1 Kulondolola 20 - MUKANDA WA MYIDI MUKULU

Yowabe udi ukuata tshimenga tshia Raba

¹ Ku ntuadijilu wa tshidimu, — tshikondu tshitu bakalenga baya ku mvita, — Yowabe mfumu wa bena mvita, kuya ne tshiluilu tshia bena Izrayele, bua kunyanga buloba bua bena Amone, ne bua kuela tshimenga tshinene tshia Raba munkatshi. Kadi Davide uvua amu mushale mu Yerushalayime. Tshikondu atshi, Yowabe mfumu wa bena mvita, kukuata tshimenga tshia Raba, kutshibutula.

² Davide kuangata tshifulu tshia bukalenga tshivua ku mutu wa Milkome, mvidie wa bena Amone. Tshifulu atshi tshivua tshia tshiamu tshia mpawungi. Tshivua ne bujitu bua kilo makumi asatu ne pa mutu. Nenku dibue dia mushinga mukole divua pa tshifulu apu, kudiasabu pa tshifulu tshia bukalenga tshia Davide. Mu tshimenga atshi bavua bapawule kabidi bintu bivule.

³ Bena tshimenga bavua Davide mukuate muye nabu, kubebejaye midimu mikole ya kupanda mabaya, kusonga mabue ne ya kuupula mitshi. Nenku bena bimenga bikuabu bionsu bia bena Amone, Davide uvua ubenzeja midimu ya mushindu ewu. Pashishe Davide kupingana mu tshimenga tshia Yerushalayime ne bena mvita bende bonsu.

Badi baluisha bena Peleshete

⁴ Pashishe bena Izrayele kuluisha bena Peleshete mu Ngezere. Mu mvita ayi, Sibkayi, wa mu tshimenga tshia Usha, kushipa Sipayi wa ku ndelanganyi ya bena Refayime. Bena Peleshete kufua bundu.

⁵ Mu mvita mikuabu ivuabu baluisha bena Peleshete, Elanane, muana wa Yayire, kushipa Lami, muanabu ne Ngoliyate wamu tshimenga tshia Ngate. Mutshi wa musongolu uvua nawu Lami uvua munene bu mubambu wa kukuma nawu madiba.

⁶ Kuluanganabu kabidi ku Ngate. Muluishi mukuabu uvua muaba awu, muntu wa kafiondu, muikale ne minu isambombu ku tshianza tshionsu ne bana ba nkasa basambombu ku dikasa dionsu. Bionsu bivua makumi abidi ne binayi. Muntu awu uvua pende wa ku ndelanganyi ya Arafa.

⁷ Kupendaye bena Izrayele. Nenku Yonatane, muana wa Shama, muana wa muanabu ne Davide, kushipa muntu awu.

⁸ Nanku, bena mvita aba ba bena Peleshete, ndelanganyi ya Arafa, muena Ngate, kubashipabu kudi Davide ne bena mvita bende.