1 Kulondolola 12 - MUKANDA WA MYIDI MUKULU

Bena mvita bavua ne Davide mu Siklaje

¹ Tshikondu tshivua Davide musokome mu Siklaje, unyema Shawule, muana wa Kishe, bantu bakuabu bavua baye kudisanga nende. Bantu abu bavua bena mvita ba bukitu, bavua banyisha mua kumuambuluisha mu mvita.

² Bavua ne mata a mikete ne bintu bia kuela nabi mabue. Bavua bamanye mua kuela mabue, nansha kuela mikete nansha ne tshianza tshia balume nansha ne tshianza tshia bakaji mene. Mena a bantu bavua badisanga nende ba mu tshisamba tshia Binyamine, tshisamba menemene tshia Shawule, adi nenku:

³ Mfumu wa tshisumbu ke Akiyezere ne muanabu Yowashe muana wa Shema wa mu tshimenga tshia Ngibeya. Muvua kabidi Yeziyele ne Pelete, bana ba Azmavete, Bereka ne Yeku bena mu Anatote,

⁴ Ishemaya, muena mu Ngibone, umue wa ku bamfumu ba tshisumbu tshia bena mvita Makumi asatu.

⁵ Irmeya, Yaziyele, Yowanane ne Yozabade wa mu Ngedera,

⁶ Eluzayi, Yerimote, Beyaliya, Shemariya ne Shefatya ba mu Arufe,

⁷ Elkana, Ishiya, Azarele, Yoyezere ne Yashobame, ndelanganyi ya Kora,

⁸ kabidi ne Yoyela ne Zebadya bana ba Yerowame wa mu Ngedore.

⁹ Bantu bakuabu kumuka mu tshisamba tshia Ngade, bua kuya mu tshipela muvua Davide munyemene. Bantu abu bavua bena mvita ba bukitu, bamanye mua kuluangana ne ngabu ne mafuma. Bavua bafuanangana ne ntambue ku lonji, banyema lubilu mu mikuna amu bu nyama wa ntole.

^10-14 Bantu abu bavua dikumi ne umue, mena abu adi: Ezere, Obadya, Eliyabe, Mishemana, Irmeya, Atayi, Eliyele, Yowanane, Elzabade, Irmeya ne Makbanayi.

¹⁵ Bena Ngade bonsu aba, bavua bamfumu ba bena mvita. Uvua mushadile ku bukitu munkatshi muabu, uvua mua kutshimuna bena mvita lukama; uvua ne bukitu uvua utshimuna bena mvita tshinunu.

¹⁶ Bobu aba ke bavua basabuke Yardene mu ngondu wa kumpala wa tshidimu, tshikondu tshidi mayi apasalala nseke yonsu. Kuipatabu bantu bonsu bavua base mu bibandabanda nansha bia kudi diba dipatukila nansha bia kudidi dibuelela.

¹⁷ Tshisumbu tshia bena Binyamine ne tshia bena Yuda kuya kaba kawa Davide munyemene.

¹⁸ Davide kuya kubakidila, ubambila ne: — Panuikala bafike kundi ne ditalala bua kungambuluisha, ndi nnuakidila ne muoyi mujima. Kadi panuikala bangelele tshifufu bua kumfila kudi baluishi banyi, nansha tshiyi muenze bualu bubi, Mvidi Mukulu wa bankambua betu amone bualu abu, anunyoke.

¹⁹ Nanku Mueyelu wa Mvidi Mukulu kutulukila Amashayi, mulombodi wa “Tshisumbu tshia bena mvita Makumi asatu.” Kuelaye lubila, wamba ne: — Tudi nebe, tudi ku luseke luebe wewe, Davide, muana wa Ishayi! Upete diakalenga, wewe ne bonsu badi bakuambuluisha, bualu Maweja-Nangila mmumane kukuambuluisha. Ke Davide kubakidila, kubateka balombodi ba bena mvita bende.

²⁰ Bantu ba mu tshisamba tshia Menashe bakafua bamane kumyuangana ne Davide, tshikondu tshivua Davide ne bena Peleshete baye kuluisha Shawule. Bushuwa, Davide ne bantu bavuaye nabu kabavua badisanga ne bena Peleshete bua kuluangana to. Bualu balombodi ba bena mvita ba bena Peleshete bavua babipata, bambilangana munkatshi muabu ne: “Davide neadisange ne mfumuende wa kale Shawule, bua kutufila mu bianza biende.”

²¹ Nanku, diba divua Davide upingana mu tshimenga tshia Siklaje, bantu ba bena Menashe, bavua badisanga kudiye: ke Adna, Yozabade, Yediyayele, Mikayele, Yozabade, Eliku ne Siltayi. Bonsu aba bavua balombodi ba bena mvita ba bena Menashe.

²² Bonsu bavua bena mvita ba bukitu, bavua bafika bua kuambuluisha bisumbu bia bena mvita bia Davide. Pashishe kushalabu bulombodi ba tshiluilu tshia Davide.

²³ Nanku, ku dituku dionsu, bena mvita bavua badisangisha ne Davide bua kuluangana mvita. Ke muvua bena mvita ba Davide benda bavu-langana amu kuelangana.

Bantu bavua badisanga ne Davide mu Ebrone

²⁴ Bantu bavua bamanye mua kuluangana bavua badisanga kudi Davide mu Ebrone bua kumupesha bukalenga buvua nabu Shawule bilondeshile diyi dia Maweja-Nangila, badi nenku:

²⁵ Bena mvita ba mu tshisamba tshia Yuda bavua ne ngabu ne mafuma, bavua 6.800.

²⁶ Bena mvita ba bukitu ba mu tshisamba tshia Shimeyone bavua 7.100.

²⁷ Bena mu tshisamba tshia Levi bavua 4.600.

²⁸ Muvua kabidi Yoyada, mfumu wa diku dia Arone, ne bantu 3.700.

²⁹ Kuvua kabidi nsongalume mukuabu, diende Sadoke, muena mvita wa bukitu, ne bamfumu 22 ba mu tshiota tshiabu.

³⁰ Bena tshisamba tshia Binyamine, tshisamba mene tshia Shawule, bavua ne bantu 3.000. Ba bungi ba kudibu bavua benzela diku dia Shawule mudimu too ne ku diba adi.

³¹ Bena mvita ba bukitu ba mu tshisamba tshia Efrayime bavua 20.800. Bena mvita aba bavua bamanyike bikole mu meku abu.

³² Tshia bibidi tshimue tshia bena Menashe bavua base luseke ludi diba dibuelela lua Yardene bavua 18.000. Ke bantu ba wabu basungule bua kuya kubanjija Davide mu bukalenga.

³³ Kuvua kabidi balombodi ba mvita 200 ba mu tshisamba tshia Isakare, pamue ne bena mvita babu. Ke bantu bavua bamanye mua kujingulula diba didi bena Izrayele ne bua kuenza bualu, ne mudibu mua kubukumbaja.

³⁴ Bena mvita ba mu tshisamba tshia Zebulone bavua bantu 50.000. Bavua balonge mvita bikole, bikale ne bia mvita bia mishindu yonsu, bamanye mua kuela mualu wa mvita, balondangane bimpe bitambe mu milongu.

³⁵ Kuvua kabidi balombodi ba bena mvita 1.000 ne bena mvita babu 37.000 ba mu tshisamba tshia Naftali, bikale ne ngabu ne misongolu ya mvita.

³⁶ Kuvua bena mvita ba tshisamba tshia Dane 28.600 bavua bamane kudilongolola bua kuela mualu.

³⁷ Kuvua bena mvita ba mu tshisamba tshia Ashere 40.000 bamane kudilongolola pabu bua kuela mualu, kabidi bavuale bia mvita bia mishindu yonsu.

³⁸ Kuvua bantu ba mu bisamba bivua biase luseke ludi diba dipatukila lua Yardene, ba bena Rubene, bena Ngade ne bena Menashe, 120.000, bikale ne bia mvita bia mishindu yonsu.

³⁹ Bena mvita bonsu aba bamane kudilongolola bua kuela mualu wa mvita, kufikabu mu Ebrone ne muoyi mutoke bua kubanjija Davide mu bukalenga bua bena Izrayele bonsu. Bena Izrayele bakuabu bonsu bavua amu banyisha bua kupesha Davide bukalenga abu.

⁴⁰ Kushalabu mu Ebrone pamue ne Davide matuku asatu, badia, banua bivuabu babalambila kudi bana babu.

⁴¹ Kabidi bantu ba mu maloba avuabu nawu mutumba, too ne bena Isakare, bena Zebulone ne bena Naftali, kubabadila biakudia bivule, biambula kudi nyama ya mpunde, ya tumelu, ya tubalu ne ya ngombe. Bavua bafika ne bukula, mikata mienza ne bimuma bia mfiku, tumuma tua mvinyo tuume, maluvu ne mafuta. Bavua bafika kabidi ne ngombe ne mikooku. Bualu ditunga dijima divua amu ne disanka.