1 Timote 2 - MUKANDA WA MYIDI MUKULU

Mutudi mua kutendelela Mvidi Mukulu pamue

¹ Bualu bua kumpala bundi ndomba: bantu batendelele Mvidi Mukulu, bamulombe, bamusengelele, bamuele tuasakidila mu dina dia bantu bonsu.

² Nudi ne bua kutendelela Mvidi Mukulu bua bakalenga ba matunga ne bua bamfumu bonsu, bua tumone mua kusomba talalaa mu bupole, kunemeka Mvidi Mukulu tshishiki, kuenza amu malu mimpe.

³ Bia nanku ke bidi bimpe, bisankisha Mvidi Mukulu, Musungidi wetu,

⁴ udi musue bua bantu bonsu bapande, bamanye bulelela.

⁵ Mvidi Mukulu udi umuepele. Mudi kabidi mutuangaji umuepele pankatshi pa Mvidi Mukulu ne bantu, ke muntu Yezu Kristu.

⁶ Yeye uvua mudifile bua kupikula bantu bonsu. Ke muvuaye muleje mu tshikondu tshivua Mvidi Mukulu mujadike ne: Mvidi Mukulu mmusue kusungidila bantu bonsu.

⁷ Ke padibu bantume bu mupostolu ne mulongeshi, bua kufikisha bena bisamba bikuabu ku ditaba ne ku bulelela. Tshiena nshima to. Ndi ngamba malu mudiwu.

⁸ Ndi musue nanku bua bantu balume batendelele Mvidi Mukulu miaba yonsu, bele bianza mulu, batendelele ne muoyi mutoke, kabayi ne tshiji, nansha matandu munda.

⁹ Ndi musue kabidi bua bantu bakaji bavuale mvuadilu wa kanemu, badilengeje kabayi badileja. Baluke nsuki pa ndukilu mulenga. Kabavuadi bilengejilu bia tshiamu tshia mpawungi, nansha bia mabue a busanga, nansha bilamba bia mushinga mukole.

¹⁰ Kadi badilengeje ne malu mimpe adibu benza. Ke bidi bakaji badi banemeka Mvidi Mukulu ne bua kuenza.

¹¹ Diba dia dilongesha bakaji bapuwe ne butumike.

¹² Tshiena nganyisha bua muntu mukaji alongeshe, nansha atumine mulume diyi. Kadi udi ne bua kupuwa.

¹³ Bualu Mvidi Mukulu uvua mufuke Adame kumpala, pashishe Eva.

¹⁴ Kabidi kabavua badinge Adame to, amu mukaji. Ke kutupaye ku diyi dia Mvidi Mukulu.

¹⁵ Kadi nebasungidile mukaji bua buledi buende, padiye unanukila mu ditaba ne mu dinanga, wenza amu ne bupuekele malu a tshijila adi Mvidi Mukulu musue.