1 Korente 1 - MUKANDA WA MYIDI MUKULU

Diela dia muoyi

¹ Meme Polu, uvua Mvidi Mukulu musue kusungula, bua ngikale mupostolu wa Yezu Kristu, pamue ne muanetu Sostene,

² tudi tunufundila, nuenu bena Tshisumbu tshia bena ditaba tshia Mvidi Mukulu badi mu Korente, mukanda ewu. Tudi tunuela muoyi nuenu bonsu badi Mvidi Mukulu mubikile, bua nuikale bende, nuikale kabidi bantu ba tshijila, panudi nudisanga ne Yezu Kristu. Mukanda ewu mmufundila kabidi bantu bonsu ba miaba yonsu badi bitaba Yezu Kristu, udi Mfumu wabu, ne wetu kabidi.

³ Dinanga ne bupole bia kudi Mvidi Mukulu Tatu, ne bia kudi Mfumu Yezu Kristu, bishindame munda muenu.

Bitudi bapete munda mua Kristu

⁴ Ndi ngela amu kuela Mvidi Mukulu wanyi tuasakidila bualu buenu, bualu mmunupe mu Yezu Kristu mudiye ununanga.

⁵ Bualu panudi badisange ne Kristu, nudi bapete mapa onsu, nangananga dipa dia kumanya malu onsu, ne dia kualongesha.

⁶ Bivua Kristu mutujadikile mbimane kushindama bimpe munkatshi muenu.

⁷ Ke munudi kanuyi bapange dipa dia Mvidi Mukulu nansha dimue, nuenu badi bindile tshikondu tshidi Mfumu wetu Yezu Kristu ne bua kumueneka mu butumbi buende.

⁸ Yeye neanuambuluishe, bua nushale bashindame ne ku ndekelu, bua muntu kamonyi mua kunuasa tshilumbu nansha tshimue, dituku diafika Mfumu wetu Yezu Kristu.

⁹ Mvidi Mukulu uvua munubikile, bua nuenu kudisanga ne Muanende Mfumu wetu Yezu Kristu mu nsombelu wenu mujima, udi ukumbaja bionsu bidiye ulaya.

Kristu mmukosolola mu bitupa anyi?

¹⁰ Bana hetu, mu dina dia Mfumu wetu Yezu Kristu, ndi nnulomba ne: umvuanganayi. Kanuabulukianganyi nansha. Nuenze tshintu tshimue menemene. Nuikale ne meji amue, kabidi ne muoyi umue.

¹¹ Bualu, bana hetu, bena diku dia muanetu wa bakaji Klowa bavua bammanyishe ne: nudi batapulukangane.

¹² Nudi bamanye tshindi musue kuamba. Yonsu wa kunudi udi wamba muende munga, yonsu wende mushindu. Ewu ne: “Ndi ndonda Polu”; mukuabu ne: “Ndi ndonda Apolose”; mukuabu ne: “Meme amu Petro”; wawakabidi ne: “Meme amu Kristu.”

¹³ Kadi nudi nuela meji ne: Kristu mmukosolola mu bitupa anyi? Uvua munufuile pa mutshi mutshiamakane Polu anyi? Bayua banutue mu mayi mu dina dia Polu anyi?

¹⁴ Ndi ngela Mvidi Mukulu tuasakidila, bualu tshivua mutue muntu wa kunudi nansha umue mu mayi, pa kumusha Krispuse ne Ngayuse.

¹⁵ Nanku muntu nansha umue kena mua kuditemba ne: mbantue mu mayi mu dina dia Polu.

¹⁶ (Bushuwa, mvua mutue kabidi bena mu diku dia Stefanaze mu mayi. Kadi tshiena muvuluke mumvua mutue kabidi muntu mukuabu mu mayi to.)

¹⁷ Kristu kavua muntume bua kutua bantu mu mayi nansha. Uvua muntume bua kumanyisha bantu Lumu lua Disanka. Kadi tshiena ndumanyisha ne meji a bantu, bua lufu lufuila Kristu pa mutshi mutshiamakane kalujimiji bukole bualu.

Yezu ke bukole ne meji bia Mvidi Mukulu

¹⁸ Bualu bantu badi kabayi benda mu njila wa lupandu, badi batangila dilongesha dia bualu bua lufu lua Kristu pa mutshi mutshiamakane, bu dilongesha dia bupale. Kadi bualu buetu tuetu badi benda mu njila awu, dilongesha adi didi bukole bua Mvidi Mukulu.

¹⁹ Ke padi Mukanda wa tshijila wamba ne: “Nembutule meji a bena meji, nembenge dimanya dia bena lungenyi.”

²⁰ Nanku tshidi muena meji, nansha muntu udi mulonge mikanda, nansha muedianganyi wa mpata wa panuapa, mua kuamba kabidi ntshinyi? Mvidi Mukulu mmumane kuleja ne: meji a bena panu mbupale!”

²¹ Bualu Mvidi Mukulu mmuleje meji ende mu bionsu. Kadi bantu ne meji abu nkayabu kabavua mua kujingulula mudi Mvidi Mukulu. Ke padi Mvidi Mukulu musue kusungidila bena ditaba ku dilongesha dietu dia Lumu lua Disanka, nansha badiamba ne: ndia bupale.

²² Bena Yuda badi basue kumona malu a dikema, bena Ngreke badi bakeba meji.

²³ Kadi tuetu tudi tukobola Kristu uvuabu bapopele pa mutshi mutshiamakane. Bena Yuda badi bakamba ne: nudi nusendeka Mvidi Mukulu. Badi kabayi bena Yuda badi bakamba ne: nudi nulongesha malu a bupale.

²⁴ Kadi bua bonsu badi Mvidi Mukulu mubikile, nansha bena Yuda nansha bantu ba bisamba bikuabu, Kristu udi bukole bua Mvidi Mukulu, kabidi ne meji a Mvidi Mukulu.

²⁵ Bualu bidi Mvidi Mukulu wenza, bantu badi babimona bu bia bupale, kadi bidi bipita meji a bantu. Mvidi Mukulu umueneka bu udi kayi ne bukole, kadi bukole buende mbupite bua bantu.

²⁶ Bana hetu, nuditangile nuenu mene. Bavua Mvidi Mukulu mubikile bua kubanga tshisumbu tshienu mbanganyi? Luseke lua buntu buetu, munkatshi muenu mudi bena meji bakese, mudi badi ne bukole bakese, mudi bantu baneme amu bakese kabidi.

²⁷ Kadi bua kufuisha bena meji bundu, Mvidi Mukulu mmusungule bidi bantu batangila bu bia bupale. Bua kufuisha badi ne bukole bundu, mmusungule bidi bantu batangila bu bidi kabiyi ne bukole.

²⁸ Uvua musungule bantu bashadile, badibu bapetula, badibu kabayi bangata ne mushinga, bua kubutula badi badiamba ne: tudi baneme.

²⁹ Nanku muntu nansha umue kena mua kuditemba kumpala kua Mvidi Mukulu.

³⁰ Kadi Mvidi Mukulu mmunusange ne Yezu Kristu. mMuenze Kristu meji etu. Kristu udi utubingisha kumpala kua Mvidi Mukulu, utuenza bantu bende ba tshijila, utupikula kabidi ku bubi.

³¹ Ke padi Mukanda wa tshijila wamba ne: “Udi ujinga kuditemba, aditembe bua bidi Mvidi Mukulu muenze.”