1 Korente 3 - MUKANDA WA MYIDI MUKULU

Tudi bena mudimu ba Mvidi Mukulu

¹ Bana hetu, tshivua musue kuyukila nenu, mudibu bayukila ne bantu badi Mueyelu wa Mvidi Mukulu ulombola nansha. Kadi mvua ne bua kunuyukidisha mudibu bayukila ne bantu batshidi ne meji a buntu, batshidi bana mu ditaba.

² Ke pamvua mununuishe mabele, tshiyi mua kunupa biakudia bikole, bualu kanuena banji kupeta bukole bua kubidia. Nansha mpindiewu mene kanuena banji kupeta bukole bua kubidia,

³ bualu nutshidi nusomba bu bantu ba panu. Nudi nubabangana, nutandangana. Ke bidi bileja ne: nudi bantu ba panu, nuenza amu bidi bantu bakuabu bonsu benza.

⁴ Padi umue wa kunudi wamba ne: “Meme ndi ndonda Polu,” munga ne: “Ndi ndonda Apolose,” kanuena nuenza bu bantu batshidi ne meji a panu anyi?

⁵ Kadi Apolose mene nnganyi? Polu kabidi nnganyi? Tudi amu bena mudimu ba Mvidi Mukulu, bayua banufikisha ku ditaba. Yonsu wa kutudi udi ukumbaja mudimu udi Mfumu mumufundile.

⁶ Mvua mukune maminu, Apolose kuamiamina mayi. Kadi Mvidi Mukulu ke udi wamenesha.

⁷ Nanku mudimu wa mukunyi, ne wa mumiaminyi wa mayi, udi wa patupu. Kadi udi wenza bualu, ke Mvidi Mukulu. Bualu Yeye udi umenesha.

⁸ Mudimu wa mukunyi, ne mudimu wa mumiaminyi wa mayi, udi wa mushinga wa momumue. Mvidi Mukulu neafute muntu yonsu diende difutu, bilondeshile mushindu udiye ukumbaja mudimu wende.

⁹ Bualu tudi tukuatshila Mvidi Mukulu mudimu amu umue, kabidi nuenu nudi budimi bua Mvidi Mukulu. Tudi mua kuamba kabidi ne: nudi nzubu wa Mvidi Mukulu.

¹⁰ Bilondeshile dipa dimvua mupete patupu kudi Mvidi Mukulu, mvua mulongolole bia kuasa nabi nzubu, meme kuibaka kabidi tshitaku. Mpindiewu mukuabu udi ubandisha bimana. Kadi muntu yonsu amanye mushindu udiye ne bua kuibaka.

¹¹ Bualu mbamane kuibaka tshitaku, ke Yezu Kristu. Kabena mua kutshijula, kupingaja tshikuabu.

¹² Bamue badi babandisha pa tshitaku atshi bimana bia mpawungi, nansha bia tshiamu tshitoke tshia mushinga mukole, nansha bia mabue a mushinga mukole. Bakuabu badi babibandisha bienza ne mabaya, nansha ne mitshi, nansha ne nsona mene.

¹³ Kadi mushinga wa mudimu wa muntu yonsu neumueneke dituku dia Tshilumbuluilu, bualu dituku adi kapia nekateme. Kapia aka nekatete mudimu wa muntu yonsu, bua kuleja mushinga wawu.

¹⁴ Pikala muntu mubandishe pa tshitaku bimana bidi kapia kakayi mua kuosha, neapete difutu.

¹⁵ Kadi pikala kapia kosha nzubu uvuaye muase, neapange difutu. Kadi yeye mene nebamusungidile, mudi muntu upitshila lubilu mu kapia bua kupanda.

¹⁶ Nudi bamanye bulelela ne: nudi nzubu wa Mvidi Mukulu; kabidi ne: Mueyelu wa Mvidi Mukulu udi usomba munda muenu.

¹⁷ Nanku padi muntu upula nzubu wa Mvidi Mukulu, Mvidi Mukulu neamupule ne yeye kabidi. Bualu nzubu wa Mvidi Mukulu udi wa tshijila. Nzubu wende awu ke nuenu mene.

¹⁸ Muntu kaditshimbishi. Pikala muntu wa kunudi uditangila bu muena meji wa panuapa, adienze mupale, bua apete meji a bushuwa.

¹⁹ Bualu meji a panu adi bupale kumpala kua Mvidi Mukulu. Ke mudi Mukanda wa tshijila wamba ne: “Mvidi Mukulu udi ukuata bena meji mu buteyi bua budimu buabu.”

²⁰ Mukanda udi wamba kabidi ne: “Maweja-Nangila udi ujingulula meji adi bantu bela, udi mumanye ne: adi a tshianana.”

²¹ Nanku muntu kena ne bua kuditemba bua balongeshi bende. Bualu bionsu mbienu:

²² Polu, Apolose, nansha Petro, bukua panu bujima, muoyi ne lufu, lelu ne malaba, bionsu mbienu.

²³ Kadi nuenu nudi bantu ba Kristu, Kristu pende udi wa Mvidi Mukulu.