2 Korente 12 - MUKANDA WA MYIDI MUKULU

Mvidi Mukulu uvua musokoluele Polu malu

¹ Nansha kabiyi bimpe, ndi amu ne bua kuditemba. Bualu nudi numbambidika bua ngenze nanku. Nengakule mpindiewu bua malu avua Mfumu mundeje, munsokoluele.

² Ndi mumanye muena Kristu kampanda, uvuabu bambule, baye nende mu diulu muamua menemene, kukadi bidimu dikumu ne binayi. (Tshiena mumanye ne: uvua muye ne mubidi wende anyi Mvidi Mukulu mumuleje mu lungenyi malu a kuaka. Mvidi Mukulu nkayende ke udi mumanye.)

³ Eyowa, ndi mumanye ne: bayua bambule muntu awu, baye nende too ne mu mparadizu. (Ndi ngamba tshiakabidi ne: bayua bamuambule bulelela anyi Mvidi Mukulu mumuleje malu, tshiena mumanye. Mvidi Mukulu nkayende ke udi mumanye.)

⁴ Muamua, uvua mumvue miaku idibu kabayi mua kuambulula, nansha kumvuija mu miakulu idi bantu ba panu bakula.

⁵ Bua muntu awu, nenditembe. Kadi tshiena mua kuditemba bualu buanyi meme. Nenditembe amu bua malu adi aleja butekete bundi nabu.

⁶ Meme musue kuditemba, tshiakudileja bu muntu mutatakane to. Bualu nengambe amu malu malelela. Kadi tshiena musue kuditemba. Ndi musue muntu angangate ne mushinga bua bidiye mumone ngenza, nansha bua bidiye mumvue ngakula, kayi upitshisha.

⁷ mBandeje malu adibu kabayi mua kumvuija. Kadi bua tshimonyi mua kuditambisha, Mvidi Mukulu mmumpeshe dikenga dinene. Mutumibue wa diabolu mmuntatshishe bua tshiditembi.

⁸ Mvua mulombe Mfumu misangu isatu, bua angumushile dikenga edi.

⁹ Kungandamunaye ne: “Tshiudi natshi dikenga, ke amu dinanga dindi nkunanga nadi, bualu bukole buanyi budi budileja patoke paudi muena butekete.” Ke mundi musue kuditemba nangananga bua butekete buanyi, bua bukole bua Kristu buntulukile.

¹⁰ Ke pandi nsanka bualu bua Kristu mu butekete buanyi, nansha diba mene didibu batupenda, bantatshisha, bankengesha, bankuatshisha bowa. Nanku pandi ne butekete, ke pandi ne bukole.

Polu udi usumpakena bena Korente

¹¹ Mvua mudileje bu muntu mutatakane. Kadi nuenu nuvua bambidike bua ngenze nanku. Nuenu ke bayua mua kundumbuluila. Bualu nansha meme muntu wa patupu, tshiena mushadile kudi bapostolu benu banudi nuamba ne: mba kalandamusenga abu.

¹² Lutuulu lumvua nalu, malu a dikema ne bishima bimvua muenze munkatshi muenu, ke bivua mua kunujadikila mundi mupostolu.

¹³ Tshindi muenzele Bisumbu bikuabu bia bena ditaba, mubenge kunuenzela nuenu ntshinyi? Ee, bubi bumvua munuenzele: tshivua munulombe diambuluisha! Bu mundi munukengeshe nanku, numfuile amu luse!

¹⁴ Nkadi pa kufika kuenu aku, bua musangu wanyi muisatu. Bujitu buanyi kabuakuikala pa makaya enu to. Tshiena nkeba biuma bienu. Ndi nnukeba amu nuenu mene. Bualu bana kabena ne bua kudisha baledi to. Amu baledi ke badi ne bua kudisha bana babu.

¹⁵ Ndi njinga kufila bionsu bindi nabi ne disanka bualu buenu. Nendifile ne meme mene bua kunuambuluisha. Kadi dinnanga dienu nedikepele, padi dinunanga dianyi dienda divulangana anyi?

¹⁶ Nanku nenuitabe ne: bujitu buanyi kabuvua pa makaya enu to. Kadi bamue nebambe ne: bu mudiye ne budimu, mmutudinge mushindu mukuabu.

¹⁷ Kadi mvua munudinge munyi? Mvua munutumine bantu, bua banunyenge bintu bia meme kunema nabi anyi?

¹⁸ Bushiwa, mvua musengelele Tite, bua aye kumonangana nenu. Mvua mutume nende muena ditaba unudi bamanye. Nudi mua kujadika ne: Tite mmununyenge bintu anyi? Yeye ne meme, ka-tuvua bakuate mudimu mushindu wa momumue anyi? Katuvua bipatshile bualu amu bumue anyi?

¹⁹ Bumue nukadi nuela meji mpindiewu ne: Polu udi ukeba kudilumbuluila ku mesu etu. Nansha kakese! Tudi tudilumbuluila ku mesu a Mvidi Mukulu, badisange ne Kristu! Bana hetu basuibue, tudi tunuambila bionsu abi, bua nuenu kushindama, kuya kumpala mu ditaba.

²⁰ Ndi ntshina ne: pangafika, tshiakunusangana mushindu undi musue. Tshiyi munusangane nanku, nuenu kabidi kanuakunsangana mushindu unudi basue. Bumue nensangane amu mvita ne lubabu, tshiji ne difuilakana dia mianzu, bipendu ne buakulavi, ditambisha ne buenzavi. Ke tshindi ntshina.

²¹ Pangafika bua kumonangana nenu, ndi ntshina ne: Mvidi Mukulu wanyi neampuekeshe milongu ku mesu enu. Bualu nengase muadi, pandi mmona ba bungi bavua benze bibi kale, kabayi badilengeja lelu. Nanku nulekele buendenda, malu a bundu, ne bilema bikuabu binuvua benze.