1 Korente 14 - MUKANDA WA MYIDI MUKULU

Mutudi mua kukuata mudimu ne mapa a Mueyelu wa Tshijila

¹ Nanku, kebayi nangananga bua nupete dinanga. Jingayi kabidi mapa a kudi Mueyelu wa Mvidi Mukulu, nangananga dipa dia buambi.

² Bualu udi wakula miakulu idi bantu kabayi bamanye, kena uyukila ne bantu, kadi amu ne Mvidi Mukulu, bualu muntu nansha umue kena ujingulula bidiye wamba. Ku bukole bua Mueyelu udi wamba malu masokome.

³ Kadi muambi udi wambila bantu malu adi Mvidi Mukulu mumuambile, udi uyukila ne bantu, bua kubakolesha mu ditaba, kubatua nyama ku mikolu, ne kubasamba.

⁴ Udi wakula mu miakulu idi bantu kabayi bamanye, udi udikolesha amu yeye nkayende mu ditaba. Kadi udi umanyisha bantu malu adi Mvidi Mukulu mumuambile, udi wambuluisha Tshisumbu tshijima tshia bena ditaba.

⁵ Ndi musue bua nuakule bonsu miakulu idi bantu kabayi bamanye. Kadi ndi mpita kujinga bua nuikale ne dipa dia kumanyisha bantu malu adi Mvidi Mukulu munuambile. Bualu udi ne dipa edi, udi utamba kuambuluisha bantu bipite muntu udi wakula miakulu idi bantu kabayi bamanye. Muntu udi wakula nanku udi mua kuambuluisha Tshisumbu tshijima tshia bena ditaba, amu padi muntu mua kumvuija bidiye wamba.

⁶ Bana hetu, ndi nnuebeja ne: meme mufike kuenu aku ngakula miakulu idi bantu kabayi bamanye, nennuambuluishe ku tshinyi? Nennuambuluishe amu pandi mmanyisha malu adi Mvidi Mukulu mungambile, nkolesha dimanya dienu, nnulondela malu a kudi Mvidi Mukulu, nansha unulongesha bualu kampanda.

⁷ Tufuanyikija ne biombelu bu lushiba nansha lunzenze. Bu meyi a biombelu abi kaayi adila ntendu mishilangane, kabena mua kusunguluja musambu udibu bimba.

⁸ Padi muntu wela mpungi kayi umanyisha bualu patoke, wadilongolola ku mvita nnganyi?

⁹ Momumue binudi nuamba mu miakulu idi bantu kabayi bamanye, bu biobi kabiyi biumvuika, bantu nebajingulule binudi nuambe munyi? Miaku yenu neijimine mu lupepele.

¹⁰ Panuapa padi miaku kabukabu. Kadi kakuena muakulu udi bantu kabayi bumvua.

¹¹ Pandi tshiyi mumanye muakulu udibu bayukila nanyi, udi uyukila nanyi udi muenyi kundi, ne meme kabidi kudiye.

¹² Nanku bu munudi ne nzala ya kupeta mapa a kudi Mueyelu wa Tshijila, kebayi nangananga mapa adi ambuluisha Tshisumbu tshia bena ditaba.

¹³ Nanku udi wakula mu miakulu idi bantu kabayi bamanye, udi mua kulomba kudi Mvidi Mukulu dipa dia kuyumvuija.

¹⁴ Bualu pandi ntendelela, ngakula mu miakulu idi bantu kabayi bamanye, Mueyelu udi utendelela munda muanyi. Kadi lungenyi luanyi kaluena ku ditendelela adi to.

¹⁵ Kadi ngenze tshinyi? Nengenze bionsu bibidi, nentendelele pamue ne Mueyelu wanyi, nentendelele kabidi ne lungenyi. Nengimbe misambu ne Mueyelu wanyi, nengimbe misambu kabidi pamue ne lungenyi luanyi.

¹⁶ Paudi wela Mvidi Mukulu tuasakidila mu Mueyelu nkayawu, muntu mukuabu udi ubuela mu tshisangilu awu, udi mua kudisanga nenu mu ditendelela bishi? Bu mudiye kayi umvua binudi nuamba, kena mua kuitaba amene nansha.

¹⁷ Nansha wewe utendelela bimpe bitambe, wela Mvidi Mukulu tuasakidila, kuena wambuluisha muntu awu mu ditaba diende nansha.

¹⁸ Ndi ngela Mvidi Mukulu tuasakidila, bualu ndi ngakula miakulu idi bantu kabayi bamanye, munupite nuenu bonsu.

¹⁹ Kadi padi bena ditaba badisanga pamue, ndi musue kuakula miaku itanu idi yumvuika, bua kulongesha bakuabu, pamutu pa kuakula miaku binunu ne binunu mu miakulu idi bantu kabayi mua kumvua.

²⁰ Bana hetu, kanuikadi bu bana mu ngelelu wenu wa meji; nuikale bana bua bidi bitangila bubi. Kadi nuikale bantu bakole mu ngelelu wenu wa meji.

²¹ Mu Mukanda wa tshijila, Mvidi Mukulu udi wamba ne: “Nengambile bantu aba malu mu miakulu idi bantu kabayi bumvue, kabidi mukana mua bantu ba bisamba, kadi nansha diba adi, kabakunteleja to.”

²² Nenku dipa dia kuakula miakulu idi bantu kabayi bumvue, didi dileja bantu badi kabayi bitaba bualu, kadi kadiena dileja bena ditaba nansha. Kadi dipa dia buambi, dia kumanyisha bantu malu adi Mvidi Mukulu wamba, didi dileja bena ditaba bualu, kadi kadiena dileja badi kabayi ne ditaba to.

²³ Padi Tshisumbu tshijima tshia bena ditaba mu ditendelela, bonsu bakula miakulu idi bantu kabayi bumvua, bantu ba patupu, nansha badi kabayi bena ditaba, babuela muaba awu, kabena mua kunuamba ne: nudi bapale anyi?

²⁴ Kadi padi bonsu bamanyisha malu adi Mvidi Mukulu wamba, muntu wa patupu, nansha udi kayi muena ditaba, mubuele muaba awu, bidiye umvua nebimujadikile ne: ndi muena mibi. Bionsu bidiye umvua nebimulumbuluishe.

²⁵ Meji ende masokome neamueneke patoke. Nenku neadiele panshi bua kukukuila Mvidi Mukulu, neambe ne: “Mvidi Mukulu bushuwa udi munkatshi muetu!”

Bulongolodi mu Tshisumbu

²⁶ Bana hetu, telejayi nkomenu wa bionsu bitudi bambe ebi. Panudi ntendelela Mvidi Mukulu, umue wa kunudi udi wimba musambu, munga udi ulongesha, mukuabu udi umanyisha malu adi Mvidi Mukulu mumuambile, ewu udi wakula mu miakulu idi bantu kabayi bamanye, munga udi uyumvuija. Kadi bionsu ebi bidi ne bua kukolesha bena Tshisumbu mu ditaba diabu.

²⁷ Padibu bakula miakulu idi bantu kabayi bamanye, amu bantu babidi nansha basatu, badi mua kuakula balondangane, kabidi muntu mukuabu umvuije bidibu bamba.

²⁸ Pikalaku kakuyi udi mua kuyumvuija, badi bakula miakulu ayi balekele kuakula ne diyi dikole munkatshi mua bantu, badiakuile amu munda munda, bayukile ne Mvidi Mukulu.

²⁹ Bambi badi batumanyisha bivua Mvidi Mukulu mubambile, badi mua kuakula kabidi amu babidi nansha basatu. Kadi bambi bakuabu bakonkonona bidibu bamba.

³⁰ Kadi padi Mvidi Mukulu wambila muntu mukuabu udi muaba awu malu, muntu utshidi wakula awu apuwe.

³¹ Nuenu bonsu nudi mua kumanyishangana malu adi Mvidi Mukulu munuleje, kadi balondangana ku muntu ku muntu, bua numone mua kulongesha bantu bonsu, kubakolesha ku muoyi.

³² Badi bamanyisha bantu malu adi Mvidi Mukulu mubaleje, badi ne bua kutabalela dipa didibu bapeta.

³³ Bualu Mvidi Mukulu kena mutubikile bua kusomba mu tshimvundu, kadi amu mu bupole. Bu mudibi bienzeka mu Bisumbu bionsu bia bena ditaba,

³⁴ bakaji badi ne bua kupuwa mu Bisangilu bienu. Kabena mua kuakula. Mikenji ya Moshe idi yamba ne: bakaji badi ne bua kuitaba ku meyi.

³⁵ Padibu basue kumanya bualu kampanda, bebeje amu babayabu ku nzubu. Kabiena bimpe bua mukaji akule mu Tshisumbu tshia bena ditaba.

³⁶ Muaku wa Mvidi Mukulu mmufumine kuenu anyi? Mbanutuminewu amu nuenu anyi?

³⁷ Padi muntu wela meji ne: ndi muambi, nansha ne: ndi mupete dipa kudi Mueyelu, amanye ne: bindi munufundile ebi mmukenji wa kudi Mfumu.

³⁸ Kadi padiye kayi ubiangata ne mushinga, kanumuangatshi ne mushinga to.

³⁹ Nenku bana hetu, nujinge kumanyisha bantu malu adi Mvidi Mukulu munuambile. Kadi kanukandiki badi bakula miakulu idi bantu kabayi bamanye.

⁴⁰ Bionsu bienzeke amu ne kanemu, bilondangane bimpe.