Yowanane 20 - Mukanda wa Nzambi Dihungila Dikulukulu ne Dihungila Dihia-dihia 2003

Kubika kua Yesu ku lufu ne malu makuabo a dituku adi

¹ Dituku dia kumudilu dia lumingu, Malia wa ku Magadala wakalua ku lukita hatshiatshia, butuku kabui buanze kutshia, wakamona dibue dimana kumusha ku lukita.

² Wakanyema lubilu, wakaya kudi Simona Petelo ne kudi muyidi mukuabo wakadi musuibue kudi Yesu, wakabambila ne, Bakumusha Mukelenge mu lukita, katuena bamanye kuakumuladikabo.

³ Petelo wakaluhuka ne muyidi au, bua kuyabo ku lukita.

⁴ Bubidi buabo bakaya lubilu, kadi muyidi mukuabo wakahita Petelo lubilu, Wakafika ku lukita diambedi;

⁵ wakinangila, wakatangilamu, wakamona bilulu bia line hanshi, kadi yeye kakabuelamu.

⁶ Simona Petelo wakalua umulonda ku nyima, wakabuela mu lukita, wakamona bilulu bia line hanshi,

⁷ kadi tshitambala tshiakadi ku mutu kua Yesu katshiakadi ha bilulu bia line, tshiakadi tshianga ha buatshi.

⁸ Hashishe, muyidi wakadianjila kufika ku lukita, wakabuela, wakatangila, wakitabusha.

⁹ Diambedi kabakadi banze kumanya dî dia mu Mukanda wa Nzambi ne, Budiye nʼabu mbua kubika ku lufu.

¹⁰ Bayidi bakahingana ku nsubu kuabo kabidi.

Yesu udi umueneka kudi Malia wa ka Magadala

¹¹ Malia wakadi muimane ku lukita udila; hakadiye udila nunku, wakinangila, wakatangila mu lukita;

¹² wakamona banjelo babidi bashikame baluate bilulu bitoke tô, munga ku mutu, mukuabo ku makasa, hakadi tshitalu tshia Yesu tshiladika.

¹³ Bakamukonka ne, Mukashi, udi udidila tshinyi? Yeye wakabambila ne, Bua bakuya ne Mukelenge wanyi, tshiena mumanye kuakumuladikabo.

¹⁴ Hakambeye nunku, wakatshinguluka, wakamona Yesu muimane, kakamumanya ne, Yesu.

¹⁵ Yesu wakamukonka ne, Mukashi, udi udidila tshinyi? Udi ukeba nganyi? Wakela meshi ne, Muena mudimu wa mu muaba au, wakamuambila ne, Mukelenge, biwikala mumumushe kunoko, ungambile kuwakumuladika, nemuangate.

¹⁶ Yesu wakamba ne, Malia. Hakatshingulukeye, wakamuambila mu Buena Yuda ne, Laboni, kukudimuna kua muaku ne, Muyishi.

¹⁷ Yesu wakamuambila ne, Kundengi tshianza, bualu bua tshiena muanze kuya kulu kudi Tatu; ya kudi bana betu, ubambile ne, Ndi nya kulu kudi Tatu wanyi ne Tatu wenu, kudi Nzambi wanyi ne Nzambi wenu.

¹⁸ Malia wa ku Magadala wakalua, wakambila bayidi ne, Nakumona Mukelenge, yeye wakungambila malu â.

Yesu udi umueneka kudi bayidi bandi, Toma kaiku

¹⁹ Dituku adi dia kumudilu dia lumingu, diba dimane kubuela, bayidi bakadi mu nsubu ne bibi binshila bualu bua bakatshina Bena Yuda, Yesu wakalua, wakimana munkatshi muabo, wakabambila ne, Ditalala dikale kunudi.

²⁰ Hakambeye dî edi, wakabalesha bianza biandi ne lubadi luandi. Mitshima ya bayidi yakasanka, hakatangilabo Mukelenge.

²¹ Yesu wakabambila kabidi ne, Ditalala dikale kunudi; bu muakantuma Tatu, nunku mundi nutuma.

²² Hakambeye dî edi, wakabela muhuya, wakabambila ne, Nuangate Nyuma Muimpe;

²³ muetu yonso unuajimishila mibi yandi, neijimishibue; muntu yonso unudi kanui nujimishila, neashale kudiye,

Yesu udi umueneka kudi bayidi, Toma udiku

²⁴ Kadi Toma, mukuabo wa bayidi dikumi ne babidi, dina diandi dikuabo ne, Didumo, kakadi nʼabo, hakalua Yesu.

²⁵ Bayidi bakuabo bakamuambila ne, Tuakumona Mukelenge. Kadi yeye wakabambila ne, Bingikala tshi ntangila bibangu bia milonda bidi mu bianza biandi, tshî mbuesha munu mu bibangu bia milonda, tshî mbuesha tshianza mu lubadi, tshiena ngitabusha.

²⁶ Hakahita matuku muanda mukulu kabidi, bayidi bandi bakadi mu nsubu, Toma wakadi nʼabo. Bibi biakadi binshila, Yesu wakalua, wakimana munkatshi muabo, wakamba ne, Ditalala dikale kunudi.

²⁷ Yeye wakambila Toma ne, Tuma munu webe kunoko, umone bianza bianyi; tuma tshianza tshiebe, utshibueshe mu lubadi luanyi; kuikadi ne mpata, witabushe.

²⁸ Toma wakamuandamuna ne, Mukelenge wanyi ne Nzambi wanyi.

²⁹ Yesu wakamuambila ne, Bualu bua wewe wakuntangila, wakuitabusha; bakungitabusha, kabai banze kuntangila, badi ne disanka.

Yone udi wamba tshiakufundileye malu â

³⁰ Yesu wakenza bimanyinu bikuabo bia bungi ku mesu kua bayidi, bidi kabi bifundibue mu mukanda eu;

³¹ kadi malu â adi mafundibue bua nuenu nuitabushe ne, Yesu udi Kilisto, Muana wa Nzambi; ne bua nuenu nuikale ne muoyo mu dina diandi, hanuitabusha.