1 Korente 5 - MUKANDA WA MYIDI MUKULU

Malu a bundu mu Tshisumbu tshia bena ditaba

¹ Tudi bumvue bamba miaba yonsu ne: kuenu eku mbenze malu a bundu bupite, adi nansha bantu ba bisamba bikuabu kabayi benza. Bualu badi balonda ne: umue wa kunudi udi usomba ne mukaji wa tatuende!

² Kadi munudi nuditemba kabidi mmunyi? Nuvua ne bua kubungama, kumusha muntu awu munkatshi muenu.

³ Nansha tshiyi munkatshi muenu ne mubidi, kadi ndi nenu ku bukole bua Mueyelu. Nkadi mumane kukosa mu dina dia Yezu Mfumu wetu tshilumbu tshia muntu uvua muenze bibi awu, amu bu meme muikale munkatshi muenu.

⁴ Ke mudi dikosa dia tshilumbu tshiende nenku: nusangile muaba umue. Meme nengikale nenu ku bukole bua Mueyelu mu dina dia Yezu Mfumu wetu.

⁵ Nanku tufile muntu awu kudi diabolu bua kubutula mubidi wende, kadi bua kusungidila mueyelu wende dituku dia Mfumu.

⁶ Tshinudi mua kuditambishila ntshinyi? Nudi bamanye lusumuinu lua ne: “Buanga bukese bua mampa budi butuntumuna tshitapitapi tshionsu.”

⁷ Umushayi buanga bua mampa bukulukulu bua mibi ebu, bua nuikale kanuyi ne kalema nansha kamue. Nanku nenuikale bu tshitapitapi tshipiatshipia katshiyi tshiela buanga. Ke munukadi bulelela. Bualu bakadi bamane kulambula Kristu, muana wa mukoku wetu, bua kubanga tshibilu tshietu tshia Dipita dia Maweja-Nangila.

⁸ Nanku tuenzayi tshibilu tshietu. Kadi katuena mua kutshienza, kudia mampa mela buanga bukulukulu, buanga bua bubi, ne bua malu a bundu. Tudie amu mampa kaayi mela buanga, mampa a bunonoke, ne a bulelela.

⁹ Mvua munulombe mu mukanda mukuabu ne: kanubuelakanyi ne bena malu a bundu.

¹⁰ Tshivua musue kuamba ne: nulekele kuendakana panu ne bonsu badi benza malu a bundu, nansha ne bena lukuka lua biuma, bivi, anyi batendeledi ba mvidie. Bualu bu nuenu basue kuepuka bonsu abu, nudi ne bua kumuka panu!

¹¹ Mvua musue kunuambila ne: kanubuelakanyi ne muntu udi udiamba ne: ndi ndonda Kristu, kadi muikale muenji wa malu a bundu, muena lukuka lua biuma, mutendeledi wa mvidie, munyangi walumu lua bende, mukuatshiki wa maluvu, nansha muivi. Nansha bua kudia ne muntu wa nanku, kanudi nende to.

¹² Bualu tshiena mua kulumbuluisha badi kabayi mu tshisumbu tshietu.

¹³ Mvidi Mukulu neabalumbuluishe. Kadi kanuena ne bua kulumbuluisha badi mu tshisumbu tshienu anyi? Nudi amu ne bua kulumbuluisha! Bualu Mukanda wa tshijila udi wamba ne: “Ipatayi muntu mubi munkatshi muenu.”