1 Samuele 17 - MUKANDA WA MYIDI MUKULU

Davide ne Ngoliyate

¹ Bena Peleshete kusangisha bena mvita bua kuya kuluangana. Kudisangishabu mu tshimenga tshia Soko mu Yuda. Kuasabu mitanda yabu mu Efese-Damime, pankatshi pa tshimenga tshia Soko ne tshia Azeka.

² Shawule ne bena mvita ba bena Izrayele kudisangisha, kuasa mitanda mu tshibandabanda tshia Ela. Pashishe, kuelabu mualu wa mvita, batangilangane ne bena Peleshete.

³ Nanku bena Peleshete ne bena Izrayele bavua bimane pa mikuna ibidi mitangilangane, tshibandabanda pankatshi.

⁴ Muena mvita mukuabu wa bena Peleshete kupatuka mu mulongu bua kufuna bulobu. Uvua wa mu tshimenga tshia Ngate, dina diende Ngoliyate. Uvua bule bu bua metre isatu.

^5-6 Uvua muase tshifulu tshia tshiamu tshikunze ku mutu, muele bitata bia tshiamu tshikunze ku mikolu. Uvua muvuale kazaku ka tshiamu, kikale ne bujitu bua kilo makumi asambombu. Kuelaye difuma dia tshiamu tshikunze ku mukaba uvuaye muela ku diapa.

⁷ Uvua kabidi ne musongolu wa mutshi, uvua bunene bu bua mutshi wa kukuma nawu madiba, muikale ne lusongu lua tshiamu, lua bujitu bua kilo muanda mutekete ne pa mutu. Muena mudimu wa Ngoliyate uvua wenda kumpala kuende, mumuambuila ngabu.

⁸ Ngoliyate kuimana, kuela mbila kudi bena mvita ba bena Izrayele ne: — Nudi bela mualu wa mvita bua tshinyi? Meme Ngoliyate ndi muena Peleshete. Nuenu nudi bapika ba Shawule. Sungulayi muntu umue munkatshi muenu, afike apa bua tuluangane nende.

⁹ Pikala muntu awu mutshimune, munshipe, tuetu bena Peleshete netushale bapika benu. Kadi pangikala mumutshimune, mumushipe, nuenu bena Izrayele nenushale bapika betu.

¹⁰ Lelu ndi mbunda bena mvita ba bena Izrayele, ndi musue kumona bukole buabu. Ntuminayi muntu bua tuluangane nende.

¹¹ Shawule ne bena mvita bende bonsu, bumvue miaku ya muena Peleshete ayi, kukuatshikabu bowa bunene.

¹² Davide uvua muana wa Ishayi wa mu diku dia Efrata, musombele mu tshimenga tshia Betleyeme mu Yuda. Ishayi uvua ne bana ba balume muanda mukulu. Tshikondu atshi tshivua Shawule mukalenga, Ishayi uvua mumane kukola mukulakaje.

^13-14 Bana basatu ba kumpala ba balume ba Ishayi: Eliyabe, Abinadabe ne Shama, bavua munkatshi mua bena mvita. Bavua baye ne Shawule mu mvita bua kuluangana. Kadi Davide muana a mukala,

¹⁵ uvua uya kuenzela Shawule mudimu, kadi uvua upingana misangu mivule ku Betleyeme bua kulama mikoku ya tatuende.

¹⁶ Matuku makumi anayi majima, Ngoliyate, muena Peleshete, uvua anu wimana kumpala kua bena mvita ba bena Izrayele, dinda ne dilolu.

¹⁷ Dituku dikuabu, Ishayi kuambila muanende Davide ne: — Angata tshibombi tshia ntete mikanga etshi ne mampa dikumi aa, uye nabi lukasa mu mitanda, muaba udi bana benu.

¹⁸ Angata kabidi fromaje dikumi eyi, bua kupesha mfumu mulombodi wa bena mvita. Neutangile bana benu, ne badi bimpe. Neuntuadile tshintu tshidi tshinjadikila ne: kakuena bualu to.

¹⁹ Neusangane bana benu mu tshibandabanda tshia Ela, muaba udi Shawule ne bena mvita ba bena Izrayele bonsu baluisha bena Peleshete.

²⁰ Butshia dinda, Davide kushiya mikoku yende kudi mulami mukuabu. Kuangataye bintu bivuaye ne bua kuya nabi. Kuyaye muvua tatuende Ishayi mumutumina diyi. Kufikaye mu mitanda diba divu bena mvita bela mualu wa mvita, bela mbila bua kuya ku mvita.

²¹ Nanku bena Izrayele ne bena Peleshete kuela mualu wa mvita, batangilangane.

²² Davide kushiya bintu bivuaye nabi kudi muntu uvua ulama bintu bionsu. Kuyaye lukasa muaba uvua bena mvita. Kusanganaye bana babu, kubelaye muoyi.

²³ Kadi patshivua Davide uyukila ne bana babu, Ngoliyate muena Peleshete wa mu Ngate, kupita kumpala kua bena mvita babu, ufuna, ukana, bu muvuaye wenzenza misangu yonsu. Davide kumvua bionsu abi.

²⁴ Bena Izrayele bonsu bamone Ngoliyate, kupingana panyima, bualu bavua bamutshina bikole.

²⁵ Kuambilanganabu ne: “Udi mumone muntu ewu! Udi wenza bionsu ebi amu bua kutubunda. Kadi muntu wikale mumutshimune, mumushipe, mukalenga neamunemeshe ne bubanji bua bungi. Neamupe muanende wa bakaji, bua kuikalaye mukajende. Kabidi mu bena Izrayele, mu bena diku dia muntu awu, kabakuikala ne tshilumbu tshia kulambula tshitadi to.”

²⁶ Davide kukonka bena mvita bavua pabuipi nende ne: — Muntu wikale mushipe muena Peleshete ewu bua kusombuela bipendu bidiye upenda bena Izrayele, nebamufute tshinyi? Muena Peleshete ewu, udibu kabayi bateka panshi, upenda bena mvita ba Mvidi Mukulu wa muoyi nnganyi mene?

²⁷ Kuandamunabu Davide, bamuambuluila bintu bionsu bivua mukalenga mulaye muntu wikale mutshimuna Ngoliyate.

²⁸ Kadi, Eliyabe muanabute, mukulu wa Davide, kumvua muvua Davide wakula ne bena mvita, kufikaye munda, ukonka Davide ne: — Udi mufike kuneku bua tshinyi? Mikoku yebe ayi udi mushile nganyi mu thipela? Ndi mukumanye bimpe. Udi kana ka tshianana, kena lutambishi. Uvua mufike kuneku amu bua kumona mvita!

²⁹ Davide kumukonka ne: — Tshibi tshindi muenze ntshinyi? Tshiena mua kuela lukonku anyi?

³⁰ Davide ukoma mukuluende nyima, kutuadija kuyukila ne muena mvita mukuabu. Kutungunukaye ne diebeja malu, wela anu dikonka adi. Muena mvita yonsu uvua anu umuandamuna mushindu umue.

³¹ Bantu bonsu bumvue Davide wakula, kujadikabu ne: bualu ebu mbumutonde bikole. Kuambilabu Shawule. Shawule kubikidisha Davide.

³² Ke Davide kumuambila ne: — Mukalenga, muntu nansha umue kena mua kutshina muena Peleshete ewu to. Meme nenye bua kuluangana nende.

³³ Shawule kuandamuna ne: — Nansha, kuena mua kuluangana nende to. Utshidi muana mukese. Ngoliyate mmuluanangane mvita kutuadija ku buana buende.

³⁴ Davide kuambila kabidi Shawule ne: — Mukalenga pandi ndama mikoku ya tatu, padi nyama wa ntambue nansha wa nkashama, ufikabuakukuatamukoku,

³⁵ ndi ndondakaja nyama awu, mmutuuta, mmunyenga mukoku mukana. Padi nyama awu unduisha, ndi mmukuata mu nshingu, mmushipa.

³⁶ Ke mumvua nshipa nyama ya ntambue ne ya nkashama nanku. Ke mungenzela muena Peleshete ewu, udibu kabayi bateke panshi. Bualu udi upenda bena mvita ba Mvidi Mukulu wa muoyi.

³⁷ Maweja-Nangila uvua mumpandishe ku nzadi ya nyama ya ntambue, ne ya nkashama, neampandishe kabidi ku bianza bia muena Peleshete ewu. Shawule kumuambila ne: — Ndaku, Maweja-Nangila ikale nebe.

³⁸ Shawule kusombesha Davide bilamba biende bia mvita: kumuashishaye tshifulu tshiende tshia tshiamu tshikunze ku mutu, kumueleshaye kazaku kende ka tshiamu.

³⁹ Davide kuasa kabidi muela wa Shawule ku mikaba, mutenteka pa kazaku ka tshiamu. Pashishe kuidikijaye mua kuenda ne bintu abi, kupanga. Bualu kabawa bamulongesha mua kuenda nabi to. Ke Davide kuamba ne: tshiena mua kuenda ne bintu ebi, bualu tshiena muibidile nabi. Nanku kubikopolaye.

⁴⁰ Ke Davide kuambula dikombu diende. Kuyaye ku muelelu wa musulu bua kuangula nsoka itanu, mifmunuke. Kuyelaye mu nsapu wende wa mulami wa mikoku. Pashishe, kuambulaye ndundu wende munene wa kuela nende nsoka, kuyaye kuvua Ngoliyate.

⁴¹ Ngoliyate ne muntu uvua kumpala kuende mumuambuile ngabu, bavua benda basemena pabuipi ne Davide.

⁴² Ngoliyate utangila Davide, kumupepejaye, bualu Davide utshivua muana mukese, muikale ne mubidi mukunze, ne mpala muimpe mutambe.

⁴³ Ngoliyate kuela Davide diyi ne: — Paudi ulua kundi bua kunduisha ne dikombu, udi wela meji ne: meme ndi mbua anyi? Mvidie yonsu ya bena Peleshete ikutshipe!

⁴⁴ Semena apa, nkushipe, tshitalu tshiebe ntshidishe nyunyi ne nyama ya mu tshisuku.

⁴⁵ Davide kuandamuna ne: — Wewe udi ulua kundi ne muela, musongolu ne difuma. Kadi meme ndi nkuluisha mu dina dia Maweja-Nangila Mvidi Mukulu wa biluilu bia bena Izrayele, uudi upenda.

⁴⁶ Lelu ewu, Maweja-Nangila neakufile mu bianza bianyi. Nenkushipe, nkukosa mutu. Lelu ewu, nendishe nyunyi ne nyama ya mu tshisuku bitalu bia bena Peleshete. Nanku bisamba bionsu nebijadike ne: bena Izrayele badi ne Mvidi Mukulu.

⁴⁷ Bena Izrayele bonsu nebajadike ne: Maweja-Nangila bua kutshimunaye, kena ukengela muela, nansha musongolu to. Udi mfumu wa mvita eyi. Neanufile nuenu bena Peleshete mu bianza bietu.

⁴⁸ Ngoliyate kusemena kudi Davide, awu kunyema lubilu bua kusambakena ne Ngoliyate.

⁴⁹ Kuambulaye lusoka mu nsapu wende, kuluteka mu ndundu. Kuluasaye Ngoliyate mu mpala, kubuelalu. Ngoliyate kudishinda, mutue mpala panshi.

⁵⁰ Nanku Davide kutshimuna Ngoliyate, kumushipa anu ne ndundu wa nyunyi ne lusoka, kayi ne muela.

⁵¹ Davide kuya lubilu muaba uvua Ngoliyate, kupatula muela wa Ngoliyate uvua mu tshibubu. Kumukosa mutu. Ke bena Peleshete bamone ne: Davide washipi tshilobu tshietu, kunyemabu lubilu.

⁵² Bena mvita ba bena Izrayele ne ba bena Yuda kuela mbila ya mvita, kulondakaja bena Peleshete too ne mu mushiku wa tshimenga tshia Ngate, ne tshia Ekrone. Bitalu bia bena Peleshete bivua bitangalake panshi mu njila wa ku Sharayime, too ne ku tshimenga tshia Ngate ne tshia Ekrone.

⁵³ Bena Izrayele kulekela kulondakaja bena Peleshete. Kupinganabu bua kupawula bintu bivua mu mitanda ya bena Peleshete.

⁵⁴ Davide kuambula mutu wa Ngoliyate, kuya nawu ku Yerushalayime. Kadi bia mvita bivua nabi Ngoliyate, muntu wa mpolondu, Davide kubiteka mu ntenta wende.

Yonatane udi udia bulunda ne Davide

⁵⁵ Shawule umona ne: Davide wayi kuluangana ne Ngoliyate, kukonkaye Abnere, mfumu mulombodi wa bena mvita bende, ne: — Abnere, nsongalume ewu mmuana wa nganyi? Abnere kuandamuna ne: — Mukalenga, tshiena mumanye to.

⁵⁶ Ke mukalenga kuela diyi, wambila Abnere ne: — Enza muebe muonsu, umanye tatuende.

⁵⁷ Nanku, Davide mumane kushipa Ngoliyate, upingana mu mitanda, Abnere kuya kumukeba. Kuyaye nende kudi Shawule. (Davide utshivua anu ne mutu wa Ngoliyate muena Peleshete mu tshianza).

⁵⁸ Shawule kumukonka ne: — Muananyi, wewe udi muana wa nganyi? Davide kuandamuna ne: — Ndi muana wa muntu webe Ishayi, wa mu Betleyeme.