Yowanane 7 - Mukanda wa Nzambi Dihungila Dikulukulu ne Dihungila Dihia-dihia 2003

Balunda ba Yesu badi basue aye ka Yelushalema ku disanka dia Bena Yuda

¹ Hakashika malu â, Yesu wakadi wendakana mu Galela; kakadi wendakana mu Yudaya, bualu bua Bena Yuda bakadi bakeba mua kumushiha.

² Disanka dia Bena Yuda, Disanka dia Bisambusambu, diakadi ha buihi.

³ Bana babo ba difu dimue bakamuambila ne, Umuka kunoko, ya mu Yudaya bua bayidi bebe kabidi bamone malu a kukema audi wenza.

⁴ Kakuena muntu udi wenza bualu mu busokoko biasueye kumanyibua kudi bantu. Biwenza malu â, udimueneshe kudi ba ha buloba.

⁵ Bualu bua bana babo ba difu dimue kabakamuitabusha.

⁶ Yesu wakabambila ne, Diba dianyi kadiena dianze kufika, kadi diba dienu didiku matuku onso.

⁷ Ba ha buloba kabena bamanye mua kuikala nʼenu lukuna; kadi badi nʼanyi lukuna, bualu bua ndi mbamba ne, Malu adibo benza nmabi.

⁸ Yai bienu ku disanka, tshiena nya katataka ku disanka edi, bua diba dianyi kadiena dianze kukumbana.

⁹ Hakabambileye dî edi, wakashala mu Galela.

Yesu udi umuka mu Galela, udi uya ku Disanka dia Bisambusambu

¹⁰ Hakaya bana babo ne Yesu ku disanka, yeye kabidi wakaya mu musokoko, bantu kabai bamanye.

¹¹ Bena Yuda bakamukeba ku disanka, bakebeshangana ne, Udi hanyi?

¹² Bantu bakatamba kuelangana mpata ya bualu buandi mu musokoko; bakuabo bakamba ne, Udi muntu muimpe; bakuabo ne, Nasha, yeye udi uhambuisha bantu.

¹³ Kadi kakuakadi muntu wakamuamba ku mesu kua bantu, bua bakatshina Bena Yuda.

¹⁴ Kadi hankatshi ba matuku a disanka, Yesu wakalua mu ntempelo, wakayisha bantu.

¹⁵ Bena Yuda bakakema ne, Muntu eu udi mumanye mikanda, kai muanze kuiyila, munyi?

¹⁶ Yesu wakabakudimuna dî ne, Diyisha dianyi kandianyi, ndia udi muntume.

¹⁷ Bitabusha muntu kuenza bu mudi Nzambi musue, yeye neamanye diyisha edi, ne ndia Nzambi, anyi ndi ndiambila nkayanyi.

¹⁸ Wadiambila udi ukeba butumbi buandi; kadi wakeba butumbi bua wakumutuma udi biandi muntu mulelela, kena ne bualu bubi munda.

¹⁹ Mose kakanuha mikenshi, anyi? Kadi kakuena umue wenu udi uyenza. Nudi nukebela kushihela tshinyi?

²⁰ Bantu bakamukudimuna dî ne, Udi ne demon munda, udi ukeba kukushiha nganyi?

²¹ Yesu wakabandamuna ne, Nakuenza bualu bumue bua kukema, buonso buenu nudi nukema bualu ebu.

²² Mose wakanuha bualu bua ditengula (kadiakafuma kudi Mose, diakafuma kudi bankambua); nutu nuatengula muntu dituku dia Lumingu.

²³ Biatengulabo muntu dituku dia Lumingu, bua kabashihi mukenshi wa Mose; nudi nʼanyi lukuna, bua nakahingisha bukole mu mubidi wa muntu wonso mujima difuku dia Lumingu, anyi?

²⁴ Kanulumbuluishi muntu tshilumbu ku bimuenu biandi, nulumbulule ne kulumbulula kuakane.

²⁵ Bakuabo ba mu Yelushalema bakakonka ne, Eu kanyeye udibo bakeba kushiha, anyi?

²⁶ Kadi monai, yeye udi wamba malu ku mesu kua bantu bonso, kabena bamuambila bualu. Bakelenge badi bamanye bulelela ne, Yeye udi Kilisto, anyi?

²⁷ Kadi tuetu tudî bamanye muntu eu kuakufumeye; halua Kilisto, kakuena muntu wamanya kuafumeye.

²⁸ Yesu wakela dî diandi bikole mu ntempelo, uyisha bantu ne, Nudi banmanye, nudi bamanye kunakufuma; tshiakudivuila, wakuntuma udi mulelela, unudi kanui bamanye.

²⁹ Meme ndi mumumanye, bualu bua nakufuma kudiye, yeye wakuntuma.

³⁰ Bakakeba mua kumukuata; kadi muntu kakamulenga tshianza, bualu bua diba diandi kadiakadi dianze kulua.

³¹ Bantu ba bungi ba mu tshisumbu bakamuitabusha, bakakonka ne, Halua Kilisto, nenze bimanyinu bitambe ebi bidi muntu eu wenza, anyi?

³² Bafalese bakunvua bantu belangana mpata ya bualu buandi; bakuidi banene ne Bafalese bakatuma tuhalai bua kumukuata.

³³ Yesu wakamba ne, Nengikale nʼenu tshituha tshihi, hashishe nenye kudi wakuntuma.

³⁴ Nenunkebe, kanuena nunmona; kanuena bamanye mua kulua kungikala.

³⁵ Bena Yuda bakakonkangana ne, Muntu eu neaye, kudi kunyi kutudi katu! bamanye mua kumumona? Neaye kudi bena tshimuangi munkatshi mua Bena Gelika, neayishe Bena Gelika, anyi?

³⁶ Edi ndî kai diakambeye ne, Nenunkebe, kanuena nunmona; kanuena bamanye mua kulua kungikala?

Yesu udi wamba bualu bua bukole bua Nyuma Muimpe

³⁷ Hakalua dituku dia kunshikidilu dia disanka, diakadi dituku dinene, Yesu wakimana, wakela dî diandi bikole ne, Bikala muntu ne nyota, alue kundi, anue.

³⁸ Misulu ya mai a muoyo nebatuke munda mua wangitabusha, bu muakamba Mukanda wa Nzambi.

³⁹ Yeye wakadi Wamba bua Nyuma wangatabo kudi bakumuitabusha; Nyuma kakadi muanze kulua, bua Yesu kakanza kutumbishibua.

Bantu badi belangana mpata bua Yesu

⁴⁰ Bantu bakuabo, hakunvuabo mei â, bakamba ne, Bulelela, yeye udi muprofete au wa Nzambi.

⁴¹ Bakuabo bakamba ne, Yeye udi Kilisto. Kadi bakuabo bakakonka ne, Ahu Kilisto udi ufuma mu Galela, anyi?

⁴² Mukanda wa Nzambi kawena wamba ne, Kilisto neikale kankanunuina ka Davidi, neafume ku Beteleheme, kuakadi Davidi, anyi?

⁴³ Ditahuluka diakadiku munkatshi mua bantu bua bualu buandi.

⁴⁴ Bakuabo bakasua kumukuata, kadi muntu kakamulenga tshianza.

⁴⁵ Tuhalai tuakahingana kudi bakuidi banene ne Bafalese; bobo bakabakonka ne, Munyi kanuakulua nʼandi?

⁴⁶ Tuhalai tuakabakudimuna ne, Kakuakadi muntu kale tô ne katataka wakakula bu mudi muntu eu wakula.

⁴⁷ Bafalese bakabandamuna ne, Nuenu kabidi, bakanuhambuisha, anyi?

⁴⁸ Bantu betu banene anyi Bafalese bakumuitabusha, anyi?

⁴⁹ Bantu ba tshisumbu etshi badi kabai bamanye mikenshi ya Nzambi badi bedibua mulau.

⁵⁰ Nikodemo, muntu wakalua kudiye diambedi, umue wabo wa Bafalese, wakabambila ne,

⁵¹ Mukenshi wetu udi ukosa tshilumbu tshia muntu diambedi kabai banze kunvua dî diandi, kabai banze kumanya bualu buakuenzeye, anyi?

⁵² Bakamukonka ne, Wewe kabidi udi muena Galela, anyi? Ujingulule, Umanye ne, Muprofete katu watuma ku Galela. [

Badi bakuata mukashi mu masandi

⁵³ Muntu ne muntu wakahingana kuandi.