1 Kulondolola 4 - MUKANDA WA MYIDI MUKULU

Ndelanganyi mikuabu ya Yuda

¹ Ndelanganyi ya Yuda idi nenku: Perese, Esrone, Karmi, Ure, Shobale.

² Reyaya, muana wa Shobale, uvua tatuende wa Yakate. Yakate uvua tatuende wa Akumayi ne Lakade. Bana ba ndekelu aba ke nkambua ya meku a bena Sora.

^3-4 Ure, muanabute wa Efrata, ke uvua muase tshimenga tshia Betleyeme. Bana bende ba balume badi nenku: Etame, Yizreyele, Ishema ne Idbashe. Uvua kabidi ne muana wa bakaji umue: Aslelponi. Pashishe uvua kabidi ne bana babidi: Penuwele, uvua muase tshimenga tshia Ngedore, ne Egere uvua muase tshimenga tshia Usha.

⁵ Ashekure uvua muase tshimenga tshia Tekowa. Uvua musele bakaji babidi: Ela ne Naara.

⁶ Naara uvua mulele bana ba balume banayi: Akuzame, Efere, Temni ne Akashetari.

⁷ Ela uvua mulele bana basatu: Serete, Sokare ne Etnane.

⁸ Kose uvua tatuende wa Anube ne wa Sobeba. Yeye ke nkambua wa bena Akarekele, muana wa Arume.

⁹ Yabese uvua mumanyike bikole munkatshi mua bana babu. Mamuende uvua mumuinyike dina dia Yabese, bualu mamu uvua musame bikole pa kumulela.

¹⁰ Yabese uvua utendelela Mvidi Mukulu wamba ne: “Mvidi Mukulu wa bena Izrayele, ungele lupemba, umvudijile bindi nabi, undame. Kadi ungumbushile diakabi ne makenga!” Mvidi Mukulu kumupesha tshivuaye umulomba.

¹¹ Kelube, nuanabu ne Shuka, uvua tatuende wa Mekire. Mekire uvua tatuende wa Eshetone.

¹² Eshetone uvua tatuende wa Bete-Rafa, Pasheya ne Tekina. Tekina ke uvua muase tshimenga tshia Nakashe. Ndelanganyi yabu ivua misombe mu tshimenga tshia Reka.

¹³ Bana ba balume ba Kenaze badi: Otniyele ne Seraya. Bana ba balume ba Otniyele badi: Atate ne Meyonotayi.

¹⁴ Meyonotayi ke tatuende wa Ofra. Seraya uvua tatuende wa Yowabe. Yowabe ke nkambua wa bena midimu ya bianza bavua basomba mu tshibandabanda tshivuabu binyike ne: ntshia bena midimu ya bianza.

¹⁵ Kalebe, muana wa Yefune, uvua mulele bana ba balume basatu: Iru, Ela ne Naame. Ela uvua tatuende wa Kenaze.

¹⁶ Bana ba balume ba Yakalelele badi nenku: Zife, Zifa, Tiriya ne Asharele.

^17-18 Bana ba balume ba Ezra badi nenku: Yetere, Merede, Efere ne Yalone. Merede uvua musele Bitya, muana wa mukalenga wa bena Ejipitu. Bitya uvua mulelele Merede bana basatu: Miriyame, Shamayi ne Isheba. Isheba uvua muase tshimenga tshia Eshtemowa. Merede uvua musele kabidi mukaji wa bena Yuda. Mukaji awu kumulelela bana basatu. Yerede uvua muase tshimenga tshia Ngedore. Ebere uvua muase tshimenga tshia Soko. Yekutyele uvua muase tshimenga tshia Zanowa.

¹⁹ Odya uvua musele muanabu ne Nakame. Ndelanganyi yabu ivua bena Ngarmi bavua base mu tshimenga tshia Keyila, ne bena Makati bavua base mu Eshtemowa.

²⁰ Bana ba balume ba Shimone badi: Amnone, Rina, Bena-Anane ne Tilone. Ndelanganyi ya Isheyi ivua Zokete ne muanende wa balume.

²¹ Ndelanganyi ya Shela, muana wa Yuda, ivua nenku: Ere uvua muase tshimenga tshia Leka. Lada uvua muase tshimenga tshia Maresha. Leka uvua kabidi nkambua wa bena meku a badi benza bilamba bia buanda bua ndanda: ke bavua basombe ku Bete-Ashebeya.

²² Shela uvua kabidi nkambua wa Yokime, wa bantu bavua basombe mu Kozeba, ne wa Yowashe ne Sarafe, bavua basela bakaji ba bena Mowabe bangabanga ne kupinganabu bua kusomba ku Lekeme — malu aa nga kalekale. —

²³ Ndelanganyi yabu ivua bafumbi ba ngesu, ivua misombe mu Netayime ne mu Ngedera bua kuenzela mukalenga midimu.

Ndelanganyi ya Shimeyone

²⁴ Bana ba balume ba Shimeyone badi nenku: Nemuwele, Yamine, Yaribe, Zera ne Shawule.

²⁵ Ndelanganyi ya munda mua Shawule menemene idi nenku: Shalume, Mibsame, ne Mishema.

²⁶ Ndelanganyi ya Mishema idi nenku: Amuwele, Zakure ne Shimeyi.

²⁷ Shimeyi uvua mulele bana ba balume dikumi ne basambombu, ne ba bakaji basambombu. Kadi bamfumu ba meku makuabu kabavua ne bana ba bungi to. Ke padi meku a mu tshisamba tshia Shimeyone ne bantu bakese, kadi a tshia Yuda ne bantu ba bungi.

^28-32 Too ne mu tshikondu tshivua Davide mubuele mu bukalenga, ndelanganyi ya Shimeyone ivua misombe mu bimenga, ne mu misoku ivua nabi mutumba: ke Bersheba, Molada, Ashare-Shuwale, Bila, Esheme, Tolade, Betuwele, Orma, Siklaje, Bete-Markabote, Ashare-Sushime, Bete-Biri ne mu Sharayime. Bavua basomba kabidi mu bimenga bikuabu bitanu: Etame, Ayine, Rimone, Tokene ne Ashane,

³³ ne mu misoku yonsu ya pa mpenga pa bimenga ebi, too ne ku musoku wa Baalate. Ke misoku ivuabu basombe ayi. Bavua bafunda mena a meku abu mu mikanda.

^34-38 Mena a bamfumu ba meku a Shimeyone avua nenku: Meshobabe, Yamleke, Yosha, muana wa balume wa Amashiya, Yowele, Yeku, muana wa balume wa Yoshibiya, Yoshibiya mene uvua muana wa balume wa Seraya, kabidi muikulu wa Ashiyele, Eliyokenayi, Yakoba, Yeshokaya, Ashaya, Adiyele, Yeshimiyele, Benaya ne Ziza. Ziza awu uvua muana wa Shifeyi, kabidi muikulu wa Alone. Alone uvua wa ku ndelanganyi ya Yedaya, Shimri ne Shemaya. Meku abu avua mavulangane,

³⁹ kutangalakabu too ne ku mielelu ya tshimenga tshia Ngedore ku luseke ludi diba dipatukila lua tshibandabanda, bualu bavua bakeba muaba udi bisosa bia kudiisha bimuna biabu.

⁴⁰ Kusanganabu bisosa bia bungi bilenga mu buloba bualabale, butalale, kamuyi mutoyi. Ke muaba uvua ndelanganyi ya Kame misombe kale.

⁴¹ Nenku mu tshikondu tshia Izkiya, mukalenga wa bena Yuda, bamfumu ba meku a Shimeyone batuvua batela abu, kufikabu mu ditunga. Kubangabu ntenta ne tuzubu bivua ndelanganyi ya Kame misombe. Kubutulabu bantu bonsu bavua basombamu. Kabatshiena batela ndelanganyi ayi kabidi too ne ku lelu. Pashishe ndelanganyi ya Shimeyone kusomba muaba awu, bualu muvua bisosa bilenga bia kudiisha bimuna.

⁴² Bantu bakuabu ba mu tshisamba tshia Shimeyone nkama itanu, kuya mu buloba bua mikuna ya bena Edome. Bantu abu bavua babalombola kudi bana ba Isheyi banayi: Pelatiya, Neyariya, Refaya ne Uziyele.

⁴³ Kushipabu bena Ameleke bavua banyemenamu. Bobu kuasa muaba awu. Ndelanganyi yabu itshidimu ne ku lelu.