1 Petro 2 - MUKANDA WA MYIDI MUKULU

Dibue dia muoyi ne bantu ba tshijila

¹ Nanku nubenge malu mabi onsu: dishima, mpala ibidi, lubabu ne bijanu.

² Nufuane bana batekete badibu balela mpindiewu. Bu mudibu bajinga mabele, adibu kabayi basambakaja ne tshintu tshikuabu, nuenu kabidi nujinge kumanya muaku wa Mvidi Mukulu amu pa wowu, bua numone mua kukola nawu mu ditaba, kupeta lupandu.

³ Bualu “nudi badijadikile mudi Maweja-Nangila mulenga mutambe,” mudibu bafunde mu Mukanda wa tshijila.

⁴ Semenayi kudi Mfumu. Yeye ke dibue dia muoyi, divua bantu bimanshe, kadi divua Mvidi Mukulu musungule, mudiangate ne mushinga.

⁵ Nudifile bu mabue a muoyi, bua Mueyelu wa Tshijila umone mua kuibaka nenu nzubu wa Mvidi Mukulu. Nanku nenuikale tshisumbu tshia batuangaji ba tshijila, badi ne bua kulambula Mvidi Mukulu milambu, idi imusankisha bualu bua Yezu Kristu.

⁶ Bualu badi bafunde mu Mukanda wa tshijila ne: “Ndi mudisunguile dibue dia mushinga mukole, dindi nteka mpindiewu bu dibue dia mu ditumba pa mukuna wa Siyone. Udi utekemena kudidi, kakufua bundu musangu nansha umue.”

⁷ Dibue edi didi dia mushinga mukole bualu buenu nuenu badi bitaba. Kadi bua badi kabayi bitaba, mbafunde ne: “Dibue divua bibaki bimanshe, ke didi dienza dibue didi diambula bujitu bujima.”

⁸ Muaba mukuabu mbafunde kabidi ne: “Ke dibue didi dishinda bantu, lubuebue ludi lubaponesha panshyi.” Bantu bavua batetuka, bualu bavua babenge kuitaba muaku. Ke tshivua Mvidi Mukulu mubalongoluele.

⁹ Kadi nuenu nudi tshisamba tshisungula. Nudi batuangaji ba Mukalenga, tshisamba tshia tshijila, bantu ba Mvidi Mukulu. mBanusungule bua kumanyisha bantu malu a dikema adi Mvidi Mukulu muenze. Bualu uvua munubikile bua nupatuke mu miidima, nubuele mu butoke buende bupite buimpe.

¹⁰ Kale kanuvua bantu ba Mvidi Mukulu. Mpindiewu nudi bantu bende. Kale kanuvua bamanye luse lua Mvidi Mukulu. Kadi mpindiewu nudi balupete.

Nuikale bantu ba Mvidi Mukulu

¹¹ Bana hetu basuibue, bu munudi benyi ne bena tshimuangi panu, ndi nnulomba ne: nudilame ku majinga a buntu buenu adi aluisha muoyi wenu wa kulu.

¹² Nuenze malu mimpe munkatshi mua bantu ba bisamba bikuabu. Nanku nansha bobu banushiminyina ne: nudi benji ba malu mabi, pafika Mvidi Mukulu nebajingulule malu enu mimpe. Diba adi nebatumbishe Mvidi Mukulu.

¹³ Mudi Mfumu musue, nuitabe muntu yonsu udi ne bumfumu. Nutumikile mukalenga wa bakalenga udi ku mutu kua bonsu.

¹⁴ Nutumikile balombodi bende ba matunga, badiye mufume bua kunyoka badi benza bibi, kabidi bua kutua badi benza bimpe makumbu.

¹⁵ Bualu Mvidi Mukulu mmusue bua nuenze malu mimpe. Nanku nenupuwishe bantu batatakane badi kabayi bamanye tshintu.

¹⁶ Nuikale ne nsombelu wa bantu badi benza mudibu basue. Kadi panudi nuenza munudi basue, kanuambi ne: tudi mua kuenza kabidi malu mabi mu musokoku. Nuenze amu malu adi bantu ba Mvidi Mukulu mua kuenza.

¹⁷ Nunemeke bantu bonsu. Nunange bena ditaba nenu. Nutshine Mvidi Mukulu. Nunemeke mukalenga wa bakalenga.

Kristu udi utuleja njila

¹⁸ Nuenu bapika, tumikilayi bamfumu benu, nubanemeke muenu muonsu. Kanunemeki amu badi ne muoyi muimpe wa kalolo nutumikile ne badi ne malu makole.

¹⁹ Paudi ukeba kukumbaja bidi Mvidi Mukulu musue, umvua ne lutuulu makenga adibu bakukengesha nawu kapayi bualu, Mvidi Mukulu neakuele lupemba.

²⁰ Kadi paudi umvua ne lutuulu mituutu idibu bakutuuta, bualu uvua muenze bibi, udi mua kupeta lumu anyi? Nanku paudi ukenga, ulama lutuulu, bualu uvua muenze bimpe, Mvidi Mukulu neakuele lupemba.

²¹ Ke tshidi Mvidi Mukulu munubikidile, bualu Kristu kabidi uvua mukenge bualu buenu, munushile tshilejilu, bua nulonde makasa ende.

²² Kristu kavua muenze malu mabi. Bantu kabavua bamumvue musangu nansha umue wakula miaku ya dishima.

²³ Pa wabu bamupende, kavua mupingaje bipendu. Pavuaye ukenga, kavua ukanyina bantu. Kadi uvua utekemena amu kudi Mvidi Mukulu, udi ukosa nsambu pa yoyi.

²⁴ Kristu mene uvua muambule pambidi pende mibi yetu pa mutshi mutshiamakane, bua tuetu, bafue bua bubi, tuende ne muoyi, tuenze bidi Mvidi Mukulu musue. mBanuondape ku mputa ivuabu bamutape.

²⁵ Bualu nuvua bu mikoku mipambuke njila. Kadi mpindiewu mbanupingaje kudi mulami udi mua kunuludika mu njila, kulama mioyi yenu.