Zekâya 5 - Mukanda wa Nzambi Dihungila Dikulukulu ne Dihungila Dihia-dihia 2003

Mukandu Muvunga Wakadi Ubuka

¹ Nakabanduluka kabidi, nakatangila, ekumona, mukanda muvunga wakadi ubuka!

² Yeye wakangebesha ne, Udi umona tshinyi? Nakamuandamuna ne, Ndi ntangila mukanda muvunga ubuka; bule buau budi coudées makumi abidi ne butshiama buau budi coudées dikumi.

³ Ahu yeye wakangambila ne, Eu udi mulau udi utangalaka ha buloba buonso. Bualu bua muntu yonso udi wiba neumushibue ku luseke elu bu mudiu wamba; ne muntu yonso udi uditshiha ne mashimi neumushibue ku luseke alu bu mudiu wamba.

⁴ Yehowa wa misumba udi wamba ne, Nengutume, neubuele mu nsubu wa muibi, ne mu nsubu wa muntu udi uditshiha ne mashimi mu dina dianyi; neushale munda mua nsubu wandi, neumuoshe diatshimue ne mabaya andi ne mabue andi kabidi.

Mukashi mu Tshihiminu tshia Épha

⁵ Hashishe, muanjelo wakadi uyikila nʼanyi wakaluhuka, wakangambila ne, Banduluka, mona tshintu etshi tshidi tshihatuka ne, Ntshintu kai?

⁶ Nakamuebesha ne, Etshi ntshinyi? Yeye wakamba ne, Etshi ntshihiminu tshia épha tshidi tshihatuka. Wakamba kabidi ne, Etshi ntshifuanyikishi tshia malu mabi abo ha buloba buonso.

⁷ Ne monai! Bakambula tshibuikilu tshiatshi tshiakadi tshibulunge tshia tshiamu tshia ntende, ne mukashi wakadi ushikama munda mua tshihiminu tshia épha!

⁸ Yeye wakamba ne, Mukashi eu udi Bubi mene; wakamusakila munda mua tshihiminu, wakabuikila tshibuikilu tshia tshiamu tshia ntende ku mishiku yatshi.

⁹ Hashishe, nakabanduluka, nakatangila, ekumona! Bakashi babidi baluhuke, luhehele luakadi mu mahuahua abo; bakadi ne mahuahua bu mahuahua a kasonga nyunyu. Bakambula tshihiminu tshia épha ne bakatshibandisha hankatshi ha diulu ne buloba.

¹⁰ Nakakonka muanjelo wakadi uyikila nʼanyi ne, Badi baya ne tshihiminu tshia épha kudi kunyi?

¹¹ Yeye wakangambila ne, Bua kutshiashila nsubu mu buloba bua Shinâ; hashikishabo kumujadikaku, nebatshishimikeku ha tshitekelu tshiatshi.