1 Kulondolola 14 - MUKANDA WA MYIDI MUKULU

Davide mu Yerushalayime

¹ Irame, mukalenga wa Tire, kutuma bantu kudi Davide. Kumutuminaye ne mitshi ya sedre, kabidi ne basongi ba mabue ne bena mudimu wa mabaya, bua bibakile Davide nzubu wa bukalenga.

² Nanku Davide kujadika ne: Maweja-Nangila ke uvua mumupe bukalenga bua bena Izrayele, kabidi ke uvua mubushindike, bualu uvua munange bantu bende bena Izrayele.

³ Davide wakasela bakaji bakuabu ku Yerushalayime. Kulelaye bana ba balume ne ba bakaji.

⁴ Bana ba balume ba wabu bamulelela mu Yerushalayime badi nenku: Shamuwa, Shobabe, Natane, Shelomu,

⁵ Ibare, Elishuwa, Elpelete,

⁶ Noga, Nefege, Yafiya,

⁷ Elishama, Beyeliyada ne Elifelete.

Davide udi utshimuna bena Peleshete

⁸ Bena Peleshete kupeta lumu ne: mbamane kujidila Davide, bua kuikalaye mukalenga wa bena Izrayele bonsu. Nanku bena Peleshete bonsu kuya kuluisha Davide bua kumukuata. Davide upeta lumu lua mvita alu, kuyaye bua kuluangana nabu.

⁹ Bena Peleshete kufika mu tshibandabanda tshia bena Refayime, kubanga kutshinyangakaja.

¹⁰ Davide kukonka Mvidi Mukulu ne: — Ndi mua kuluisha bena Peleshete anyi? Neubafile mu bianza bianyi anyi? Mvidi Mukulu kuitaba ne: — Eyowa, uye kubaluisha. Meme nembafile mu bianza biebe.

¹¹ Bena Peleshete kuya too ne ku Baale-Perashime, kuvua Davide mubatshimuine. Davide kuamba ne: — Maweja-Nangila kupandulula baluishi banyi kumpala kuanyi, amu bu mudi mayi abumbula nkila. Ke padibu binyika muaba awu ne: Baale-Perashime, mmumue ne: “Mfumu udi ubumbula Nkila.”

¹² Pavua bena Peleshete banyema, bavua bashiya mpingu ya mvidie yabu muaba awu. Davide kutuma diyi bua bayoshe.

¹³ Bena Peleshete kubanga tshiakabidi kunyangakaja tshibandabanda tshia bena Refayime.

¹⁴ Davide kukonka tshiakabidi Mvidi Mukulu. Mvidi Mukulu kuandamuna ne: — Kuena mua kubaluisha mutangilangane nabu nansha. Londa njila mukuabu, usemene pabuipi nabu mu ditu dia mitshi ya mikokuliye.

¹⁵ Kadi paumvua mikuma ku nsongu ya mitshi, utuadije mvita. Bualu ke diba mene dindi mpita kumpala kuebe bua kukutshimuna mvita ya bena Peleshete.

¹⁶ Davide kuenza muvua Maweja-Nangila muambe. Bena Izrayele kutshimuna bena Peleshete, kubalondakaja bituadije ku Ngibone too ne ku Ngezere.

¹⁷ Bituadije ku tshikondu atshi, lumu lua Davide kutangalaka matunga onsu. Maweja-Nangila kukolesha Davide bua bukua matunga bumutshine.