1 Kulondolola 16 - MUKANDA WA MYIDI MUKULU

¹ Bambudi kuya kuteka mushete mu ntenta uvua Davide muashile mushete awu. Pashishe Davide kulambula Mvidi Mukulu milambu ya kuosha ne ya bobumue.

² Davide mumane kulambula milambu ayi, kuelaye bena Izrayele lupemba mu dina dia Maweja-Nangila.

³ Pashishe kuabanyinaye bena Izrayele biakudia. Mulume yonsu ne mukaji bavua bapeta diampa, mukata muenza ne bimuma bia date, ne mukata muenza ne tumuma tua mvinyo tuume.

Bena Levi badi batumbisha Maweja-Nangila

⁴ Davide kusungula bena Levi bakuabu, kubateka kumpala kua mushete wa Maweja-Nangila, bua bimbe misambu mu luendu lua mazengu, batungunuke ne mudimu awu wa kutumbisha, kutendakena ne kusamuna Maweja-Nangila Mvidi Mukulu wa bena Izrayele.

⁵ Ashafe ke uvua ulombola bantu abu, bamuambuluisha kudi Zekarya. Yaziyele, Shemiramote, Yekiyele, Matitiya, Eliyabe, Benaya, Obede-Edome ne Yeyele, bavua bimba lunkombe ne lunzenze. Ashafe uvua unyungisha ndibu.

⁶ Batuangaji Benaya ne Yaziyele bavua bela amu kuela mpungi kumpala kua mushete wa tshijila.

⁷ Dituku adi, ke musangu wa kumpala uvua Davide musungule Ashafe ne bantu bende bua kutumbishabu Maweja-Nangila, bamba ne:

⁸ Anyishayi Maweja-Nangila, elayi mbila, ambilayi bantu mudiye Mvidi Mukulu wenu. Manyishayi bukua bisamba bionsu bidiye muenze.

⁹ Muimbilayi, numusamune ne misambu. Vuluijayi bantu bishima biende bionsu.

¹⁰ Sankayi, nudisue, bualu tudi bantu bende. Nuditembe bualu yeye ke Mvidi Mukulu wa tshijila. Nuenu badi batendelela Maweja-Nangila, sankayi.

¹¹ Kebayi Maweja-Nangila, bualu udi muena bukole buonsu. Nukebe matuku onsu munudi mua kusemena kudiye.

^12-13 Nuenu, ndelanganyi ya muntu wende Izrayele, nuenu, bana ba Yakobe, bavuaye musungule, vulukayi bishima bivuaye mukumbaje, vulukayi malu a kukema avuaye muenze, vulukayi nsambu ivuaye mukose.

¹⁴ Yeye ke Maweja-Nangila, Mvidi Mukulu wetu! Buloba bujima budi ku bumfumu buende!

¹⁵ Vulukayi nuwuaye mutue netu ndondu wa kashidi, muvuaye mulaye bualu budi butangila ndelanganyi yonsu.

¹⁶ Ke dilaya divuaye mulaye Abrahame. Ke mutshipu uvuaye muditshipe kudi Izake.

¹⁷ Ke diyi divuaye mujadikile Yakobe, Ke ndondu wa kashidi uvuaye mutue ne bena Izrayele.

¹⁸ Kumuambilaye ne: “Ndi nkupa buloba bua Kenaane. Ke ditunga dindi munupe, wewe ne ndelanganyi yebe.”

¹⁹ Diba adi, bantu ba Mvidi Mukulu batshivua bakese. Batshivua bamue bena tshimuangi mu ditunga dia Kenaane.

²⁰ Bavua bendakana baye ku tshisamba ne ku tshisamba, ku bukalenga ne ku bukuabu.

²¹ Kadi Mvidi Mukulu kawa musue bua muntu abakengeshe. Kubelaye bakalenga bualu buabu, wamba ne:

²² “Kanulengi bantu banyi, bandi mujidile. Kanuenzedi bambi ba diyi dianyi bibi!”

²³ Imbilayi Maweja-Nangila misambu, nuenu ba mu buloba bujima. Ambilayi bantu ku dituku ku dituku ne: udi Musungidi.

²⁴ Manyishayi bantu bonsu butumbi buende. Manyishayi bukua bisamba malu a dikema adiye muenze.

²⁵ Maweja-Nangila udi munene, wa kutumbisha bipite, wa kutshina ku mutu kua mvidie yonsu.

²⁶ Mvidie ya bukua bisamba yonsu idi tshianana. Kadi Maweja-Nangila mmufuke diulu!

²⁷ Ke padiye ne butumbi ne bumfumu, muaba udiye mmuwule ne lumu, kabidi ne disanka.

²⁸ Bena bisamba bionsu, wayi, nukukuile Maweja-Nangila, imbayi butumbi buende, itabayi ne bumfumu buende.

²⁹ Luayi, samunayi Maweja-Nangila. Tualayi milambu, nuye kumpala kuende. Mutuilayi binu, nudiele panshi, padiye uleja mudiye wa tshijila.

³⁰ Nuenu bantu ba buloba bujima, zakalayi kumpala kua Maweja-Nangila. Bavua bashindika buloba, kabayi mua kubunyungisha.

³¹ Diulu disanke! Buloba busanguluke! Ambilayi bantu bonsu ne: “Maweja-Nangila udi mukalenga!”

³² Mayi manene akungule! Bia muoyi bionsu bidimu bikungule! Mpata isangale, ne bionsu bidi bimenamu!

³³ Bukua mitshi yonsu ya muitu, buele mbila ya disanka kumpala kua Maweja-Nangila, bualu udi uvua kukosa nsambu pa yoyi pa buloba.

³⁴ Tumbishayi Maweja-Nangila, bualu mmulenga, dinanga diende ndia kashidi.

³⁵ Muelayi mbila, nuambe ne: “Mvidi Mukulu Mupandishi wetu, umpandishe, umpatule mu matunga a bende, musangishe muaba umue. Nenku, netukutumbishe. Netukutumbishe tutela dina diebe dia tshijila. Netukusamune tuleja musangelu.”

³⁶ Elayi Maweja-Nangila Mvidi Mukulu wa Izrayele, tuasakidila, numuelayi tuasakidila lelu ne kashidi. Bantu bonsu kupunguluja ne: “Amene! Tumbishayi Maweja-Nangila!”

³⁷ Pashishe Davide kutumina Ashafe diyi ne bena mulongu nende, bua bashale pabuipi ne mushete wa ndondu wa Maweja-Nangila, bakumbaje midimu yabu, kabayi bapumbisha, amu muvuabu balongolole bia kuenza ku dituku ku dituku.

³⁸ Kusungulaye Obede-Edome, ne bana babu makumi asambombu ne muanda mukulu, bua babambuluishe. Obede-Edome, muana wa Yedutune, ne Osha bavua ne bua kulama biibi.

³⁹ Davide kupesha mutuangaji Sadoke, ne batuangaji ba mu diku diende, mudimu wa nzubu wa Maweja-Nangila, uvua pa muaba wa tshijila wa mu Ngibone.

⁴⁰ Bavua ne bua kufila milambu ya kuosha ku tshilambuilu ku dituku dionsu, dinda ne dilolu. Bavua ne bua kukumbaja midimu yonsu ivua Maweja-Nangila mubafundile mu mikenji ivua bena Izrayele bapete kudiye.

⁴¹ Bavua ne Emane, Yedutune ne bantu bakuabu bavuabu basungule amu bua batumbishe Maweja-Nangila, bua dinanga diende dia kashidi.

⁴² Emane ne Yedutune bavua ne mpungi ne ndibu ya bena misambu. Bavua kabidi ne bikuabu biamu bia kuimba nabi misambu ya tshijila. Bana ba Yedutune bavua balami ba biibi.

⁴³ Pashishe muntu yonsu kupingana ku nzubu kuende. Davide pende kupingana kuende, kuelaye bena diende muoyi.