1 Yone 2 - MUKANDA WA MYIDI MUKULU

Kristu udi utuambuluisha

¹ Bana banyi, ndi nnufundila malu aa, bua kanuenji bibi. Kadi pikala muntu wenza bibi, tudi ne mutulumbuluidi wetu kudi Tatu: ke Yezu Kristu udi kayi ne tshilema.

² Bualu Yezu Kristu uvua mudifile bu mulambu, bua batujimijile mibi yetu. Kabena bajimija amu yetu nkayayi, kadi ne ya bantu bonsu ba pa buloba kabidi.

³ Patudi tutumikila mikenji ya Mvidi Mukulu, ke patudi mua kujadika ne: tudi bamumanye.

⁴ Padi muntu wamba ne: “Ndi mumanye Mvidi Mukulu,” kayi utumikila mikenji yende, udi muena dishima. Bulelela kabuena munda muende to.

⁵ Kadi muntu udi utumikila muaku wa Mvidi Mukulu, ke muntu udi unanga Mvidi Mukulu muende muonsu. Tshidi mua kutujadikila ne: tudi mu bobumue ne Mvidi Mukulu, ngetshi:

⁶ muntu udi wamba ne: ndi mu bobumue ne Mvidi Mukulu, udi ne bua kuenza bivua Yezu wenza.

Mukenji mupiamupia

⁷ Balunda banyi, tshiena nnufundila mukenji mupiamupia. Kadi udi mukenji wa kale unukavua bamane kupeta biangatshile ku ntuadijilu. Mukenji wa kale ewu ke muaku unukadi bamane kumvua.

⁸ Kadi mukenji undi nnufundila udi amu mupiamupia, bualu bulelela buawu budi bumueneka munda mua Kristu, ne munda muenu kabidi. Bualu miidima idi yumuka, butoke bulelela bukadi bukenka.

⁹ Muntu udi ujadika ne: ndi ngenda mu butoke, kadi ukina muanabu, utshidi mu miidima.

¹⁰ Amu muntu udi unanga muanabu, ke udi wenda mu butoke. Nanku munda muende kamuena bualu nansha bumue budi mua kufikisha muntu mukuabu ku dienza bibi to.

¹¹ Kadi muntu udi ukina muanabu, udi wenda mu miidima. Udi wendamu, kayi nansha mumanye kudiye uya. Bualu miidima mmimupofamije mesu.

¹² Bana banyi, ndi nnufundila, bualu mbanujimijile mibi yenu mu dina dia Kristu.

¹³ Batatu, ndi nnufundila, bualu nudi bamanye Udiku biangatshile ku ntuadijilu. Bansonga, ndi nnufundila, bualu nudi batshimune Muena bubi.

¹⁴ Bana, ndi nnufundila, bualu nudi bamanye Tatu. Batatu, ndi nnufundila, bualu nudi bamanye Udiku biangatshile ku ntuadijilu. Bansonga, ndi nnufundila, bualu nudi ne bukole. Muaku wa Mvidi Mukulu udi munda muenu, kabidi nudi batshimune Muena bubi.

¹⁵ Kanunangi bukua panu, nansha malu a panu. Muntu udi unanga bukua panu, kena ne muaba munda muende wa kunanga Tatu.

¹⁶ Bualu malu a panu ke majinga mabi a buntu buetu, lukuka lua bitudi tumona, kuditemba bua bitudi nabi. Malu onsu aa kaena afuma kudi Tatu, kadi kudi bukua panu.

¹⁷ Bia panu bidi bienda bijimina. Bionsu bidi bantu bajinga panu bidi bipita. Kadi udi wenza tshidi Mvidi Mukulu musue, ke udi ushala ne muoyi kashidi.

Muluishi wa Kristu

¹⁸ Bana banyi, nshikidilu ukadi pabuipi! Nukadi bumvue ne: Muluishi wa Kristu neafike. Kadi mpindiewu baluishi bavule ba Kristu bakadi bapatuke. Ke patudi bamanye ne: nshikidilu ukadi pabuipi.

¹⁹ Bantu aba kabavua hetu menemene to. Bobu bikale hetu, bavua mua kushala netu. Kadi mbumuke kutudi. Ke padibu baleje patoke ne: nansha umue wa kudibu kavua wetu menemene.

²⁰ Kadi nuenu nuvua bapete Mueyelu wa Tshijila, uvua Kristu munupumuine. Ke panudi bonsu bamanye bulelela.

²¹ Nanku tshiena nnufundila, bualu nudi bapange bulelela to. Ndi nnufundila, bualu nukadi babumanye. Nudi bamanye kabidi ne: bulelela kabuena mua kulela dishima nansha dimue.

²² Kadi muena dishima nnganyi? Ke muntu udi wamba ne: “Yezu kena Kristu, Musungidi mutulaya.” Wa nanku ke Muluishi wa Kristu. Udi ubenga Tatu, ne Muana kabidi.

²³ Bualu muntu udi ubenga Muana, udi ubenga kabidi ne Tatu. Kadi udi witaba Muana, udi udisanga kabidi ne Tatu.

²⁴ Nanku nulame bimpe munda muenu miaku inuvua bumvue biangatshile ku ntuadijilu. Pikala miaku inuvua bumvua biangatshile ku ntuadijilu ayi mishale munda muenu, nuenu kabidi nenushale mu bobumue ne Muana, kabidi ne Tatu.

²⁵ Tshivua Kristu mene mulaye bua kutupa, ke muoyi wa kashidi.

²⁶ Ndi nnufundila malu aa, bua nudimukile bantu badi bakeba kunupambula mu njila.

²⁷ Kristu mmunupumuine Mueyelu wende. Bu mudi Mueyelu wende ushala munda muenu, kanuena nukengela mulongeshi mukuabu. Bualu Mueyelu wende udi unulongesha malu onsu. Bidiwu wamba bidi bilelela, kabiena bia dishima to. Nanku nuitabe bidi Mueyelu unulongesha, nushale mu bobumue ne Kristu.

²⁸ Eyowa, bana banyi, nushale mu bobumue ne Kristu. Nanku katuakupampakana dituku diamuenekaye. Katuakufua bundu kumpala kuende dituku diafikaye.

²⁹ Nudi bamanye ne: Kristu ki mmuenze bualu bubi nansha bumue. Nanku nudi ne bua kumanya kabidi ne: muntu yonsu udi wenza malu mimpe, udi muana wa Mvidi Mukulu.