1 Yone 5 - MUKANDA WA MYIDI MUKULU

Netutshimune bukua panu

¹ Muntu yonsu udi witaba ne: Yezu udi Kristu, udi muana wa Mvidi Mukulu. Muntu yonsu udi unanga tatu, udi unanga kabidi ne bana bende.

² Tudi bamanye mutudi banange bana ba Mvidi Mukulu, patudi tunanga Mvidi Mukulu, tulonda kabidi mikenji yende.

³ Bualu kunanga Mvidi Mukulu ke kuitaba mikenji yende. Mikenji yende kayena mipite kutukolela to.

⁴ Bualu muana yonsu wa Mvidi Mukulu udi mua kutshimuna bukua panu. Nanku netutshimune bukua panu, amu patudi tuitaba.

⁵ Udi mua kutshimuna bukua panu nnganyi? Amu muntu udi witaba ne: Yezu udi Muana wa Mvidi Mukulu.

Mvidi Mukulu mmujadike mudi Yezu Kristu

⁶ Yezu Kristu mmufike kutudi; mmufike ne mayi muvuabu bamutue, kabidi ne mashi a ku lufu luende. Kena mufike amu ne mayi nkayawu, kadi ne mayi, kabidi ne mashi. Ke bualu budi Mueyelu wa Tshijila ujadika. Bualu Mueyelu udi bulelela.

⁷ Bajadiki badi basatu:

⁸ Mueyelu wa Tshijila, mayi ne mashi. Bonsu basatu badi bajadika bualu bua momumue.

⁹ Tudi tuitaba bidi bantu bajadika. Kadi bidi Mvidi Mukulu ujadika, bidi bipite bia bantu, nangananga bidiye ujadika bualu bua Muanende.

¹⁰ Nanku muntu udi witaba Muana wa Mvidi Mukulu, udi ne dijadika adi munda muende. Kadi udi kayi witaba Mvidi Mukulu, udi muvuije Mvidi Mukulu muena dishima, bualu kena witaba bidi Mvidi Mukulu ujadika bualu bua Muanende.

¹¹ Bidi Mvidi Mukulu mujadike mbiobi ebi: mmutupe muoyi wa kashidi, mutupeshilewu kudi Muanende.

¹² Udi ne Muana, udi ne muoyi ewu. Udi kayi ne Muana wa Mvidi Mukulu, kena nawu nansha.

Muoyi wa kashidi

¹³ Ndi nnufundila malu aa, bua numanye ne: nudi ne muoyi wa kashidi, bualu nudi nuitaba Muana wa Mvidi Mukulu.

¹⁴ Tudi tutekemena muetu muonsu kudi Mvidi Mukulu, bualu tudi bajadike ne: Mvidi Mukulu neatuteleje, patuikala bamulombe tshintu tshidi tshiumvuangana ne disua diende.

¹⁵ Nanku bu mutudi bamanye ne: udi ututeleja patudi tumulomba, tudi bamanye kabidi ne: neatupeshe bitudi tumulomba.

¹⁶ Padi muntu umona muanabu wenza bualu bubi, budi kabuyi mua kumufikisha ku lufu, mbimpe atendelele Mvidi Mukulu. Nanku Mvidi Mukulu neapeshe muanabu awu muoyi. Ebi bidi amu bua bantu badi benza malu mabi, adi kaayi abafikisha ku lufu. Kadi kudi bubi budi bufikisha ku lufu. Tshiena ngamba bua nutendelele bua bualu bubi bua nanku to.

¹⁷ Tshilema tshionsu mbubi. Kadi kudi bubi budi kabuyi bufikisha ku lufu.

¹⁸ Tudi bamanye ne: muana wa Mvidi Mukulu nansha umue kena utungunuka ne dienza dia malu mabi, bualu Muana wa Mvidi Mukulu udi umulama. Nanku Muena bubi kena mua kumuenzela bualu.

¹⁹ Tudi bamanye ne: tudi bantu ba Mvidi Mukulu. Tudi bamanye kabidi ne: bukua panu bujima budi ku bumfumu bua Muena bubi.

²⁰ Tudi bamanye ne: Muana wa Mvidi Mukulu mmufike. mMutupeshe lungenyi, bua mmanye Mvidi Mukulu mulelela. Tudi mu bobumue ne Mvidi Mukulu mulelela kudi Muanende Yezu Kristu. Yezu Kristu ke Mvidi Mukulu mulelela. Yeye ke muoyi wa kashidi.

²¹ Bana banyi, kanubuelakanyi ne mvidie ya dishima!