1 Korente 7 - MUKANDA WA MYIDI MUKULU

Nkonku ya pa malu a dibaka

¹ Tuandamune mpindiewu ku nkonku inuvua bangele mu mukanda unuvua bantumine. Nudi nuamba ne: “Bidi bimpe bua mulume kikadi ne mukaji to.”

² Eyowa, kadi bu mudi malu a bundu matampakane bikole, bidi bipite buimpe bua mulume yonsu ikale ne mukajende, bua mukaji yonsu kabidi ikale ne bayende.

³ Mulume yonsu enzele mukajende bidiye ne bua kumuenzela. Mukaji kabidi enzele bayende bidiye ne bua kumuenzela.

⁴ Mukaji kena mua kudienzela malu ne mubidi wende, bualu mubidi wende ngwa bayende. Mushindu umue, mulume kena mua kudienzela malu ne mubidi wende, bualu mubidi wende ngwa mukajende.

⁵ Kanubenganganyi mu nzubu. Panuikala basue kubengangana nanku, nuanji kumonangana. Nuenze kabidi nanku amu bua matuku makese, bua numone mua kutendelela muenu muonsu. Pashishe nudisange tshiakabidi mu nzubu, muenu mua tshibidilu. Kanuyi benze nanku, nudi mua kupanga kudilama, diabolu udi mua kunuteya, kunutshimuna.

⁶ Ndi nnuambila ebi bua kunuambuluisha, ki mbua kunuelela mukenji to.

⁷ Bulelela, dijinga dianyi didi ne: bantu bonsu bikale mundi. Kadi Mvidi Mukulu udi upesha muntu yonsu diende dipa, muntu yonsu diende.

⁸ Bindi ngambila bantu bajike, ne bakaji bakamba, mbiobi ebi: mbimpe nushale nkayenu, nuikale mundi.

⁹ Kadi panudi kanuyi mua kudikolela, nubuele mu dibaka. Bidi bipite buimpe kubuela mu dibaka, pa mutu pa kushala ne dialakana mu muoyi.

¹⁰ Bena ditaba badi baselangana, ndi mbelela mukenji (udi kauyi wanyi, kadi wa kudi Mfumu) wa ne: mukaji udi ku dibaka, kena ne bua kumuka kudi bayende.

¹¹ — Padiye umuka kudi bayende, kabuedi mu dibaka dikuabu to. Kadi udi mua ku-mvuangana tshiakabidi ne bayende, kupingana kudiye. — Mulume kabidi udi mu dibaka, kena ne bua kuipata mukajende.

¹² Bindi ngamba mpindiewu kabiena bifuma kudi Mfumu to. Meme nkayanyi ndi mbiamba ne: pikala mulume muena ditaba ne mukaji udi kayi muena ditaba, mukajende awu muanyishe bua kushala nende mu dibaka, kena ne bua kumuipata nansha.

¹³ Momumue, pikala mukaji muena ditaba ne bayende udi kayi muena ditaba, mulume awu muanyishe bua kushala nende mu dibaka, mukaji kena ne bua kumubenga nansha.

¹⁴ Bualu mulume udi kayi muena ditaba, Mvidi Mukulu udi umuanyisha, bua padiye udisanga ne mukajende muena ditaba. Kabidi mukaji udi kayi muena ditaba, Mvidi Mukulu udi umuanyisha, bua padiye udisanga ne bayende muena ditaba. Bu biobi kabiyi nanku, bana badibu balela bavua mua kuikala ne mikiya, baledi kabayi mua kumonangana nabu. Kadi bana babu badi bantu ba tshijila, badi Mvidi Mukulu wanyisha.

¹⁵ Kadi pikala mulume nansha mukaji, udi kayi muena ditaba, musue kubengangana ne muena dibaka nende udi muena ditaba, nuanyishe bua enze amu nanku. Diba adi muena ditaba, mulume nansha mukaji, udi mua kuenza bidiye musue. Bualu Mvidi Mukulu mmunubikile bua nusombe mu bupole.

¹⁶ Wewe mukaji muena ditaba, udi mua kujadika ne: neusungidile bayebe anyi? Nansha wewe mulume muena ditaba, udi mua kujadika ne: neusungidile mukajebe anyi?

Nushale munuvua

¹⁷ Pa kumusha amu bualu bumvua munuambile abu, ndi ngela mukenji ewu mu Bisumbu bionsu bia bena ditaba ne: muntu yonsu asombe bilondeshile dipa divuaye mupete kudi Mvidi Mukulu, kabidi ashale muvuaye diba divua Mvidi Mukulu mumubikile.

¹⁸ Pikalabu bamane kuteka muntu panshi, diba divua Mvidi Mukulu mumubikile, muntu awu kakebi mua kusokoka bualu abu nansha. Pikalabu kabayi bamane kuteka muntu panshi, diba divua Mvidi Mukulu mumubikile, kena ne bua kuditekeshisha panshi nansha.

¹⁹ Nansha bakuteke panshi, nansha kabayi bakuteke panshi, ki mbualu to. Tshidi ne bualu nkutumikila mikenji ya Mvidi Mukulu.

²⁰ Muntu yonsu ashale muende mutataye diba divua Mvidi Mukulu mumubikile.

²¹ Ne uvua mupika diba divua Mvidi Mukulu mukubikile, kupampakanyi nansha. Kadi paudi upeta mushindu wa kupatuka mu bupika, upatuke.

²² Bualu mupika uvua Mvidi Mukulu mubikile, mbamane kumupikula, bualu ukadi wa Mfumu. Momumue kabidi, muntu uvua kayi mupika diba divua Kristu mumubikile, ukadi mupika wa Kristu.

²³ Mvidi Mukulu uvua munusumbe, muhite mushinga. Nanku kanudienji bapika ba bantu.

²⁴ Eyowa, bana hetu, muntu yonsu ashale kumpala kua Mvidi Mukulu muende muvuaye diba divua Mvidi Mukulu mumubikile.

Nkonku ya pa bantu bajike, ne bakaji bakamba

²⁵ Ndi ngandamuna ku nkonku yenu ya pa bantu badi kabayi mu dibaka. Bindi ngamba ebi ki mbia kudi Mfumu to. Ndi mfila meji mundi mumone. Bu mudi Mfumu mumfuile luse, nudi amu mua kuitaba bindi ngamba.

²⁶ Bu mutudi tshikondu tshia dikenga, ndi ngela meji ne: mbimpe muntu yonsu ashale muende mudiye.

²⁷ Wewe ne mukaji, nanku kukebi mua kulekelangana nende. Kuyi ne mukaji, nanku kukebi kubuela mu dibaka.

²⁸ Kadi paudi usela, kuena wenza bualu bubi. Padi nsongakaji uya ku dibaka, kena wenza bualu bubi. Kadi ndi musue kunuepula ku ntatu ya matuku onsu idi bantu badi mu dibaka nayi.

²⁹ Bana hetu, ndi musue kuamba nunku: matuku mmashale makese. Kutuadijila mpindiewu, bantu badi basele, basombe bu badi kabayi ne bakaji;

³⁰ badi badila, basombe bu badi kabayi ne dibungama; badi baseka, basombe bu badi kabayi ne disanka; badi basumba bintu, basombe bu badi kabayi ne bivuabu basumbe;

³¹ badi bakuata mudimu ne bia panu, basombe bu badi kabayi bakuata nabi mudimu. Bualu bia panu kabiena binenga kabidi mutantshi mule to.

³² Mvua musue kunuepula ku ntatu yonsu. Udi kayi mu dibaka, udi usumpakana bua malu a Mfumu, ukeba kusankisha Mfumu.

³³ Kadi udi mu dibaka, udi usumpakana bua malu a panu, ukeba kusankisha mukajende.

³⁴ Muoyi wende udi usumpakana ne: ngenze etshi, ngenze tshiatshia. Mukaji kabidi udi kayi mu dibaka, nansha nsongakaji, udi usumpakana bua malu a Mfumu, bualu udi ukeba kusankisha Mfumu mu bionsu bidiye wenza, nansha wela meji. Kadi mukaji udi mu dibaka, udi usumpakana bua malu a panu, ukeba kusankisha bayende.

³⁵ Ndi ngamba nanku bua kunuenzela bimpe, ki mbua kunuenzeja malu ku bukole. Ndi musue bua nuenze amu malu mimpe, nukuatshile Mfumu mudimu muenu muonsu.

³⁶ Tuyayi mu bualu bua badi babangilangana. Padi nsongalume ne dijinga dikole, umona ne: meme tshiyi musele nsongakaji awu, ndi mmuenzela bibi, mbimpe baselangane mudibu basue. Kabena benza bualu bubi to.

³⁷ Kadi padi muntu, kabayi bamuenzeje ku bukole, mujadike munda muende ne: tshiena musue kusela, mumanye kabidi mua kudikolela, mbimpe alame amu dipangadika dia kubenga kubuela ne nsongakaji ewu mu dibaka.

³⁸ Nanku udi ubuela mu dibaka ne mubangila wende, udi wenza bimpe. Kadi udi kayi ubuela nende mu dibaka, udi wenza bimpe bipite.

³⁹ Mukaji udi mu dibaka, kena mua kuenza mudiye musue, patshidi bayende ne muoyi. Amu bayende mumane kufua, udi mua kubuela mu dibaka ne muntu udiye musue. Kadi muntu awu ikale amu muena ditaba.

⁴⁰ Kadi bu yeye mua kushala mukamba, neikale ne disanka dipite. Ke tshindi ngela meji. Ndi ngitaba ne: nansha meme ndi ne Mueyelu wa Mvidi Mukulu.