1 Korente 15 - MUKANDA WA MYIDI MUKULU

Yezu mmubike ku lufu

¹ Bana hetu, mpindiewu ndi musue kunuvuluija Lumu lua Disanka lumvua munulongeshe. Nuvua baluitabe, baluangate bu nshindamenu wa ditaba dienu.

² Lumu alu ludi kutusungidila panudi nululama mushindu umvua munulongeshelu. Kanuyi benza nanku, nudi babuele mu njila wa ditaba anu patupu.

³ Mvua munulongeshe malu avuabu bandongeshe: Bualu bupite bunene mbobu ebu: Kristu mmufue bua mibi yetu, muvua Mikanda ya tshijila midianza kuamba.

⁴ Mbamujike. Kadi mmubike ku lufu dituku disatu, muvua Mikanda ya tshijila mimane kuamba.

⁵ Uvua mumuenekele Petro, pashishe bapostolu dikumi ne babidi.

⁶ Pashishe uvua mumuenekele balongi bende bapite pa nkama itanu musangu umue. Bavule ba kudibu batshidi ne muoyi, bamue mbamane kufua.

⁷ Pashishe kumuenekelaye Yakobe, ku ndekelu, mmudileje kudi bapostolu bonsu.

⁸ Kunyima kua bonsu aba mmumuenekele ne meme, nansha muvuabu bandele muana wa kabishi mu ditaba.

⁹ Bulelela, ndi mushadile kudi bapostolu bonsu, tshiena nansha mukumbane bua bambikile mupostolu, bualu mvua mukengeshe Tshisumbu tshia bena ditaba.

¹⁰ Kadi bu muvua Mvidi Mukulu munnange, nkadi bu mundi emu. Dinanga diende divua dikuata mudimu munda muanyi. Ndi mukuate mudimu mupite bapostolu bakuabu bonsu. Uvua ukuata mudimu awu ki mmeme to, kadi Mvidi Mukulu pamue nanyi, bualu uvua munnange.

¹¹ Dilongesha edi, nansha nuenu badipeta kundi, nansha kudi bapostolu bakuabu, didi amu dia momumue. Bindi mulongesha ebi, ke bidi bapostolu bakuabu balongeshe, ke binudi nuitaba.

Netubike ku lufu

¹² Patudi tulongesha ne: Kristu mmubike ku lufu, mmunyi mudi bamue ba kunudi bamba ne: bafue kabakubika ku lufu?

¹³ Pikala bafue bulelela kabayi babika ku lufu, nanku Kristu kabidi kavua mubike ku lufu nansha kakese.

¹⁴ Pikala Kristu kayi mubike ku lufu, katuena ne tshitudi mua kulongesha to. Kanuena ne tshinudi ne bua kuitaba to.

¹⁵ Diba adi tudi tushiminyina Mvidi Mukulu malu, bualu tudi tujadika ne: mutubishe Kristu ku lufu, padiye kayi mumubishe. Bualu kena mua kumubisha, pikala bafue bulelela kabayi mua kubika ku lufu.

¹⁶ Bualu pikala bafue kabayi mua kubika ku lufu, nanku Kristu kena mubike ku lufu.

¹⁷ Pikala Kristu kayi mubike ku lufu, ditaba dienu kadiena ne tshipeta. Nanku ki mbanji kunujimijila mibi yenu.

¹⁸ Diba adi kabidi bayua bafue bamane kuitaba Kristu mbajimine.

¹⁹ Patudi tutekemena Kristu amu bua matuku atudi tusomba panu, diakabi dietu ndipite dia bantu bakuabu bonsu.

²⁰ Kadi Kristu mmubike ku lufu bulelela. Ke patudi mua kujadika ne: bafue bakuabu kabidi nebabike ku lufu.

²¹ Bualu bu mudi lufu lufume kudi muntu umue, ke mudi dibiika dia ku bafue kabidi difume kudi muntu umue.

²² Bu mudi bantu bonsu bafue bualu mbadisange ne Adame, ke mudi bantu bonsu ne bua kubika ku lufu padibu badisanga ne Kristu.

²³ Kadi muntu yonsu udi ubika mu wende mulongu. Kristu ke ntungamulongu wa bantu bonsu badi babika. Padiye upingana panu, badi bende nebabike kabidi.

²⁴ Pashishe nshikidilu udi ufika. Kristu neapite makalenga, mamfumu ne makole onsu a panu ku bukole. Neapeshe Mvidi Mukulu Tatuende Bukalenga.

²⁵ Bualu Kristu udi ne bua kuikala mukalenga too ne padi Mvidi Mukulu utshimuna bena lukuna bonsu, ubateka kuinshi kua makasa ende.

²⁶ Muena lukuna wa nshikidilu wabutulabu ndufu.

²⁷ Bualu Mukanda wa tshijila udi wamba ne: “Mvidi Mukulu mmumutekele bionsu kuinshi kua makasa.” Kadi padibu bamba ne: “Mmumutekele bionsu kuinshi kua makasa ende,” muaku ewu: “bionsu” kawena musue kuamba ne: Mvidi Mukulu, udi muteke bionsu ku bumfumu bua Kristu mmuditeke ne yeye mene nanku.

²⁸ Padi bintu bionsu bimane kuitaba bumfumu bua Kristu, nanku Muana mene neaditeke ku bumfumu bua Mvidi Mukulu, uvua muteke bionsu ku bumfumu buende. Diba adi Mvidi Mukulu nkayende neikale mukalenga udi wenza bionsu munda mua bonsu.

²⁹ Elayi meji ku bidi bienzeka mu tshisumbu tshietu: bamue badi babatue mu mayi mu dina dia bantu bafue bavuabu kabayi batue nanku. Padi bafue kabayi babike ku lufu, tshidibu batekemena kupeta ntshinyi? Diba adi badi banyisha bua babatue nanku bua tshinyi?

³⁰ Tuetu kabidi tudi tudiela mu njiwu diba dionsu bua tshinyi?

³¹ Bana hetu bu mundi nnujadikila ne: ndi mua kuditemba bulelela bualu buenu, bualu nudi badisanga ne Mfumu wetu, ke mundi njadika kabidi ne ndi mu njiwu ya lufu matuku onsu.

³² Bu meme muluangane ne “Nyama wa lonji” munu mu Efeze amu bua kupeta bia panu, bimvua mupete mbinganyi? Nanku padi bafhe kabayi babika ku lufu, ndondayi kasumuinu ka ne: “Tudiayi, tunuayi, bualu maloba tudi tufue.”

³³ Kanudishimi: “Panudi nuenda ne balunda babi, nenunyanguke.”

³⁴ Mbimpe nupete tshiakabidi meji mempe. Lekelayi kuenza malu mabi. Bamue ba kunudi kabena bamanye Mvidi Mukulu to, ke bundu buenu!

Netubike munyi?

³⁵ Bumue nenunkonke ne: “Kadi bafue nebabike ku lufu mushindu kaayi? Nebapete mibidi ya mushindu kaayi?”

³⁶ Udi mubule meji anyi? Lutete luudi ukuna ludi lutoloke amu padilu lufila.

³⁷ Tshiudi ukuna tshidi amu ntete patupu, nansha ya kuenza bukula, nansha mikuabu. Kadi kuvua mukuna mutshi to.

³⁸ Ku lutete alu, Mvidi Mukulu udi umenesha mutshi mudiye musue, ku lutete luonsu walu mutshi.

³⁹ Bintu bidi ne muoyi, kabiena bionsu ne mubidi wa momumue to. Bantu badi ne wabu, nyama ne wayi, nyunyi ne wayi, mishipa kabidi ne wayi.

⁴⁰ Mudi kabidi mibidi ya mu diulu, ne mibidi ya pa buloba. Buimpe bua mibidi ya mu diulu, budi bushilangane ne bua mibidi ya pa buloba.

⁴¹ Diba didi ne buimpe buadi, ngondu udi ne buende, mitotu ne buayi. Nansha mitotu mene kayena yonsu ne buimpe bua momumue to.

⁴² Ke bidi bienzeka diba didi bantu babike. Tshidibu bajika ntshintu tshidi tshibola kadi tshidi tshibika netshikale tshia kashidi.

⁴³ Tshidibu bamiamina ntshintu tshitekete tshia tshianana, kadi tshidi tshibika netshikale ne lumu kabidi ne bukole.

⁴⁴ Tshidibu bajika mmubidi wa buntu, tshidi tshibika mmubidi udi upeta muoyi kudi Mueyelu. Nenku padi mubidi wa buntu muikaleku, mubidi udi upeta muoyi kudi Mueyelu udiku kabidi.

⁴⁵ Bualu Mukanda wa tshijila udi wamba ne: “Adame muntu wa kumpala uvua mupete muoyi,” kadi Adame wa ndekelu udiku ku bukole bua udi ufila muoyi.

⁴⁶ Kadi tshidi tshidianza kutuadija mmubidi wa buntu, pashishe Mueyelu udi ulonda.

⁴⁷ Adame wa kumpala bayua bamuenze ne buloba. Kadi Adame muibidi mmufume mu diulu.

⁴⁸ Ba pa buloba mbafuanangane ne udibu benza ne buloba. Kadi ba mu diulu mbafuanangane ne udi mufume mu diulu.

⁴⁹ Nanku bu mutuvua bafuane muntu uvuabu benza ne buloba, netufuanangane ne udi mufuma mu diulu.

⁵⁰ Bana hetu, ndi njadika ne: bantu badi ne mubidi wa buntu, kabena mua kubuela mu bukalenga bua Mvidi Mukulu. Bidi bibola kabiena mua kupeta bidi bishala kashidi.

⁵¹ Mpindiewu ndi nnusokoluela bualu busokome: katuakufua bonsu, kadi bonsu netuandamuke,

⁵² mu katupa kipi, mu mubunyi wa disu, padila mpungi wa ndekelu. Bualu padibu bela mpungi awu, bafue nebabike ku lufu, bua bashale ne muoyi kashidi. Bonsu netuandamuke.

⁵³ Bualu tshidi tshibola tshidi ne bua kuandamuka, tshienza tshidi tshishala kashidi. Tshidi tshifua tshidi ne bua kuandamuka, tshienza tshidi katshiyi mua kufua.

⁵⁴ Pikala tshidi tshibola tshimana kuandamuka tshienza tshidi tshishala kashidi, pikala tshidi tshifua tshimana kuandamuka tshienza tshidi katshiyi mua kufua, muaku ewu wa mu Mukanda wa tshijila udi ukumbana ne: “Mbabutule lufu, mbalutshimune kashidi!”

⁵⁵ “Lufu, kutshimuna kuebe kuepi? Lufu bukole buebe bua kushipangana budi penyi?”

⁵⁶ Lufu ludi lupeta bukole bua kushipangana kudi bubi. Bubi budi bupeta bukole kudi mikenji.

⁵⁷ Kadi tudi tuela Mvidi Mukulu tuasakidila, bualu tudi tutshimuine kudi Mfumu wetu Kristu.

⁵⁸ Nenku, bana hetu basuibue, shindamayi bikole, kanunyungi. Tungunukayi amu kutungunuka nuye kumpala. Nutungunuje mudimu wa Mfumu. Numanye ne: mudimu unudi nukuata badisange ne Mfumu kawena wa patupu.