2 Korente 13 - MUKANDA WA MYIDI MUKULU

Mibelu ya ndekelu Diela dia muoyi

¹ Nkadi pa kufika kuenu aku musangu muisatu bua kumonangana nenu. Mukanda wa tshijila udi wamba ne: “Badi mua kufunda muntu ku tshilumbu, amu padi bantu babidi nansha basatu batshijadika.”

² Ndi musue kubela bantu bavua benze bibi kale, ne bakuabu bonsu kabidi. Nkadi mumane kubabela mu luendu luanyi luibidi kuenu aku. Lelu tshiena munkatshi muenu. Kadi ndi ngambulula bimvua muambe diba adi ne: musangu utuamonangana tshiakabidi, tshiakufuila muntu nansha umue luse to.

³ Nudi basue kujadika mudi Kristu wakuila mukana muanyi. Nanku nenujadike bualu ebu diba adi. Kristu kakunuteketela to. Kadi nealeje bukole buende munkatshi muenu.

⁴ Bushuwa uvua muteketele bantu bayua bamupopele ku mutshi mutshiamakane. Kadi mpindiewu udi ne muoyi ku bukole bua Mvidi Mukulu. Tuetu kabidi, badisange nende, tudi ne butekete. Kadi netupete muoyi pamue nende ku bukole bua Mvidi Mukulu. Nenujadike bualu ebu.

⁵ Dikonkayi! Nutshidi bena ditaba anyi? Ditetayi! Kristu utshidi munkatshi muenu anyi? Panudi kanuyi bamone nanku, nukadi bamuvile.

⁶ Kadi ndi mutekemene ne: nenumanye mutudi tuetu katuyi bamuvile.

⁷ Tudi tulomba Mvidi Mukulu bua kanuenji bualu bubi nansha bumue. Katuena tujinga kudileja ne: tudi ne bukole. Kadi tshitudi tujinga tshidi amu ne: nuenze malu mimpe. Nansha tuetu bimueneka bu bantu badi kabayi ne bukole, ki mbualu to.

⁸ Bualu katuena tuluisha bulelela bua Mvidi Mukulu. Tudi tubuluila diba dionsu.

⁹ Tudi tusanka patudi ne butekete, nuenu ne bukole. Ke patudi tunulombela kabidi kudi Mvidi Mukulu, bua anulengeje, anupingaje mu njila mululame.

¹⁰ Ndi munufundile bionsu ebi, nansha mundi mutantshi mule, bua, pangafika, tshikadi ne tshilumbu tshia kunubela ne disu dikole. Bualu Mfumu mmumpeshe bumfumu ki mbua kunyangakaja Tshisumbu, kadi amu bua kutshibaka.

¹¹ Mpindiewu, bana hetu, kolayi! Nulonde amu njila mululame. Nukoleshangane ku muoyi. Nuenze tshintu tshimue. Sombayi ne bupole. Nanku Mvidi Mukulu udi utunanga, neatupe bupole buende. Neikale nenu.

¹² Elanganayi muoyi, nupukilangane bu bana ba muntu. Bena ditaba bonsu ba mu Tshisumbu tshietu badi banuela muoyi.

¹³ Luse lua Mfumu Yezu Kristu, dinanga dia Mvidi Mukulu, ne didisanga ne Mueyelu wa Tshijila, bikale nenu bonsu.