1 Tesalonike 4 - MUKANDA WA MYIDI MUKULU

Mutudi mua kusankisha Mvidi Mukulu

¹ Bana hetu, tuvua banulongeshe binudi ne bua kuenza, bua nusankishe Mvidi Mukulu. Bushuwa nukadi nuenza nanku. Kadi mpindiewu tudi Umulomba, tunusengelela mu dina dia Mfumu Yezu ne: nuenze nupitshishe.

² Bualu nudi bamanye bituvua banulongeshe mu dina dia Mfumu Yezu.

³ Mvidi Mukulu mmusue bua nulekele malu a bundu, nuikale bantu ba tshijila.

⁴ Tatu yonsu amanye mua kusomba ne mukaji mushindu udi usankisha Mvidi Mukulu, usankisha ne bantu.

⁵ Kanulondi lukuka lubi lua mubidi, mudi bantu badi kabayi bamanye Mvidi Mukulu benza.

⁶ Mu bualu ebu, muntu kadingi muntu nende, kamuenzedi bibi. Tukadi bamane kunuambilambila, banubele bikole ne: Mfumu neanyoke badi benza malu a nanku.

⁷ Mvidi Mukulu kena mutubikile bua tuikale bena tshiendenda, kadi amu bua tuikale bantu ba tshijila.

⁸ Muntu udi ubenga mikenji eyi, kena ubenga muntu, kadi udi ubenga Mvidi Mukulu, udi unupa Mueyelu wende wa Tshijila.

⁹ Kanuena nukengela bua tunufundile, nuenu bena ditaba, munudi ne bua kunangangana, bualu Mvidi Mukulu nkayende mmunulongeshe munudi mua kuenzelangana bimpe.

¹⁰ Ke munudi nunanga kabidi bena ditaba ba mu Masedoniya mujima. Kadi, bana hetu, tudi tunusengelela, bua nuenze nupitshishe.

¹¹ Nudibambe bua numone mua kusomba ku matshi talalaa, kanuyi nubuelakana mu malu a bantu bakuabu. Nudipetele biakudia amu ku midimu inudi nukuata, bu mutuvua bamane kunuambila.

¹² Nanku nebanunemeke kudi badi kabayi bena Kristu. Bujitu bua malu enu kabuakuikala pambidi pa muntu nansha umue to.

Mfumu neafike

¹³ Bana hetu, tudi tujinga bua numanye mu bulelela malu adi atangila bantu bafue, bua kanubungami bu bantu bakuabu badi kabayi ne ditekemena.

¹⁴ Tudi bitabe ne: Yezu wakafua, wakabiika kabidi. Ke mutudi tuitaba kabidi ne: bantu bafue batekemene kudi Yezu, Mvidi Mukulu neababishe pamue nende.

¹⁵ Bualu bitudi tulongesha mpindiewu, ke bivua Mfumu mutuambile ne: tuetu batshidi ne muoyi diba diafika Mfumu, katuakudianjidila bantu bafue nansha.

¹⁶ Diba diatuma Mvidi Mukulu diyi, diela mutumibue wa mulongu mubandile lubila, muadi wa mpungi neumvuike. Mfumu neatuluke mu diulu. Nanku bantu bafue batekemene Kristu, nebadianjile kubiika ku bafue.

¹⁷ Pashishe tuetu batshidi ne muoyi diba adi, nebatuambule pamue nabu mu mavuba, bua tusambakene ne Mfumu mulu. Ke mutuikala ne Mfumu matuku onsu tshiendelele.

¹⁸ Nusambangane nanku ne miaku eyi.