1 Bakalenga 2 - MUKANDA WA MYIDI MUKULU

Mibelu ya ndekelu ya Davide

¹ Mukalenga Davide umvua ne: nkadi pa kufua, kubelaye muanende Shelomu, umuambila ne:

² — Meme nkadi pa kufua. Nanku ukoleshe muoyi, wenze malu bu muntu mukulumpe.

³ Witabe Maweja-Nangila Mvidi Mukulu webe. Matuku onsu wenze amu tshidiye musue. Utumikile meyi ende ne mikenji yende. Ukumbaje bionsu bidiye wamba, ne bidiye ulongesha. Ukumbaje bionsu bidibu bafunde mu mikenji ya Moshe. Nanku, newikale muena diakalenga mu bionsu biudi wenza.

⁴ Maweja-Nangila neakumbaje bionsu bivuaye mumane kundaya, mungambile ne: “Pikala ndelanganyi yebe mingitabe, mienze mundi musue, nendamate mu bulelela, kabidi ne muoyi mujima, nansha wewe mumane kufua, misangu yonsu muntu wa ku ndelanganyi yebe neashale mukalenga wa bena Izrayele.”

⁵ “Pashishe, uvuluke malu mabi onsu avua Yowabe, muana wa Seruya, mungenzele. Uvua mushipe Abnere, muana wa Nere, mushipe kabidi Amasha, muana wa Yetere, bamfumu babidi balombodi ba bena mvita ba bena Izrayele. Bu muvua Yowabe mushipe bantu aba mu tshikondu tshia ditalala, kabiyi mu matuku a mvita, udi muena tshibawu menemene. Udi ne mashi a bantu aba pambidi, bualu mmushipe dilaya diabu dia bena mvita.

⁶ Nanku udimuke. Kuanyishi bua Yowabe akulakaje mu ditalala to. Umushipe.

⁷ Uvuluke bana ba Barzilayi, wa mu ditunga dia Ngilaade. Bavua bangambuluisha dituku dimvua nnyema muanenu Absalome. Ubalame bimpe, bikale badia ku mesa ebe matuku onsu.

⁸ Uvuluke Shimeyi, muana wa Ngera, wa mu musoku wa Bakurime, udi mu buloba bua bena Binyamine. Uvua muntshipe bikole bitambe, dituku dimvua nnyema bua kuya ku Makanayime. Kadi, pamvua mpingana mu Yerushalayime, kupuekaye ku Yardene bua kungakidila. Nanku, mvua mumulaye kumpala kua Maweja-Nangila ne: tshiakukushipesha nansha.

⁹ Kadi, mpindiewu wewe udi ne lungenyi, kuedi meji ne: Shimeyi kena ne bualu to. Udi mumanye tshiudi mua kumuenzela. Nansha mudiye mumane kukulakaja, uvuluke bua kumushipabu.”

Davide udi ufua, Shelomu udi umupingana

¹⁰ Mukalenga Davide kufua. Kumujiikabu mu tshimenga tshiende, mu Yerushalayime.

¹¹ Davide uvua mushale mu bukalenga bua bena Izrayele bidimu makumi anayi, mmumue ne: bidimu muanda mutekete ku Ebrone, bidimu makumi asatu ne bisatu mu Yerushalayime.

¹² Muanende Shelomu kumupingana mu bukalenga biangatshile tshikondu atshi, bumfumu bua Shelomu kushindama.

Shelomu udi ushipesha Adoniya

¹³ Dituku dikuabu, Adoniya, muana uvua Davide mulele ne mukajende Agite, kuya kudi Batsheba, mamuende wa Shelomu. Batsheba kukonka Adoniya ne: — Udi mufike ne muoyi wa kungenzela bimpe anyi? Adoniya kuitaba ne: — Eyowa.

¹⁴ Kadi ndi ne bualu bua kukuambila. Batsheba kumuambila ne: — Ambaku.

¹⁵ Adoniya kumuambila ne: — Udi mumanye ne: meme mvua ne bua kuangata bukalenga ebu. Kabidi bena Izrayele bonsu bavua batekemena bua meme kuikala mukalenga. Kadi bualu kuenzeka mushindu mukuabu. Muanetu Shelomu kushala mu bukalenga pa muaba wanyi. Bualu Maweja-Nangila uvua musue bua bienzeke nanku.

¹⁶ Mpindiewu, ndi nkulomba anu tshintu tshimue, kubengi to. Batsheba kuandamuna ne: — Amba.

¹⁷ Adoniya kumuambila kabidi ne: — Ndi nkusengelela ne: undombelaku kudi mukalenga Shelomu, Ampeshe Abishayi, muena Shuneme, bua ikale mukajanyi. Bulelela, wewe mundombele nanku, kena mua kubenga diyi diebe to.

¹⁸ Batsheba kuitaba ne: — Eyowa, mbimpe! Nenye kuyukila ne mukalenga Shelomu bualu buebe.

¹⁹ Ke Batsheba kuya kudi mukalenga Shelomu bua kumuambila bualu bua Adoniya. Mukalenga Shelomu kujuka mu nkuasa wa bukalenga, kusemena kudi mamuende Batsheba, kuinyika mutu bikole. Pashishe kusombaye tshiakabidi mu nkuasa wa bukalenga. Shelomu kulombesha nkuasa wa bukalenga mukuabu. Kumutekabu ku dia balume diende. Mamuende Batsheba kusomba mu nkuasa amu.

²⁰ Batsheba kuambila Shelomu ne: — Ndi nkulomba tshintu tshikese, kubengi to. Mukalenga Shelomu kumuambila ne: — Mamu wanyi, lombaku, tshiena mua kubenga to.

²¹ Batsheba kumuambila ne: — Mbimpe. Nanku kabena mua kufila Abishayi, muena Shuneme, kudi muanenu Adoniya bua ikale mukajende anyi?

²² Shelomu kukonka mamuende ne: — Akia! Ke wewe udi ukimina kulombela Adoniya bua angate Abishayi, muena Shuneme! Nanku, umulombele kabidi ne bukalenga, bualu mmukuluanyi! Eyowa, umulombele bukalenga. Bantu badi baditua ku tshiende, mutuangaji Abiyatare ne Yowabe, mfumu mulombodi wa bena mvita, nebasanke bikole!

²³ Ke Shelomu kuditshipa kumpala kua Maweja-Nangila, wamba ne: — Maweja-Nangila neannyoke ne dinyoka dikole, pangikala tshiyi mushipeshe Adoniya, bua dikamakama didiye nadi dia kulomba bualu bua mushindu ewu!

²⁴ Maweja-Nangila uvua munjadike mu nkuasa wa bukalenga wa tatu wanyi Davide, mmundaye bukalenga meme ne ndelanganyi yanyi. Bu mudiye ne muoyi, ndi nditshipa ne: Adoniya udi ufua anu lelu!

²⁵ Nanku Shelomu kutuma Benaya, muana wa Yoyada, bua kushipa Adoniya. Ke muvua Adoniya mufue nanku.

Shelomu udi wipata Abiyatare mu Yerushalayime

²⁶ Pashishe, mukalenga Shelomu kuambila mutuangaji Abiyatare ne: — Umuka munemu, uye ku Anatote, muaba udi madimi ebe, bualu udi mukumbanyine lufu. Kadi tshiena nkushipesha lelu to, bualu patshivua tatu wanyi Davide ne muoyi, uvua muambule mushete wa ndondu wa Maweja-Nangila Mvidi Mukulu. Kabidi uvua muambuluishe tatu wanyi mu makenga onsu avuaye nawu.

²⁷ Nanku Shelomu kukandika Abiyatare midimu ya butuangaji ivuaye wenzela Maweja-Nangila. Ke muvua bionsu bivua Maweja-Nangila mumane kuamba ku Silo, muaba wa tshijila, bua kunyoka bena nzubu wa mutuangaji munene Eli, bikumbana.

Shelomu udi ushipesha Yowabe

²⁸ Yowabe mumane kumvua bionsu bivua bienzekela Adoniya ne Abiyatare, kunyemaye. Kuyaye kusokoma mu ntenta wa Maweja-Nangila, pabuipi ne tshilambuilu. Bangabanga, Yowabe kavua muditue ku tshia Absalome nansha. Kadi mpindiewu kumvuanganaye ne Adoniya.

²⁹ Muntu mukuabu kufika kudi mukalenga Shelomu, umuambila ne: — Yowabe mmunyeme. Udi mu ntenta wa Maweja-Nangila, mmusokomene pabuipi ne tshilambuilu. Nanku Shelomu kutuma Benaya, muana wa Yoyada, mu ntenta amu, umuambila ne: — Uye kushipa Yowabe!

³⁰ Benaya ufika mu ntenta, kuambilaye Yowabe ne: — Mukalenga Shelomu udi wamba ne: umuka muaba ewu. Yowabe kubenga ne: — Tshiena ngumuka to. Ndi musue kufuila amu muaba ewu. Benaya kuya ku nzubu kua mukalenga Shelomu, kumuambila bionsu bivua Yowabe muambe.

³¹ Mukalenga kuandamuna ne: — Mbimpe bitambe! Umushipele muaba awu, bu mudiye muambe amu. Pashishe umujike. Nanku bena nzubu wa tatu wanyi Davide ne meme, katuakuikala kabidi ne tshilumbu, bua kusombuela bantu babidi bavua Yowabe mushipe kabayi bualu.

³² Bualu Abnere, muana wa Nere, mfumu wa bena mvita ba bena Izrayele, ne Amasha, muana wa Yetere, mfumu wa bena mvita ba bena Yuda, bavua bantu ba nsongu bapite Yowabe. Kadi Yowabe uvua mubashipe, tatu wanyi Davide kayi mumanye. Nanku Maweja-Nangila nkayende neasombuele Yowabe bua bantu aba bavuaye mushipe!

³³ Eyowa, Yowabe ne ndelanganyi yende nebashale bena tshibawu kashidi bua bualu ebu. Kadi mukalenga Davide ne ndelanganyi yende, bena nzubu wende bonsu badi bamupingana mu bukalenga, Maweja-Nangila neabape disanka dia kashidi.

³⁴ Nanku Benaya kupingana kudi Yowabe, kumushipa. Kumujiikabu mu budimi buende munkatshi mua mpata.

³⁵ Mukalenga Shelomu kupingaja Benaya muaba wa Yowabe, bua ikale mfumu mulombodi wa bena mvita. Kupingajaye kabidi Sadoke, muaba wa Abiyatare bua ikale mutuangaji muaba wa tshijila.

Shelomu udi ushipesha Shimeyi

³⁶ Shelomu kubikidisha Shimeyi, umuambila ne: — Asa nzubu webe mu Yerushalayime. Ndi musue bua usombe amu ku nzubu aku. Ndi nkukandika bua kupatuki mu tshimenga to.

³⁷ Ndi nkujadikila patoke ne: wewe mupatuke mu tshimenga, musabuke musulu wa Sedrone, neufue dituku adi. Nanku wewe mupatuke, udi mudikebele lufu nkayebe.

³⁸ Shimeyi kuitaba ne: — Eyowa, mukalenga wanyi, mbimpe bitambe! Nengenze bionsu biudi muambe. Shimeyi kusomba mu Yerushalayime matuku a bungi.

³⁹ Kadi bidimu bimane kupita bu bisatu, bapika ba Shimeyi kunyema, kuya ku nzubu kua Akishe, muana wa Maka, uvua mukalenga wa tshimenga tshia Ngate. Shimeyi mumane kumvua lumu ne: bapika banyi badi ku nzubu kua Akishe,

⁴⁰ kusuikaye biseba pa nyama wende wa mpunde, kuya ku Ngate, bua kulomba bapika bende kudi mukalenga Akishe. Kupinganaye nabu mu Yerushalayime.

⁴¹ Kumanyishabu mukalenga Shelomu ne: Shimeyi uvua muye ku Ngate, kadi ukadi mupingane mu Yerushalayime.

⁴² Ke mukalenga Shelomu kubikidisha Shimeyi, umuambila ne: — Mvua mukutshipishe kumpala kua Maweja-Nangila bua kupatuki mu Yerushalayime to. Mvua mukuambile ne: wewe mupatuke mu tshimenga bua kuya muaba mukuabu, neufue. Uvua mungandamune ne: Mbimpe bitambe! Ndi mumvua!

⁴³ Kadi kuena munemeke mitshipu iuvua muditshipe kumpala kua Maweja-Nangila, bua tshinyi? Udi mubenge tshimvua mukuambile bua tshinyi?

⁴⁴ Udi muvuluke malu mabi onsu auvua muenzele tatu wanyi Davide anyi? Udi anu mumanye bionsu abi. Nanku, Maweja-Nangila neakusombuele nkayende bua buenzayi buebe.

⁴⁵ Kadi Maweja-Nangila neangele lupemba. Neajadike bukalenga mu nzubu wa Davide kashidi.

⁴⁶ Ke mukalenga Shelomu kutuma diyi, Benaya muana wa Yoyada kupatuka ne Shimeyi mu nzubu wa bukalenga, kumushipa. Biangatshile tshikondu atshi, bukalenga bua Shelomu kushindama bikole.