Yowanane 16 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi usamba bayidi bandi: Makenga nealue

¹ Nakunuambila malu â bua nuenu kanulenduki.

² Nebanuhatule mu nsunagoga; bulelela, diba nedilue diela munushihi meshi ne, Ndi ngenzela Nzambi mudimu.

³ Nebenze malu â bualu bua kabakamanya Tatu, kabakanmanya meme kabidi.

⁴ Nakunuambila malu â bua nuenu kuavuluka, halua diba diau ne, Nakumana kunuambilau. Tshiakanuambila malu â ku tshibangidilu, bualu bua nakadi nʼenu.

⁵ Kadi katataka ndi nya kudi wakuntuma; kakuena umue wenu udi unkonka ne, Uyaya kudi kunyi?

⁶ Bualu bua nakunuambila malu â, mitshima yenu idi miule tente ne kanyinganyinga.

Nyuma Muimpe nenzele ba ha buloba malu asatu

⁷ Kadi ndi nuambila bulelela ne, Meme muye mbimpe bienu; bingikala tshî nya, Musambi kena ulua kunudi; kadi binaya, nenutumineye.

⁸ Halueye, neatuishe ba ha buloba bua bubi, ne bua buakane, ne bua dihila;

⁹ bua bubi, bualu bua bobo kabena bangitabusha;

¹⁰ bua buakane, bualu bua meme ndi nya kudi Tatu, kanuena nuntangila kabidi;

¹¹ bua dihila, bualu bua mukokeshi wa buloba ebu wakumana kuhila.

Nyuma Muimpe nealeshe bayidi ba Yesu malu mahia-mahia

¹² Ntshidi ne malu makuabo a bungi a kunuambila, kadi nuenu kanuena bamanye mua kuatuala katataka.

¹³ Kadi halua Nyuma wa bulelela, yeye neanulombole mu malu malelela onso; bua yeye kena udiambila, kadi neambe anu malu ûnvueye, neanuambile malu alualua.

¹⁴ Neantumbishe meme; bualu bua neangate malu anyi, neanuambileu.

¹⁵ Malu onso a Tatu ngânyi; ebu mbualu bunakuambila ne, Yeye neangate malu anyi, neanuambileu.

Yesu udi ubambila buala bua lufu luandi, ne bua dibika diandi, ne bua kulua kuandi kua tshiakabidi

¹⁶ Haleha tshituha tshihi kanuena nuntangila, haleha tshituha tshihi kabidi nenuntangile.

¹⁷ Bayidi bandi bakuabo bakakonkangana ne, Edi ndî kai didiye utuambila ne, Haleha tshituha tshihi kanuena nuntangila, ne haleha tshituha tshihi kabidi nenuntangile, ne dî dikuabo ne, Bualu bua meme ndi nya kudi Tatu?

¹⁸ Bakadi bakonkangana nunku ne, Edi ndî kai ne, Haleha tshituha tshihi? Katuena bamanye tshidiye wamba.

¹⁹ Hakamanya Yesu ne, Badi basue kunkonka bualu ebu, yeye wakabakonka kabidi ne, Nudi nuebeshangana bua dî dinakuamba ne, Haleha tshituha tshihi kanuena nuntangila, ne haleha tshituha tshihi kabidi nenuntangile?

²⁰ Bulelela, bulelela, ndi nuambila ne, Nenudile, nenujinge, kadi ba ha buloba nebasanke; nenuikale ne kanyinganyinga, kadi kanyinganyinga kenu nekakudimuke disanka.

²¹ Hatshidi mukashi mukuatshike ha kulela, udi ne kanyinganyinga, bua diba diandi diakufika; kadi haleleye muana, kena uvuluka kabidi kanyinganyinga, bualu bua disanka diandi ne, Muntu wakuledibua ha buloba.

²² Nunku katataka nudi ne kanyinganyinga; kadi nenumone kabidi, mitshima yenu neisanke, muntu kena ununyenga disanka dienu.

²³ Dituku adi kanuena nunkonka bualu. Bulelela, bulelela, ndi nuambila ne, Binualomba Tatu tshintu, yeye neanuhetshi mu dina dianyi.

²⁴ Tô ne katataka kanuakanza kulomba tshintu mu dina dianyi; nulombe, nenuangate, bua disanka dienu dikumbane.

²⁵ Nakunuambila malu â mu nsumuinu; kadi diba nedilue dingikala tshi nuambila malu mu nsumuinu kabidi, nenujukuile bualu bua Tatu.

²⁶ Dituku adi nenulombe mu dina dianyi; tshiena nuambila ne, Nenulombele Tatu;

²⁷ bua Tatu mene udi munusue, bualu bua nuenu nuakunsua meme, nuakuitabusha ne, Nakafuma kudi Tatu.

²⁸ Nakafuma kudi Tatu, nakulua ha buloba; ndi ngumuka ha buloba kabidi, nempingane kudi Tatu.

²⁹ Bayidi bandi bakamba ne, Katataka wewe udi utujukuila bualu, kuena ubuamba mu lusumuinu.

³⁰ Katataka tudi bamanye ne, Wewe udi mudimanyine malu onso, kuena ne bualu bua muntu kukukonka; bua bualu ebu tudi tuitabusha ne, Wewe wakafuma kudi Nzambi.

³¹ Yesu wakabakudimuna ne, Nudi nuitabusha mpindiu, anyi?

³² Unvuai, diba nedilue, diakumana kufika mene mene, dianumuangalashabo, muntu kuandi, muntu kuandi; nenunshîe meme nkayanyi; kadi tshiena nkayanyi bualu bua Tatu udi neanyi.

³³ Nakunuambila malu â bua nuenu nuikale ne ditalala munda muanyi. Ha buloba nudi ne dikenga; kadi nukoleshe mitshima yenu; nakuhita ba ka buloba bukole.