1 Korente 12 - MUKANDA WA MYIDI MUKULU

Mapa a kudi Mueyelu wa Tshijila

¹ Ndi ngandamuna mpindiewu ku nkonku inuvua bangele bua bidi bitangila mapa a kudi Mueyelu wa Tshijila. Bana hetu, ndi musue bua nujingulule bimpe mudi mapa aa.

² Nudi bamanye ne: diba dinuvua kanuyi banji kuitaba Mvidi Mukulu, bavua banusaka, bua nutendelele mvidie ya patupu, kanuyi mua kutua nkanana.

³ Ke pandi musue bua nujingulule bimpe ne: padi Mueyelu wa Tshijila ulombola muntu, kena mua kuamba ne: “Yezu ikale mutshipa!” Nansha muntu kena mua kujadika ne: “Yezu udi Mfumu,” padi Mueyelu wa Tshijila kauyi umulombola.

⁴ Mapa adi mashilangane, kadi amu Mueyelu umue wa momumue ke udi wafila.

⁵ Midimu ya kuenza idi mishilangane, kadi utudi tukuatshila midimu ayi udi amu Mfumu umue wa momumue.

⁶ Bukole ne meji bia kuenza nabi mudimu bidi bishilangane ku muntu ku muntu, kadi Mvidi Mukulu udi ubifila kudi bonsu udi amu umue wa momumue.

⁷ Mueyelu wa Tshijila udi umueneka munda mua muntu yonsu, ne dipa didi dilengelela bantu bonsu,

⁸ Muntu kampanda udi upeta kudi Mueyelu dipa dia kuakula ne meji. Mukuabu udi upeta kudi Mueyelu wa momumue dipa dia kuakula bilondeshile dimanya diende.

⁹ Munga udi upeta kudi Mueyelu umue wa momumue dipa dia ditaba dikole, mukuabu dipa dia kuondapa babedi.

¹⁰ Mukuabu udi upeta kudi Mueyelu dipa dia kuenza malu a dikema, mukuabu dipa dia kumanyisha bantu malu avua Mvidi Mukulu mumuambile. Munga udi upeta dipa dia kusunguluja bidi bifuma kudi Mueyelu wa Mvidi Mukulu, ne bidi kabiyi bifuma kudiwu. Umue udi upeta dipa dia kuakula miakulu idi bantu kabayi bamanye, munga dipa dia kumvuija bidibu bamba mu miakulu ayi.

¹¹ Amu Mueyelu umue wa momumue awu, ke udi ufila bionsu abi. Udi upesha muntu yonsu diende dipa dia pa buadi bu mudiwu musue.

Mubidi umue, bidimba bivule

¹² Bualu Kristu udi bu mubidi, udi umue, kadi muikale ne bidimba bivule. Kadi bidimba bionsu, nansha biobi bivule, bidi bienza mubidi amu umue.

¹³ Buonsu buetu, bena Yuda nansha bantu ba bisamba bikuabu, bapika nansha bantu badi benza malu mudibu basue, bavua batutue mu mayi, bua tuetu kuenza mubidi umue ku bukole bua Mueyelu wa Tshijila. Mbatuwuje kabidi bonsu ne Mueyelu umuepele ewu.

¹⁴ Mubidi kawena amu ne tshidimba tshimue, kadi udi ne bia bungi.

¹⁵ Padi dikasa diamba ne: “Meme tshiena tshianza to; nanku tshiena tshidimba tshia mubidi,” bualu ebu kabuena budiumbusha ku mubidi to.

¹⁶ Padi ditshi diamba ne: “Tshiena disu; nanku tshiena tshidimba tshia mubidi,” bualu ebu kabuena budiumbusha ku mubidi to.

¹⁷ Bu mubidi wende mujima muikale amu disu, muntu uvua mua kumvua bishi? Bu mubidi wende mujima muikale amu ditshi, uvua mua kununkila bishi?

¹⁸ Bushuwa, Mvidi Mukulu mmuteke mu mubidi tshidimba tshionsu pa muaba watshi, muvuaye musue.

¹⁹ Bu bionsu bikale amu tshidimba tshimue, mubidi uvua penyi?

²⁰ Kadi bidimba bidi bivule, mubidi udi amu umue.

²¹ Nanku disu kadiena mua kuambila tshianza ne: “Meme tshiena nkukengela to!” Mutu kawena mua kuambila makasa ne: “Meme tshiena nkukengela to!”

²² Bualu bidimba bidi bimueneka bu bidi bitekete, ke bitudi nabi dikenga menemene.

²³ Kabidi bitudi tuela meji ne: kabiena ne mushinga, ke bitudi dinemeka menemene. Bidimba bitudi katuyi tutelatela, tudi tubilama ne kanemu kavule.

²⁴ Katuena ne bua kuenza nanku ne bidimba bikuabu bidi bipite buimpe. Mvidi Mukulu uvua mulongolole mubidi, bua kunemesha nangananga bidimba bidi kabiyi ne lumu.

²⁵ Ke muvuaye musue bua bidimba bishilangane bia mubidi bienze bionsu tshintu tshimue, biambuluishangane.

²⁶ Padi tshidimba tshia mubidi tshimue tshisama, bidimba bionsu bidi bisama pamue natshi. Padibu batumbisha tshidimba tshimue, bidimba bikuabu bionsu bidi bisanka pamue natshi.

²⁷ Nuenu bonsu nudi mubidi, wa Kristu. Yonsu wa kunudi udi tshidimba tshiawu.

²⁸ Nanku mu Tshisumbu tshia bena ditaba, Mvidi Mukulu mmuteke bonsu pa muaba wabu: bangabanga bapostolu, pashishe bambi, balonda kudi balongeshi; kunyima kudi benji ba malu a dikema, kudi badi ne bukole bua kuondapa babedi, nansha badi bambuluisha bakuabu, nansha badi balombola bantu nabu, ne badi bakula miakulu idi bantu kabayi bamanye.

²⁹ Bonsu kabena bapostolu, bambi, nansha balongeshi to. Bonsu kabena ne bukole bua kuenza malu a dikema,

³⁰ nansha bua kuondapa babedi, nansha bua kuakula miakulu idi bantu kabayi bamanye, nansha bua kuyumvuija.

³¹ Nanku kebayi mapa adi mapite makuabu. Kadi nennuleje mpindiewu njila udi mupite mapa makuabu onsu.