Yowanane 15 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi usamba bayidi bandi: Yesu udi muonshi mimene, bayidi bandi badi matamba au

¹ Meme ndi muonshi mimene mulelela wa mamuma a nvinyo, Tatu wanyi udi mulami wau.

² Ditamba dianyi dionso didi kadî dikuama mamuma, yeye neadiumushe, kadi ditamba dionso didi dikuama mamuma yeye neadilengeshe bua kukuamadi mamuma makuabo.

³ Katataka nudi balengeshibue bualu bua dî dinakunuambila.

⁴ Nuenu nuikale munda muanyi, meme nengikale munda muenu. Bu mudi ditamba kadi dimanye mua kudikuamina mamuma, anu hikaladi ku muonshi mimene; nunku nuenu kabidi kanuena bamanye mua kukuama mamuma, binuikala kanui nushala munda muanyi.

⁵ Meme ndi muonshi munene, nuenu nudi matamba; wikala munda muanyi, meme muikale munda muandi, yeye neakuame mamuma a bungi; binuikala kanui nʼanyi, kanuena bamanye mua kuenza bualu.

⁶ Bikala muntu kai ushala munda muanyi, nebamumushe bu ditamba, neafube; badi bunguisha matamba, baêla mu kahia, adi ahla.

⁷ Binuikala munda muanyi, bikala mei anyi munda muenu, nulombe tshionso tshinuasua, nebanuenzeletshi.

⁸ Tatu wanyi udi utumbishibua mu bualu ebu ne, Nudi nukuama mamuma a bungi; nunku nenuikale bayidi banyi.

⁹ Nakunusua bu muakunsua Tatu, Shalai mu dinanga dianyi.

¹⁰ Binuatumikila mikenshi yanyi, nenushale mu dinanga dianyi, bu munakutumikila mikenshi ya Tatu wanyi, ne mundi nshala mu dinanga diandi.

¹¹ Nakunuambila malu â bua disanka dianyi kuikaladi munda muenu, ne bua disanka dienu kukumbanadi.

¹² Eu udi mukenshi wanyi ne, Nusuangane bu munakunusua.

¹³ Kakuena muntu udi ne dinanga didi ditambe edi, dia muntu udi ufuila balunda bandi.

¹⁴ Nenuikale balunda banyi, binuenza bu mundi nuambila.

Yesu udi mulunda wa bayidi bandi

¹⁵ Tshiena nubikila kabidi bahika; bualu bua muhika kena mumanye budi mukelenge wandi wenza; kadi nakunubikila balunda; bualu bua nakunumanyisha malu onso anakunvua kudi Tatu wanyi.

¹⁶ Nuenu kanuakunsungula, nakunusungula, nakunujadika bua nuenu kuya kukuama mamuma ne bua mamuma enu ikale tshiendelele, bua tshintu tshionso tshinualomba Tatu mu dina dianyi yeye anuhetshi.

¹⁷ Nakunuambila malu â bua nuenu kusuangana.

Ba ka buloba nebikale ne bayidi ba Yesu lukuna

¹⁸ Bikala ba ha buloba nʼenu lukuna, nudi bamanye ne, Bakadi nʼanyi lukuna diambedi.

¹⁹ Bu nuenu bikale ba ha buloba, ba ha buloba bakadi kusua bantu babo; kadi bualu bua nuenu kanuena ba ha buloba, nakunusungulula mu ba ha buloba, nunku ba ha buloba badi nʼenu lukuna.

²⁰ Nuvuluke dî dinakunuambila ne, Muhika kena mutambe nfumu wandi. Biankengeshabo, nebanukengeshe kabidi; bienzabo dî dianyi, nebenze dî dienu kabidi.

²¹ Nebanuenzele malu â onso bualu bua dina dianyi, bua bobo kabena bamanye wakuntuma.

²² Bu meme tshî mulue, tshî mubambile bualu, kabakadi kuikala ne bubi; kadi katataka kabena ne tshilayidilu tshia bubi buabo.

²³ Udi nʼanyi lukuna udi ne Tatu wanyi kabidi lukuna.

²⁴ Bu meme tshi muenze munkatshi muabo malu akadi muntu mukuabo kai muenze, bobo kabakadi kuikala ne bubi; kadi katataka bakuntangila ne Tatu wanyi, bakadi ne bubidi buetu lukuna.

²⁵ Nunku bakushikisha dî diakadi difunda mu mikenshi yabo ne, Bakadi nʼanyi lukuna tshianana.

Nyuma Muimpe ne bayidi nebambe Yesu

²⁶ Kadi halua Musambi unanutumina, Nyuma wa bulelela mene mene, wafuma kudi Tatu, yeye neangambe;

²⁷ nuenu kabidi nudi nungamba, bualu bua nuakadi nʼanyi ku tshibangidilu tô ne katataka.