bantu mudibu mua kudilengeja nende.

²⁰ Ke mutudi tuakula mu dina dia Kristu. Mvidi Mukulu mene udi unubikila patudi Umuambila ne: “Mu dina dia Kristu tudi tunusengelela ne: nuanyishe bua Kristu anutuangaje ne Mvidi Mukulu.”

²¹ Kristu kavua muenze bualu bubi to. Kadi Mvidi Mukulu mmuteke bubi buetu pambidi pende, bua amone mua kutubingisha kumpala kuende, patudi badisange ne Kristu.