1 Timote 1 - MUKANDA WA MYIDI MUKULU

Diela dia muoyi

¹ Meme ndi Polu, mupostolu wa Yezu Kristu ku diyi dia Mvidi Mukulu, Musungidi wetu, ne ku diyi dia Yezu Kristu utudi tutekemena.

² Timote, muananyi menemene mu ditaba, ndi nkufundila mukanda ewu, nkujingila ne: dinanga, luse, ne bupole, bia kudi Mvidi Mukulu Tatu ne Mfumu wetu Yezu Kristu, bishindame mu muoyi webe.

Udimuke ku malongesha adi kaayi malelela

³ Bu mumvua mukulombe, pamvua nya ku Masedoniya, shala mu Efeze. Bualu bantu badimu badi balongesha malu adi kaayi malelela. Ubakandike! Balekele kuenza nanku!

⁴ Kabakebi kumanya mianu ne mena mulongulongu bia bankambua, bidi bijula amu milandu ya patupu. Bionsu abi kabiena bitungunuja mudimu wa Mvidi Mukulu wa kusungidila bantu. Muntu udi upeta lupandu amu ku ditaba.

⁵ Ndi nkutumina diyi edi bua usake bantu ku dinanga, didi bantu ba muoyi mutoke nadi, padibu banyisha bilenga bidi kondu ka munda kabambila. Bikale kabidi ne ditaba dishindame.

⁶ Bantu bakuabu badi bapambuke mu njila ewu, baditua ku mpata ya tshianana.

⁷ Badi basue kuikala balongeshi ba mikenji ya Mvidi Mukulu, kadi kabena bajingulula mene miaku idibu bamba, nansha malu adibu balongesha, bajadika bikole.

⁸ Tudi bamanye ne: mikenji idi mimpe, pikala muntu wenza nayi mudimu pa wowu.

⁹ Tuvuluke ne: kabavua belela bantu ba malu mimpe mikenji to, kadi anu benzavi, bantomboji, bena lonji, bantu babi, bantu badi kabayi batshina Mvidi Mukulu, nansha tshintu tshia tshijila. mBayelele kabidi bantu badi bashipa tatuabu nansha mamu, bashipianganyi bakuabu,

¹⁰ bena buendenda, bakulumpe badi banyanga bana, bantu badi basumbishangana bapika, bena dishima, bantu badi baditshipa mitshipu ya dishima, ne bonsu badi benza malu adi abengangana ne dilongesha dilelela.

¹¹ Dilongesha edi didi difuma ku Lumu lua Disanka lundi ne bua kukobola. Lumu lua Disanka elu ludi lutumanyisha butumbi bua Mvidi Mukulu, udi mpokolu wa diakalenga dietu.

Polu udi wela Mvidi Mukulu tuasakidila

¹² Ndi ngela Mfumu wetu Yezu Kristu tuasakidila, bualu uvua mumpeshe bukole bua meme kumukuatshila mudimu. Ndi muele tuasakidila, bualu uvua mungangate ne mushinga, muanyishe bua meme kumuenzela mudimu,

¹³ nansha mumvua mumujane kale, mumukengeshe, mumupende. Kadi Mvidi Mukulu kumfuila luse, bualu tshivua ne ditaba, tshivua mumanye tshimvua ngenza.

¹⁴ Nanku Mfumu wetu kunnanga ne dinanga dipite bunene. Kumpeshaye ditaba ne dinanga, bitudi tupeta patudi tudisanga ne Yezu Kristu.

¹⁵ Bindi ndongesha ebi bidi bilelela. Bantu bonsu bitabe ne: Yezu mmufike pa buloba bua kusungidila bantu babi. Meme ndi mubapite bonsu ku bubi.

¹⁶ Ke padi Mvidi Mukulu mumfuile meme luse. Uvua musue bua Yezu adianjile kuleja lutulu luende luonsu kundi meme, muntu mubi mupite bakuabu. Ndi mushale mpindiewu tshilejilu tshidi mua kulongesha bantu bonsu matuku adi kumpala ne: nuenu bitabe Yezu Kristu, nenupete muoyi wa kashidi.

¹⁷ Lumu ne butumbi bikale kashidi tshiendelele kudi Mukalenga wa kashidi, udi kayi ufua, kayi umueneka, udi Mvidi Mukulu umue epele! Amene.

¹⁸ Timote wanyi, ndi nkupesha mudimu ewu, bilondeshile miaku ya bambi ivuabu bakule kale bualu buebe. Miaku eyi ikukoleshe mu maboku, bua uluangane mvita mimpe.

¹⁹ Nanku ulame ditaba, ukumbaje bidi kondu kebe ka munda kakuambila. Bamue bantu bavua babenga kuteleja bivua kondu kabu ka munda kabambila. Ke muvuabu bajimije ditaba diabu.

²⁰ Munkatshi muabu mudi Imeneya ne Aleksandre, bamvua mufile kudi diabolu, bua balonge mudibu kabayi mua kusendeka Mvidi Mukulu.