1 Tesalonike 5 - MUKANDA WA MYIDI MUKULU

¹ Bana hetu, kanuena nukengela bua tunufundile bua meba nansha bua bikondu bienzeka malu aa.

² Bualu nudi bamanye ne: dituku dia Mfumu nedifike, mudi muivi ufika butuku.

³ Diba diamba bantu ne: “Tudi talalaa. Bionsu bidi mu bupole,” diakamue kabutu nekabakuate, mudi makenga akuata mukaji pa lulelu. Kabakupanduka to.

⁴ Kadi nuenu, bana hetu, kanuena mu midima nansha. Nanku dituku adi kadiena mua kunujikila bu muivi to.

⁵ Nuenu bonsu nudi nuenda mu butoke ne mu munya. Katuena tuenda mu midima, nansha butuku.

⁶ Nenku katuena ne bua kulala tulu, mudi bantu bakuabu benza. Kadi tutabalayi, tudilame ku bunuavi.

⁷ Bualu bantu badi balala tulu butuku, bakuatshika maluvu butuku.

⁸ Kadi tuetu badi benda mu munya, tudilame ku bunuavi ne ku budiavi. Tudi ne bua kuvuala ditaba ne dinanga, mudibu bavuala kazaku ka tshiamu mu mvita. Tuvuale kabidi ditekemena dia tuetu kupanda, mudibu basa tshifulu tshia tshiamu ku mutu.

⁹ Bualu Mvidi Mukulu kavua mutusungule bua kuhkengesha ne tshiiji, kadi amu bua tupete lupandu kudi Mfumu wetu Yezu Kristu.

¹⁰ Kristu mmutufuile bua tuikale ne muoyi pamue nende, nansha tuetu ne muoyi, nansha tuetu bamane kufua diapinganaye.

¹¹ Nanku nukoleshangane ku muoyi, nuambuluishangane, anu munukadi nuenza amu.

Mibelu ya ndekelu Diela dia muoyi

¹² Bana hetu, tudi Umulomba ne: nunemeke badi bakuata mudimu munkatshi muenu, bavua Mvidi Mukulu musungule bua kunulombola ne kunulongesha.

¹³ Nubanange, nubangate ne mushinga, bualu bua mudimu udibu bakuata munkatshi muenu. Nulame kabidi bupole munkatshi muenu.

¹⁴ Bana hetu, tudi tunusengelela ne: belayi bena lulengu. Kankamikayi bena buowa, ambuluishayi badi kabayi ne dikanda, ikalayi ne lutuulu kudi bantu bonsu.

¹⁵ Enzayi muenu muonsu, bua muntu kapingajidi mukuende bubi ku bubi. Kadi nukebe diba dionsu munudi mua kuenzelangana bimpe, kuenzela kabidi ne bantu bakuabu bonsu bimpe.

¹⁶ Sankayi diba dionsu.

¹⁷ Nutendelele, kanuyi nupungila.

¹⁸ Nuele Mvidi Mukulu tuasakidila mu malu onsu adi enzeka. Ke tshidi Mvidi Mukulu unulomba nuenu badi badisanga ne Yezu Kristu.

¹⁹ Kanupumbishi Mueyelu wa Tshijila bua kuenzawu mudimu.

²⁰ Kanupetudi malu adi bambi bamba.

²¹ Kadi kenketayi malu onsu, nulame adi mimpe.

²² Bengayi malu mabi a mishindu yonsu.

²³ Mvidi Mukulu udi utupa bupole, anuambuluishe bua nuikale bantu bende menemene. Anulame ne mueyelu wenu, muoyi, ne mubidi, bua kanuikadi ne bubi, too ne dituku diafika Mfumu wetu Yezu Kristu.

²⁴ Mvidi Mukulu uvua munubikile, neakumbaje bivua-ye mulaye, bualu udi muena diyi dimue.

²⁵ Bana hetu, nutulombele ne tuetu kabidi kudi Mvidi Mukulu.

²⁶ Elayi bana hetu bonsu muoyi, nupukilangane buena muntu.

²⁷ Mu dina dia Mfumu, ndi nnusengelela ne: nubadile bena ditaba netu bonsu mukanda ewu.

²⁸ Dinanga dia Mfumu wetu Yezu Kristu dishindame munda muenu.