1 Yone 3 - MUKANDA WA MYIDI MUKULU

Bana ba Mvidi Mukulu

¹ Monayi dinanga dipite bunene didi Tatu mutunange nadi! Bualu badi batuinyika ne: mbana ba Mvidi Mukulu. Bushuwa, tudi bana bende. Bukua panu mbutupange, bualu kabuvua bumanye Mvidi Mukulu.

² Balunda banyi, mpindiewu tukadi bana ba Mvidi Mukulu. Kadi mutuikala pashishe ki mmuanji kumanyika patoke. Kadi tshitudi bamanye ngetshi: padi Kristu umueneka, netuikale bafuanangane nende, bualu netumumone muonsu mudiye.

³ Muntu yonsu udi windila bualu ebu, mutekemene kudi Kristu, udi udilengeja ku bubi buonsu, bu mudi Yezu Kristu kabidi kayi ne bubi.

⁴ Muntu yonsu udi wenza bibi, udi ubenga mikenji ya Mvidi Mukulu. Bualu kuenza bibi nkubenga mikenji.

⁵ Nudi bamanye ne: Yezu Kristu wakamueneka bua kumusha bubi. Munda muende kamuena bubi to.

⁶ Nanku muntu udi ushala nende mu bobumue, kena wenza kabidi bibi. Kadi muntu udi wenza amu bibi, kena mumumone, kena mumumanye.

⁷ Bana banyi, muntu kanushimi! Muntu udi wenza malu makane, udi muakane, mudi Yezu Kristu muakane.

⁸ Muntu utshidi utungunuka ne dienza bibi, udi muntu wa diabolu, bualu diabolu mmuenze bibi biangatshile ku ntuadijilu. Kadi Muana wa Mvidi Mukulu mmumueneke panu, bua kubutula bidi diabolu muenze.

⁹ Muntu yonsu udi muana wa Mvidi Mukulu, udi ulekela kuenza malu mabi, bualu bukole bua muoyi budi bufuma kudi Mvidi Mukulu budi munda muende. Bu mudi Mvidi Mukulu Tatuende, kena mua kutungunuka ne dienza malu mabi to.

¹⁰ Badi mua kujingulula patoke bana ba Mvidi Mukulu ne bana ba diabolu nenku: muntu yonsu udi kayi wenza malu makane, anyi kayi unanga muanabu, kena muana wa Mvidi Mukulu.

Nunangangane

¹¹ Lumu lunuvua bumvue biangatshile ku ntuadijilu luvua nenku: tunangangane.

¹² Katuikadi bu Kayine uvua muntu wa Muena bubi, ushipa muanabu. Wakamushipa bua tshinyi? Bualu malu avua Kayine wenza avua mabi. Avua muanabu wenza avua mimpe.

¹³ Bana hetu, padi bantu ba pa buloba banukina, kanukemi to.

¹⁴ Tudi bamanye ne: tudi bapatuke mu lufu, bua kubuela mu muoyi. Tudi bajadike nanku, bualu tudi tunanga bana hetu. Udi kayi unanga, utshidi mu lufu.

¹⁵ Muntu yonsu udi ukina muanabu mmushipianganyi. Nudi bamanye ne; mushipianganyi kena ne muoyi wa kashidi munda muende.

¹⁶ Mutudi bamanye tshidi dinanga mmunyi? Bualu Yezu Kristu wakafua muoyi wende bualu buetu. Nanku tuetu kabidi tudi ne bua kufila muoyi wetu bua bana hetu.

¹⁷ Pikala muntu muena biuma mumone muanabu mu dikenga, kadi upapija muoyi wende, mmunyi mudiye mua kuamba ne: ndi munange Mvidi Mukulu?

¹⁸ Bana banyi, katuena mua kunangangana amu ne mayuki ne miaku bia patupu. Kadi tudi ne bua kuleja dinanga dietu patoke ku bitudi tuenza.

Tutekemene kudi Mvidi Mukulu

¹⁹ Ke mutudi mua kumanya mutudi tuenda mu bulelela. Ke mutudi mua kutalaja kondu ketu ka munda kumpala kua Mvidi Mukulu.

²⁰ Nansha kondu ketu ka munda katupisha ne: tudi benze bibi, kadi tudi bamanye ne: Mvidi Mukulu mmupite kondu ketu ka munda, mmumanye kabidi bionsu.

²¹ Nanku, balunda banyi, padi kondu ketu ka munda kakayi katupisha kabidi, tudi mua kumueneka kumpala kua Mvidi Mukulu katuyi ne dipampakana.

²² Bionsu bitudi tulomba, tudi tubipeta kudiye, bualu tudi tulonda mikenji yende, tuenza tshidiye musue.

²³ Ke mukenji udiye utuelela: tuitabe Muanende Yezu Kristu, tunangangane kabidi, muvua Kristu mututumine diyi

²⁴ Muntu udi utumikila mikenji ya Mvidi Mukulu, udi ushala munda mua Mvidi Mukulu, ne Mvidi Mukulu udi ushala munda muende. Tudi bajadike mudi Mvidi Mukulu ushala munda muetu, bualu mmutupe Mueyelu wende wa Tshijila.