Yowele 2 - Mukanda wa Nzambi Dihungila Dikulukulu ne Dihungila Dihia-dihia 2003

¹ Elai mpungi mu Siona, elai mbila mu mukuna wanyi wa tshijila! Bena buloba ebu bonso bazakale; bualu bua dituku dia Yehowa didi diamba kulua, didi ha buihi!

² Ndituku dia mîdima ne dia mufitu, ndituku dia matutu ne dia mîdima mikole. Bu mudi kabundubundu ka lunkelu katshila ha mutu ha mikuna, bantu aba banene ne bakole badi nunku. Kakuena kuanji kuikala bakuabo bu bobo diambedi; kakuena kuikala bakuabo bu bobo ku nyima kuabo, tô ne ku bidimu bia mulongo ne mulongo.

³ Ku mpala kua mikumbi ei kahia kadi kosha bintu, kabimana, ne ku nyima kuai kahia kadi kashidisha bintu kabidi. Buloba buakadi bu budimi bua Edene diambedi kayiyi mianze kulua, ku nyima kuai buloba budi bu tshihela tshia hatuhu; e, kakuena tshintu tshimue tshidi tshihanduka kudiyi.

⁴ Tshifuanyikishi tshiai tshidi bu tshifuanyikishi tshia tubalu; ne bu mudi tubalu tua nvita tuenda lukasa, mbu mudiyi yenda.

⁵ Bu mudi tshiona tshia makalu a nvita ha mikuna mbu mudiyi ituhika; bu kutudika kua kahia kadi kalamba ne kadi kosha bisonsa; bu bantu bakole baluate bivualu bia nvita ne badi bela mualu wa nvita.

⁶ Bantu badi bazakala ku mpala kuai ne buowa bukole, mpala ya bantu bonso idi itokoloka.

⁷ Idi inyema lukasa bu bena bukitu; idi ibanda lumbu lua musoko bu bena nvita. Mukumbi ne mukumbi udi uya anu mu nshila wau, ne kayena ihambuka mu nshila.

⁸ Kayena isakilangana, mukumbi ne mukumbi udi uya mu nshila wau. Idi ihita bintu bionso bidi bantu bakeba kuyikanda nʼabi, kayena itahibua.

⁹ Idi yenda idiela mu musoko, idi yenda ha lumbu lua musoko; idi ibanda munda mua nsubu ya bantu; idi ihuelela ha masoso bu mudi muibi ubuela.

¹⁰ Buloba budi buzakala ku mpala kuai; diulu didi dikanka; ngondo ne diba bidi bilua mîdima, ne mitoto idi ikanda dinkenke diai.

¹¹ Yehowa udi wela dî dikole ku mpala kua masalayi andi; bualu bua tshisumbu tshiandi tshia masalayi tshidi tshinene, bualu bua muenji wa dî diandi udi ne bukole. Bualu bua dituku dia Yehowa didi dinene, didi dikuatshisha bantu buowa bukole; nganyi washindama ku mpala kuadi?

Dinanga Dijalame dia Yehowa

¹² Yehowa udi wamba ne, Mpindiu mene, nuhingane kundi ne mitshima yenu yonso, jilai bia kudia, dilai, asai miadi.

¹³ Handai mitshima yenu, kanuhandi hivualu bienu, hinganai kudi Yehowa, Nzambi wenu; bualu bua yeye udi unulesha dinanga ne udi unufuila luse, kena ukuata tshiji lukasa, udi ne luse lujalame lukumbane; udi ukudimuna mutshima wandi bua makenga adiye wamba kutumina bantu.

¹⁴ Nganyi udi mumanye ne kena ukudimuna mutshima wandi, kena uhanga kunushila disanka, disanka mene dia mulambu wa bia kudia ne mulambu wa bia kunua bia Yehowa Nzambi wenu?

¹⁵ Elai mpungi mu Siona, jidilai tshikondo tshia kujila bia kudia, kunguishai disangisha dia tshijila;

¹⁶ sangishai bantu. Jidilai disangisha, sangishai bakulu ne bantu, sangishai bana ne bana batshidi bamua mabele. Mubaki wa mukashi ahatuke mu nsubu muandi, mukashi mubaka ahatuke mu ntenta wandi.

¹⁷ Bakuidi, bakuatshi ba mudimu wa Yehowa, badidile muadi hankatshi ha mbalanda wa ntempelo ne tshioshelu; bambe biabo ne, Sungila bantu bebe, Yehowa, kufidi buhianyi buebe kudi bahendianganyi bua babahende, bua ba munkatshi mua bisamba bia bantu babaseke. Munyi muambilanganabo munkatshi mua bantu ne, Nzambi wabo udi nʼanyi?

¹⁸ Hashishe, Yehowa wakakuatshika mukau bua buloba buandi, wakafuna bantu bandi luse.

¹⁹ Yehowa wakakudimuna bantu bandi dî, wakabambila ne, Tangilai, nennutumine manvua ne nvinyo mihia-mihia ne manyi, nennukutshishebi; ne tshiena nnuvuisha bu tshintu tshia kuhendabo munkatshi mua bisamba bia bantu kabidi.

²⁰ Nennûmushile bena luseke lua nôde, nembatume kule; nembihate bua kuyabo mu buloba bua munanga ne bua tshihela tshia lusenga; tshituha tshiabo tshia ku mpala tshibuele mu mai manene a ku luseke lua esete, tshituha tshiabo tshia ku nyima tshibuele mu mai manene a ku luseke lua wesete; muhuya wabo mubi ne mukuhu wabo nebibande mulu, bualu bua bakuenza malu manene.

²¹ Wewe buloba, kutshinyi nansha! Wikale ne disanka ne musangelu, bualu bua Yehowa wakuenza malu manene!

²² Nyama ya mu mpata, kanu tshinyi; bualu bua mashinde a mu mpata adi asasa kabidi, mutshi udi ukuama mamuma au, mutshi wa nfigi ne muonshi wa tumuma tua nvinyo bidi bikuama mamuma abi.

²³ Nuenu bana ba balume ba mu Siona, sankai bienu, ikalai ne disanka mu Yehowa Nzambi wenu; bualu bua yeye udi untokeshila nvula mbedi, udi untokeshila nvula ya bungi, nvula mbedi ne nvula mishishe, bu muakenzeye diambedi.

²⁴ Bishihuidi nebiule tente ne blé, ne nyinyo mihia-mihia ne manyi nebihongoloke mu bikaminu.

²⁵ Nennuhingashile bintu ha mutu ha bienu biakadiabo kudi mikumbi, kudi mukumbi udi utuhika, kudi mukumbi udi uhohola, ne kudi mukumbi udi ukosa, tshisumbu tshianyi tshinene tshia bena nvita tshinakatuma munkatshi muenu.

²⁶ Nenudie bintu bikumbane, nenukute; nenutumbishe dina dia Yehowa Nzambi wenu, wakunuenzela malu a kukema; ne bantu banyi kabena bafuishibua bundu kabidi kashidi.

²⁷ Nenumanye ne meme ndi munkatshi mua Bena Isalele, meme Yehowa, ndi Nzambi wenu, ne kakuena Nzambi mukuabo; bantu banyi kabena bafuishibua bundu kabidi kashidi.

Nzambi Neitshikishile Bantu Bandi Nyuma Wandi

²⁸ Ku nyima kua malu â nengitshikishile bantu bonso Nyuma wanyi; bana benu ba balume ne bana benu ba bakashi nebambe malu adi kâyi manze kulua, bakulumpe benu nebalote bilota, bansongalume benu nebamone bikena kumona.

²⁹ Nengitshikishile Nyuma wanyi kabidi hamʼbidi ha bahika balume ne bahika bakashi mu matuku au.

³⁰ Nendeshe bantu malu a kukema mu ditu ne ha buloba: mashi, kahia ne mulanjilanji wa muishi.

³¹ Diba nedikudimuke midima ne ngondo neakudimuke mashi, diambedi dituku adi dinene dia Yehowa, didi dikuatshisha bantu buowa, kadiyi dianze kulua.

³² Halua bualu ebu, muntu yonso watela dina dia Yehowa neasungidibue; bualu bua mu mukuna wa Siona ne mu Yelushalema nemuikale bakuabo bahanduke bu muakamba Yehowa; ne munkatshi mua bantu aba badi bashala nemuikale bakuabo badi Yehowa Ubikila.