1 Petro 3 - MUKANDA WA MYIDI MUKULU

Bena dibaka

¹ Nuenu kabidi bakaji, nutumikile babayenu. Nanku bamue ba kudibu badi kabayi bitaba muaku wa Mvidi Mukulu, badi mua kufika ku ditaba, pamonabu binudi nuenza. Nansha kanuyi nuamba bualu,

² nebamone munudi nubanemeka, nuenza amu malu mimpe.

³ Kanukebi kudilengeja amu pambidi, bu munudi nulukisha nsuki, nuvuala bilengejilu bia mpawungi, nansha bilamba bimpe.

⁴ Kadi buimpe buenu buikale bua mundamunda, budi kabuyi bunyanguka. Nuikale ne muoyi wa lutuulu ne wa bupole. Ke bidi ne mushinga muvule ku mesu kua Mvidi Mukulu.

⁵ Ke muvua bakaji ba tshijila ku kale, bavua batekemena kudi Mvidi Mukulu, badilengeja bimpe, bualu bavua batumikila babayabu.

⁶ Ke muvua Sara wenza. Uvua utumikila Abrahame, umuinyika ne: “Mfumu wanyi”. Mpindiewu nenuikale bana bende ba bakaji, panudi nuenza malu mimpe, kanuyi nutshina kalu nansha kamue.

⁷ Nuenu kabidi, balume, nusombe bimpe ne bakaji benu. Numanye ne: badi ne butekete. Nanku nubanemeke, bualu nebapete nenu dipa dia muoyi kudi Mvidi Mukulu. Nuenze nanku bua tshintu nansha tshimue katshieledi ditendelela dienu nkila.

mBimpe kukenga pa mutu pa kukengesha

⁸ Mu tshikosu, bonsu buenu nuikale ne lungenyi lumue, kabidi ne muoyi umue. Nunangangane bu bana ba tatu ne mamu. Nuikale bantu ba muoyi mulenga, badi ne bupuekele munkatshi muabu.

⁹ Kanupingajidianganyi bubi ku bubi. Kanupendi badi banupenda. Kadi badi banuenzela bibi, nubele lupemba, bualu diba divua Mvidi Mukulu munubikile, uvua mulaye kabidi bua kunuela lupemba.

¹⁰ mBafunde mu Mukanda wa tshijila ne: “Muntu udi musue kusanka panu, kupeta ne diakalenga, alekele kujana bantu, alekele kushima.

¹¹ Abenge malu mabi, enze malu mimpe. Asombe talalaa ne bantu bonsu, kayi upungila.

¹² Bualu Maweja-Nangila udi utangila badi benza malu mimpe, uteleja ditendelela diabu. Kadi udi uluisha badi benza bibi.”

¹³ Panudi basuminyine kuenza malu mimpe, udi mua kunuenzela bibi nnganyi?

¹⁴ Nudi amu bena diakalenga, nansha banukengesha bua malu mimpe anudi nuenza. Kanutshinyi bantu. Kanupampakanyi.

¹⁵ Kadi mu mioyi yenu nunemeke Kristu bu Mfumu wenu. Diba dionsu nuikale amu ne muoyi wa kuandamuna bonsu badi banukonka ne: nu-tumvuije ditekemena didi munda muenu.

¹⁶ Kadi nubandamune ne lutuulu, kabidi ne kanemu. Nudimuke bua kondu kenu ka munda kakanupishi. Nanku badi banusonguela, banujana, bua malu mimpe anudi nuenza, bualu nudi nulonda Kristu, nebafue bundu bua bivuabu bamba abi.

¹⁷ Bualu mbimpe banukengeshe, padi Mvidi Mukulu musue, bua malu mimpe anudi nuenza, pa mutu pa kunukengesha bua malu enu mabi.

¹⁸ Bualu Kristu mene mmufue musangu umue bua kashidi, bualu bua mibi ya bantu. Yeye, uvua kayi ne bualu, mmufuile bena tshibawu, bua kunufikisha kudi Mvidi Mukulu. mBamushipe, bualu uvua muntu. Kadi mbamubishe ku bafue ku bukole bua Mueyelu wa Tshijila.

¹⁹ Amu ku bukole bua Mueyelu ewu, mmuye kulongesha bavua mu kandondu ka bafue Lumu lua Disanka.

²⁰ Ke bantu bavua babenge kutumikila Mvidi Mukulu ku kale. Mvidi Mukulu uvua windila ne lutuulu, mu tshikondu tshivua Nowa muenze buatu. Bantu bakese, bonsu basanga amu muanda mukulu, ke bavua babuele mu buatu, bapandile ku mayi.

²¹ Mayi aa adi tshimfuanyi tshia mayi mudibu banutua mpindiewu bua kunusungidila. Kabena batua muntu mu mayi aa, amu bua kumusha manyanu a pambidi. Kadi badi balomba Mvidi Mukulu bua umushe mibi yonsu idi kondu kenu ka munda kanupisha. Padibu banutua mu mayi, Mvidi Mukulu udi unusungidila, bualu Yezu Kristu mmubike ku bafue,

²² mubande mu diulu, musombe ku diboku dia bukole dia Mvidi Mukulu Tatu. Ke muaba udi batumibue, mamfumu makuabu, ne makole a mu diulu bitabe bumfumu buende.