1 Timote 3 - MUKANDA WA MYIDI MUKULU

Balombodi ba Tshisumbu tshia bena ditaba

¹ Bindi ndongesha ebi bidi bilelela: padi muntu ujinga kupeta mudimu wa bulombodi mu Tshisumbu tshia bena ditaba, udi musue mudimu muimpe mutambe.

² Kadi mulombodi wa Tshisumbu tshia bena ditaba kikadi ne bualu budibu mua kumudiwula nabu. Ikale muena mukaji umue. Ikale muntu udi udilama, muena meji, muntu udi mumanye mua kusomba ne bantu, kuakidila benyi, kulongesha bimpe.

³ Kikadi munuavi, nansha musue mvita. Kadi ikale muena bupole, muntu wa disanka, kayi mutshima wa biuma.

⁴ Amanye mua kulombola nzubu wende bimpe. Bana bende bamutumikile ne kanemu.

⁵ Bualu padi muntu kayi mumanye mua kulombola nzubu wende, udi mua kuludika Tshisumbu tshia bena ditaba munyi?

⁶ Kena mua kuikala muntu mupiamupia mu Tshisumbu tshia bena ditaba, bualu udi mua kuditambisha. Diba adi nebamufundile tshibawu tshiakapeta diabolu.

⁷ Ikale kabidi ne lumu luimpe kudi bantu badi kabayi bena Kristu, bua kabamupepeji. Tshianana udi mua kupona mu mateyi a diabolu.

Bambuluishi ba Balombodi ba Tshisumbu

⁸ Bambuluishi ba balombodi kabidi badi ne bua kudinemeka. Bikale kabidi bena diyi dimue. Kabikadi banuavi, nansha bantu badi bakeba kupeta biuma mu njila mibi.

⁹ Balamate ku malu a ditaba avuabu babalongeshe. Benze malu mimpe adi kondu ka munda kabambila.

¹⁰ Banji kubateta bangabanga. Padibu kabayi mua kubadiwula, badi mua kukuata mudimu wa bambuluishi ba balombodi.

¹¹ Bakaji babu kabidi badi ne bua kudinemeka. Kabikadi bena bijanu. Bamanye mua kudilama. Bikale bantu ba diyi dimue mu malu onsu.

¹² Muambuluishi wa balombodi ikale muena mukaji umue Amanye mua kulombola bimpe bana bende, ne nzubu wende.

¹³ Padi bambuluishi aba benza mudimu wabu bimpe, bena Tshisumbu nebabangate ne mushinga. Nanku nebalongeshe ne muoyi mushindame malu a ditaba, didi ditusanga ne Yezu Kristu.

Bualu bunene busokome

¹⁴ Ndi nkufundila mukanda ewu, kadi ndi ntekemena kufika bua kumonangana nebe matuku makese aa.

¹⁵ Kadi bu meme munengakane mutantshi, mukanda ewu neukumanyishe bidi bantu ne bua kuenza mu diku dia Mvidi Mukulu, mbuena kuamba ne: mu Tshisumbu tshia bantu badi bitaba Mvidi Mukulu wa muoyi, udi dikunji ne nshindamenu wa bulelela.

¹⁶ Eyowa, muntu nansha umue kena mua kuela mpata ku bualu bunene busokome bua ditaba dietu! Uvua mudileje panu mu butekete bua muntu. Mueyelu wa Tshijila kumubingisha. Batumibue ba Mvidi Mukulu kumumona. Bantu kulongesha bualu buende mu bisamba bikuabu. Kumuitababu pa buloba. Kumuambulabu mu diulu.