2 Korente 3 - MUKANDA WA MYIDI MUKULU

Bena mudimu ba ndondu mupiamupia

¹ Bitudi bambe ebi bidi bileja ne: tudi basue tshiakabidi kuditemba anyi? Tudi bu bamue badi bakengela mikanda ya kudileja nayi kunudi, nansha badi banulomba mikuabu bua kuya kudileja nayi kudi bakuabu anyi?

² Nuenu ke mukanda utudi mua kudileja nawu, mukanda udi mufunda mu mioyi yetu, udi bonsu mua kumanya ne kubala.

³ Eyowa, nuenu nudi mukanda uvua Kristu mufundishishe kutudi. Kena muufundishishe ne mayi a mukanda, kadi amu ku bukole bua Mueyelu wa Mvidi Mukulu udi ne muoyi. Kena muufundishishe pa mabue, kadi amu mu mioyi ya bantu.

⁴ Tudi tujadika nanku, bualu tudi batekemene kudi Mvidi Mukulu ku bukole bua Kristu.

⁵ Bushuwa katuena mua kuamba ne: tudi mua kukumbaja mudimu ewu ku bukole buetu tuetu. Tudi mua kuukumbaja amu ku bukole bua Mvidi Mukulu.

⁶ Bualu Yeye mmutuenze bena mudimu ba ndondu mupiamupia. Mu ndondu awu, Mvidi Mukulu kena mutupe mikenji idibu bafunde nansha, kadi mmutupe Mueyelu wende. Mikenji idibu bafunde idi itufikisha ku lufu, kadi Mueyelu udi utufikisha ku muoyi.

⁷ Bayua bafunde mikenji pa mabue ku dileta ku dileta. Diba adi butumbi bua Mvidi Mukulu buvua bukenka. Mpala wa Moshe uvua ubalakana bikole bipite, bena Izrayele kabayi mua kumutangila nansha. Kadi bukenke buvua pa mpala wa Moshe abu buvua amu ne bua kujimina. Pavua mikenji, ivua ne bua kutufikisha ku lufu, imueneka pamue ne butumbi bunene nanku,

⁸ kadi butumbi budi bumueneka padi Mueyelu ukuata mudimu, nebuikale bunene bupite!

⁹ Bulongolodi buvua butupisha bukavua ne lumu. Nenku bulongolodi budi butubingisha kumpala kua Mvidi Mukulu nebuikale ne lumu lupite!

¹⁰ Tudi mua kuamba kabidi ne: lumu luvua lumueneka kale ludi tshianana, patudi tulufuanyikija ne lumu lupite ludi lumueneka lelu.

¹¹ Bualu pikala bivua bishala matuku makese bimuenesha lumu, nanku bidi bishala kashidi nebimueneshe lumu lupite!

¹² Tudi tuakula ne dikima dionsu, bualu tudi batekemene bia nanku.

¹³ Katuena bu Moshe uvua mudibuikile tshilamba mu mpala, bua bena Izrayele kabamonyi muvua bukenke bua lupitapita abu buenda bujimina.

¹⁴ Kadi lungenyi luabu kaluvua mua kumvua bualu to. Too ne ku lelu padibu babala mikanda ya ndondu wa kale, tshilamba tshia momumue tshidi tshibuikila lungenyi luabu. Badi bumusha tshilamba etshi amu padi muntu udisanga ne Kristu.

¹⁵ Lelu utudi ewu kabidi, misangu yonsu idibu babala mikanda ya Moshe, tshilamba tshidi tshibuikila lungenyi luabu.

¹⁶ Kadi Mukanda wa tshijila udi wamba ne: “Padi muntu umonangana ne Maweja-Nangila, badi bumusha tshilamba.”

¹⁷ Kadi Maweja-Nangila utudi tutela muaba ewu, ke Mfumu udi ukuata mudimu ku bukole bua Mueyelu wende. Muaba udi Mueyelu wa Mfumu, ke muaba utudi tuenza mutudi basue.

¹⁸ Tuetu bonsu tudi tumuenesha butumbi bua Mfumu, bualu ki mbabuikile mpala wetu ne tshilamba. Ke mutudi bandamuke, bua difuanangane ne Mfumu, bua tumuke mu butumbi, tubuele mu bukuabu budi bupita bua kumpala. Ke bidi Mfumu muenze ku bukole bua Mueyelu wende.